13

¹ وخرج عيسى من الدار في ذيك اليوم وجلس شق البحر ² واتزاحموا عليه الناس خيرات ، حتى انه طلع على القارب والناس كلهم جالسين في الشاطئ ³ فكلمهم بأمثال على حاجات خيرات قال :(خرج الزارع علميد يزرع ⁴ ولوما كان يزرع نكع شوية من الحب على جنب الطريق ، وجت الطيور وأكلته ⁵ ونكع شويه منه على أرض حجر ترابها قليل ، واتزرع على طول لأن ترابتها مش عميقه ⁶ ولوما شرقت الشمس حرقة الزرعه لأنه مابش معاها جذور ويبست ⁷ ونكع شويه منه على الشوك ، ونبت بين الشوك وخنقه ⁸ ومنه اللي نكع في أرض حاليه ، وادا بعضه ميه وبعضه ستين وبعضه ثلاثين ⁹ من معه آذان يسمعني !) ¹⁰ فقربوا منه طلابه وقالوا له :(ليش بتحاكيهم بالأمثال؟)

¹¹ رد عليهم :(انتوا اديت لكم معرفة أسرار ملكوت الله وأما هم ما اديت لهم ¹² لأن من كان له حاجه يزداد ويفيض ، ومن مابش معه شي يشلوا منه حتى اللي معه ¹³ وانا بين احاكيهم بالأمثال لأنهم

يفتحوا عيونهم وما يبسروش ،

ومهما سمعوا ما يفهموش

¹⁴ وفيهم تتم نبوءة إشعياء :

(مهما سمعتوا ما تفهموش

ومهما ابسرتوا ما تبسروش

¹⁵ لأن ذيه الشعب تصلب قلبه

وسدوا آذانهم

وغمضوا عيونهم

علميد ما يبسروش بعيونهم

ويسمعوا بآذانهم

ويفهموا بقلوبهم

ويتوبوا واشفيهم)

¹⁶ وأما انتوا يهنا كم لأن عيونكم بتبسر وآذانكم تسمع ¹⁷ اقول لكم الصدق :(أنبياء خيرات والأبرار اتمنوا انهم يبسروا اللي انتوا تبسروه وما استروش ، وان يسمعوا اللي بتسمعوه وما استروش) ¹⁸ اسمعوا انتوا معنى مثل الزارع ¹⁹ من يسمع كلام الملكوت وما يفهمش ، هو المزروع في جنب الطريق ، ويجي الوغد ويشل اللي هو مزروع في قلبه ²⁰ ومن يسمع كلام الملكوت ويتقبله على طول وفارح ، فهو المزروع بين ارض متحجره ²¹ مابش بينه جذور في نفسه ويوقع لوقت ، ولوما يوقع ضيق ولا ملاحقه من سبة كلام الملكوت يرتد عنه طوالي ²² ومن يسمع كلام الملكوت وما يديش محصول ، فهو المزروع بين الشوك ، بينه من هموم الدنيا وحب الغنى اللي يخنق المحصول فيه ²³ واما من يسمع كلام الملكوت ويفهمه ، فهو المزروع في الأرض الحاليه ، ويخرج من المحصول ويدي بعضه ميه وبعضه ستين وبعضه ثلاثين ²⁴ وادا لهم عيسى مثل ثاني ، قال :(يشبه ملكوت الله رجال زرع زرع حالي في جربته) ²⁵ ولوما كانوا الناس راقدين ، جاء عدوه وزرع زوان وسط القمح ومشي ²⁶ ولوما طلع المحصول وخرجت السنابل بدي الزوان معه

²⁷ وجو الخدم حق صاحب الجربه وقالوا له :(يا سيد ، انت زرعت زرع حالي في الجربه ، من اين بدي ذيه الزوان)

²⁸ فجاوبهم :(عدو فعل تيه الحركخ)

فقالوا له :(تشتي نسير نجمع الزوان؟)

