14

¹ وفي ذيك الزمان سمع الحاكم هيرودس بأخبار عيسى ² فقال للناس حقه :(ذيه يوحنا المعمدان قام من بين الأموات ، علميد هذا توقع المعجات على يده)

³ وكان هيرودس مسك يوحنا وقيده وسجنه علميد هيرودية مرة اخو فيلبس ⁴ لأن يوحنا كان بيقول ل :(ما يسبرش انك تتزوجها) ⁵ وكان يشتي يقتله وافتجع من الشعب لأنهم كان يبسروه نبي

⁶ ولوما فعل هيرودس عيد ميلاده ، رقصت بنت هيرودية في الحفلة ، واعجبت هيرودس ⁷ وحلف لها انه يدي لها ايش ما تشتي ⁸ فكلمتها أمها ، وقالت له :(ادي لي بين ذيه الصحن رأس يوحنا المعمدان) ⁹ وزعل الملك ، ولكنه أمرهم يدوا لها اللي تشتي ، على سب اليمين اللي حلف به قدام الناس ¹⁰ فرسل وقطع رأس يوحنا في السجن ¹¹ وجوا به على طبق ، وسلمه للبنت ، وهي شلته لأمها ¹² وجوا طلاب يوحنا ، وشلوا الجثة ودفنوها ، وبعدا ساروا وحاكوا عيسى ¹³ ولوما سمع عيسى رحله من هاناك في قارب لمكان قفره علميد يجلس بينه لوحده ، وعرفوا الناس ولحقوه ماشين على ارجيلهم من المدن ¹⁴ وحين نزل من القارب ابسر الناس خيرات ، ورحمهم وشفى مرضاهم

¹⁵ وفي الليل قربوا منه طلابه وقالوا له :(مشي الوقت يا سيد في تيه البقعه القفراء ، حاكي الناس انهم يسيروا القرى القريبه ويشتروا لهم آكل)

¹⁶ فجاوبهم عيسى :(مابش داعي يريحولهم ، ادوا لهم انتوا اللي ياكلوا)

¹⁷ فقالوا له :(مابش عندنا هانا إلا خمس خبزات وسمكتين)

¹⁸ فقال عيسى :(ادوا اللي عندكم) ¹⁹ وبعدا قال للناس انهم يجلسوا على العشب ، وشكل الخبزات الخمس والسمكتين ، ورفع عيونه للسماء وبارك كسر الخبز وادا لطلابه ، والطلاب وزعوا للناس ²⁰ واكلوا لوما شبعوا ، وبعدا رفعوا 12 سفره ملان من الكسر اللي بقت ²¹ وكان اللي اكوا حوالي 5000 رجال ، من غير النسوان والجهال ²² وحاكا عيسى طلابه انهم يطلعوا فوق القارب ويسبقوه للشق الثاني من الشاطئ ، لوما يرجع الناس ²³ ولوما خلاهم يروحوا طلع للجبل علميد يصلي لحاله ، وكان هاناك وحده حين جا الليل ²⁴ وأما القارب بعد خيرات عن الشاطئ ، وغطته الأمواج ، لأن الريح كانت عكسه

²⁵ وقبل الفجر ، جاء عيسى لطلابه وهو ماشي على البحر ²⁶ ولوما ابسروه طلابه ماشي على البحر افتجعوا وقالوا :(ذيه جني) وصاحوا من كثر الفجيعه

²⁷ فقال لهم عيسى على طول :(لا تفتجعوش ، انا هو لا تفتجعوش)

²⁸ فقال له بطرس :(لو هو انت يا سيدي ، قلي اجيلك على الماء)

²⁹ فقال له عيسى :(تعال) ونزل بطرس من القارب ومشي على الماء جهة عيسى

...

³⁰ ولكنه افتجع لوما ابسر الريح قويه وبدا يغرق ، وصاح :(انقذني يا سيدي)

³¹ ومد عيسى يده طوالي ومسكه وقال له :(يا قليل الايمان ، ليش شكيت؟)

³² ولوما طلعوا للقارب هدأت الريح ³³ فسجدوا له اللي كانوا في القارب وقالوا :(الصدق ، انت ابن الله)

³⁴ ومشي عيسى وطلابه لشاطئ جنسرت ³⁵ وعرفوه أهل تيك البقعه ، وحاكوا بالخبر اللي في المنطقه كلها ، وادوا له كل المرضى ³⁶ وطلبوا منه انه يسمح للمرضى انهم يلمسوا طرف ثوبه ، وكل من لمس طرف ثوبه يشفى