12

¹ وفي تيك الأيام مر عيسى في السبت وسط الجرب ، وجوعوا طلابه وجلسوا يقطفوا الذره وياكلوا ² ولوما ابسرهم الفريسيين قالوا لعيسى :(ابسر ، طلابك يفعلوا اللي ما يجوز في السبت)

³ فجاوبهم عيسى :(ما قريتوش ما عمل داود لوما جوع هو ورجاله؟) ⁴ كيف دخل بيت الله وأكلوا الخبز حق القربان ، وأكله ما يجوز لهم ، ولكن للكهنة وحدهم؟) ⁵ أو ما قريتمش في شريعة موسى أن الكهنة في السبت ينتهكوا حرمة السبت في الهيكل ومابش عليهم لوم؟ ⁶ اقول لكم :(هنيه من هو أعظم من الهيكل) ⁷ ولو فهمتوا معنى تيه الآيه :(اشتي رحمه مش ذبيحه)، انكم ما حكمتوش على من مابش عليه لوم ⁸ لأن ابن الانسان هو سيد السبت ⁹ ورحله من هاناك لبيت العباده اللي عندهم ¹⁰ وابسر رجال يده يابسه ، فسألوه علميد يتهموه :(يجوز الشفاء يوم السبت؟)

¹¹ فجاوبهم عيسى :(من منكم معه طلي واحد ونكع في غرقه يو السبت مش عيمسكه ويخرجه؟) ¹² والانسان كم هو أفضل من الطلي؟ علميد ذيه يجوز فعل الخير في السبت

¹³ وقال عيسى للرجال :(مد يدك !) فمدها الرجال ورجعت سليمه ساع اليد الثانيه ¹⁴ فخرجوا الفريسيين وتشاوروا علميد يقتلوا عيسى ¹⁵ ولوما درا عيسى رحله من هاناك ولحقه ناس خيرات ، وشفى كل مرضاهم ¹⁶ وامرهم انهم ما يحاكوش أحد عنه ¹⁷ علميد يوقع ساع ما قال النبي إشعياء

¹⁸ (ذيه هو عبدي اللي اخترته

حبيبي اللي رضيت به

شطرح روحي عليه

ويعلن للعالم إرادتي

¹⁹ ما يخاصمش ولا يصايح

وفي الشوارع محد يسمع صوته

²² وجوا بعض الناس لعيسى ومعاهم رجال أعمى وأعجم ، بينه شيطان ، فشفاه عيسى لوما تحاكا الرجال وابسر ²³ واستغربوا الناس كلهم وتساءلوا :(مش ذيه ابن داود او ماشي؟)

²⁴ وسمع الفريسيين كلامهم فقالوا :(هو يطرد الشياطين ببعلزبول رئيس الشياطين)

²⁵ ودرا عيسى بأفكارهم فقال لهم :(كل مملكه تنقسم على نفسها تخرب ، وكل قريه أو عائله تنقسم على نفسها ما تصمدش ²⁶ ولو كان الشيطان يطرد الشيطان عيكون انقسموا على بعض وكيف تثبت مملكتهم ²⁷ وإن كنت ببعلزبول أطرد الشياطين ، بمن يطرده اصحابكم؟ علميد ذيه هم يحكموا عليكم ²⁸ واما اذا كانت بروح الله اطرد الشياطين ، يعي ان ملكوت الله قد قام بينكم

²⁹ كيف يقدر الواحد انه يدخل بيت رجال قوي ويسرق حاجاته ، إلا لوما يربط الرجال القوي اول شي ، وبعدا يجلس ينهب بيته

³⁰ من ما يكونش معي فهو ضدي ، ومن ما يجمعش معي فهو يفرق ³¹ علميد ذيه اقول لكم :(كل ذنب وكفر يغتفر للناس ، ولكن الكفر بالروح القدس ما يغتفرش) ³² ومن قال كلمة على ابن الانسان يغتفر له ، ولكن من يقول كلمه على الروح القدس ما يغتفرش له ، لا في تيه الدنيا ولا في الآخره ³³ لو زرعتوا شجره طيبه يوقع محصولها طيب ، ولو زرعتوا شجره شوعه يوقع محصولها شوعه ، لأننا ندرا بالشجره من محصولها ³⁴ يا اولاد الثعابين ، كيف تستروا تقولوا كلام حالي وانتوا أوغاد؟ لأنه من صفاء القلب ينطق اللسان ³⁵ الاسنان الصالح من كنزه اصالح يخرج ماهو صالح ، والانسان الوغد من كنزه الشرير يخرج ماهو شر ³⁶ اقول لكم :(كل كلمة فارغه يقولها الناس عيتحاسبوا عليها يوم القيامه) ³⁷ لأنك بكلامك توقع بريئ وبكلامك تتهم ³⁸ وقال له بعض الفقهاء والفريسيين :(يا استاذ ، نشتي نبسر منك آية)

³⁹ فجاوبهم عيسى :(جيل وغد وفاسق يشتي آية !،ما عيوقع لكم إلا آية النبي يونس ⁴⁰ وساع ما بقي يونس ثلاثة أيام بلياليها في بطن الحوت ، ساعها عيبقى ابن الانسان ثلاثة أيام بلياليها في بطن الآرض ⁴¹ عيقوم أهل مدينة نينوي في يوم الدين مع ذيه الجيل ويحكموا عليه ، لأن أهل نينوي تابوا لوما نبههم يونس ، وهانا هم أعظم من يونس ⁴² وملكة الجنوب عتقوم يوم الحساب مع ذيه الجيل وتحكم عليه ، لأنها جت من طرف الأرض علميد تسمع حكمة سليمان ، وهانا الآن أ‘ظم من سليمان ⁴³ لوما يخرج الروح النجس من اي انسان يسير للصحراء يدور بعد الراحه ، وما يلاقيهاش ⁴⁴ ويرجع يقول :(شرجع لبيتي اللي خرجت منه ، وعيرجع ويبسر البيت فاضي ونظيف ومرتب) ⁴⁵ ويسير ويدي معه 7 ازواج ثانيه اكثر شر منه ، وتدخل الأرواح وتسكن هاناك ، وتوقع حالة ذيك الانسان الأخيره اخس من حالته الأوله ، وذيه نفسه يوقع مع ذيه الشعب الوغد ⁴⁶ ولوما كان عيسى يتحاكا مع الناس ، جت امه واخوته ووقفوا في خارج الدار يشتوا يحاكوه ⁴⁷ فقال له واحد من الموجودين :(امك واخوتك مسنبين خارج الدار يشتوا يحاكوك)

⁴⁸ فجاوبه عيسى :(من هي امي؟ ومن هم اخوتي؟) ⁴⁹ وأشر بيده لطلابه وقال :(هولا هم امي واخوتي) ⁵⁰ لأن من يفعل بمشيئة ابي اللي في السماء هو أخي وأختي وأمي)