²⁹ فجاوبهم :(ماشي ، علميد ما تقلعوش القمح وانتوا بتجمعوا الزوان ³⁰ خلو القمح ينمو مع الزوان ليوم الحصاد ، وبعدا شاقول للحاصدين يجمعوا الزوان اول شي ويحتزم علميد نحرقه ، والقمح يجمعوه لمخزني) ³¹ وادا لهم مثل ثاني ، قال :(يشبه ملكوت السماوات حبة من خردل شلها رجال وزرعها في جربته ³² هي أصغر الحبوب كلها ، ولكن لوما انزرعت كانت أكبر البقول ، ووقعت شجره حتى ان طيور السماء تجي وتعشعش في اغصانها) ³³ وقال لهم ذيه المثل :(يشبه ملكوت السماوات خميرة شلتها مره وطرحتها في ثلاثة أكيال من الدقيق لوما أختمر العجين كله)

³⁴ ذيه كله كان يقوله عيسى للناس بالأمثال ، وكان ما يحاكيهمش إلا بالأمثال ³⁵ فتم ما قال النبي :

(بالأمثال أنطق

وأعلن اللي كان مخفي من يوم نشأة العالم)

³⁶ وفلت عيسى الناس ودخل للبيت ، وجاء له طلابه وقالوا له :(فسر لنا مثل الزوان في الجربه)

³⁷ فجاوبهم :(اللي زرع زرع حالي هو ابن الانسان ³⁸ والجربه هو العالم ، والزرع الحالي هم أبناء الملكوت ، والزوان هم أبناء الشرير ³⁹ والعدو اللي زرع الزوان هو ابليس ، والحصاد هو نهاية العالم ، واللي بيحصدوا هم الملائكه

⁴⁰ وساع ما يجمع الزارع الزوان ويحرقه في النار ، كذيه يوقع في نهاية العالم ⁴¹ عيرسل ابن الانسان ملائكته ، وعيجمعوا من ملكوته كل المنافقين والأشرار ⁴² ويرموهم في أتون النار ، هاناك البكاء وصرير الأسنان ⁴³ وأما الصالحين ، عينوروا ساع الشمس في مملكة ابوهم ، اسمعوني يامن لكم آذان) ⁴⁴ ويشبه ملكوت السماوات ساع كنز مدفون في جربه ، ولقاه رجال ودسه ، ومن فرحته سار وباع كل ما معه واشترى تيك الجربه

⁴⁵ وتشبه مملكة السماء هي ساع تاجر يدور على لؤلؤ وأحجار كريمه ⁴⁶ ولقى لؤلؤة غاليه ، وسار باع كل ما يملك واشتراها ⁴⁷ ويشبه ملكوت السماوات شبكة رجمها الصيادين في البحر ، ولمت اسماك من كل نوع ⁴⁸ ولوما امتلت خرجها الصيادين للشاطئ ، وطرحوا السمك الحالي في سلاتهم ورجموا الشوعه ⁴⁹ وكذيه يوقع نهاية العالم ، تجي الملائكه ، ويفرقوا الأشرار من بين الصالحين ⁵⁰ ويرجموهم في أتون النار ، وهاناك البكاء وصرير الأسنان

⁵¹ وسأل عيسى طلابه :(فهمتوا ذيه كله؟)

فجاوبوا عليه :(ايوه)

⁵² فقال لهم :(لو انه كل من وقع من الفقهاء طالب في ملكوت السماوات ، يشبه رب بيت يخرج من كنزه كل جديد وقديم ⁵³ ولوما تم عيسى تيه الأمثال سار من هاناك ⁵⁴ ورجع لبلدته وجلس يعلم في مجامعهم ، واستغربوا منه وجلسوا يتساءلوا :(من اين له تيه الحكمه وتيه المعجزات؟) ⁵⁵ مش هو ابن النجار؟ امه اسمها مريم ، واخوته يعقوب ويوسف وسمعان ويهوذا؟ ⁵⁶ مش كل اخوته عندنا؟ من اين له كل ذيه؟ ⁵⁷ وما قبلوه

وقال لهم عيسى :(مابش كرامه لنبي في بلدته وبين أهله)

⁵⁸ وما فعلش هاناك معجزات خيرات ، لأنهم مش مؤمنين به