9

¹ وركب عيسى القارب ومشي البحيره علميد يرجع لبلاده ² فجوا بعض الناس ومعاهم واحد مشلول ممدد عى سرير ، ولوما ابسر عيسى ايمانهم قال للمشلول :(اتشجع يا ابني ، مغفوره لك ذنوبك)

³ فقالوا بعض الفقهاء في نفسهم :( ذيه الرجال يكفر)

⁴ ودرا عيسى بأفكارهم ، فقال :(للمه تفكروا بالشر في قلوبكم؟) ⁵ ايش الأسهل؟ انه يقال : مغفوره لك ذنوبك ، ولا نقول قم وامشي؟ ⁶ عد ارويكم ان ابن الانسان معه سلطان على الأرض علميد يغفر الذنوب ، وقال للمشلول : قم شل سريرك وسير لبيتك ⁷ فقام الرجال وسار لبيته ⁸ ولوما ابسروا الناس ايش وقع ، خافوا ومجدوا الله اللي ادى البشر ساع ذيه السلطان ⁹ وسار عيسى من هاناك ، وابسر رجال جالس في بيت الجبايه اسمه متى ، فقال له عيسى :(الحقني) فقام ولحقه

¹⁰ ولوما عيسى ياكل في بيت متى ، جو خيرات من جباة الضرايب والمذنبين وجلسوا مع عيسى وطلابه ¹¹ وابسر بعض الفريسيين ذيك ، فقالوا لطلابه :(للمه بياكل استاذكم مع جباة الضرايب والمذنبين؟)

¹² وسمع عيسى كلامهم فجاوبهم :(ما يحتاجوش المتعافين لدكتور ، ولكن اللي هم مرضى) ¹³ سيروا وتعلموا معنى تيه الآيه :(اشتي رحمه مش ذبيحه ، وما جيتش ادعي الصلحين ، ولكن المذنبين) ¹⁴ فجوا طلاب يوحنا المعمدان لعيسى وقالوا له :(ليش احنا والفريسيين خيرات ، وطلابك ما يصوموش؟)

¹⁵ فجاوبهم عيسى :(او يسبر ان اهل العريس انهم يزعلوا والعريس عندهم؟ لكن عيجي وقت يرفع فيه العريس من بينهم ويرجعوا يصوموا)

¹⁶ محد يرقع ثوب قديم برقعه من قماش جديد لأنها عتنكمش وتبعد عن الثوب ، ويوقع الخزق اخس ¹⁷ ومحد يفعل خمر جديد في اوعيه جلد قديمه ، علميد ما تتشطط الأوعيه وتسيل الخمره وتخرب الأوعيه ، ولكن ينطرح الخمر في أوعيه جديده وتسلم الخمره والأوعية ¹⁸ ولوما كان يتحاكا قرب منه رئيس يهودي وسجد ه وقال :(ذلحينه ماتت بنتي ، جي اطرح عليها يدك علميد تحيا) ¹⁹ فقام عيسى ولحقه طلابه

²⁰ وكان به هاناك مره بينها نزيف دم من 12 سنه ، فقربت من عيسى ولمست طرف ثوبه ²¹ لأنها حاكت نفسها وقالت :(يكفيني أعس ثوبه علميد اتعافي)

²² والتفت عيسى وابسرها وقال :(اثقي يا بنتي ، ايمانك شفاك) وتعافت المره على طول

²³ ولوما وصل عيسى بيت الرئيس اليهودي ، ابسر الجنائزيين والناس متوترين ²⁴ فقال :(اخرجوا ما ماتتش البنت ، بس هي نايمه) وضحكوا عليه ²⁵ وبعدما خرج الناس ، دخل وشل يد البنت وقامت ²⁶ وانتشر الخبر في تيك المنطقه كلها ²⁷ ورحله عيسى من هاناك ولحقه اثنين عميان بيصيحوا :(ارحمنا يا ابن داود)

²⁸ ولوما دخل البيت قربوا منه العميان ، فقال لهم عيسى :(انتوا مؤمنين اني قادر على ذيه؟)

فجاوبوا :(ايوه يا سيد)

²⁹ وعسعس عيسى عيونهم وقال :(لكم على قدر ايمانكم) ³⁰ وتفتحت عيونهم ونبههم عيسى فقال :(اوبهوا يدرا احد) ³¹ ولكنهم خرجوا ونشروا الخبر في تيك المنطقه كلها ³² ولوما خرج العميا ، جو بعض الناس بواحد أعجم بينه شيطان ³³ ولوما طرد عيسى الشيطان تحاكا الأعجم ، وطننوا الناس ، وقالوا :(ما ابسرناش ساع ذيه في اسرائيل)

³⁴ ولكن الفريسيين قالوا :(برئيس الشياطين تنطرد الشياطين) ³⁵ وتمشى عيسى في كل المدن والقرى علميد يعلم الناس ويعلن بشارة الملكوت ، ويشفي الناس من كل مرض ³⁶ ولوما ابسر الناس امتلا قلبه بالرحمه عليهم ، لأنهم كانوا يائسيين متفرقين ساع غنم بلا راعي ³⁷ فقال لطلابه :(الحصاد خيرات ، ولكن العمال قليلين ³⁸ اطلبوا من رب الحصاد انه يرسل عمال للحصاد