11

¹ لوما تم عيسى وصاياه لطلابه ال12 ، خرج من هاناك علميد يعلم ويبشر في المدن القريبه

² وسمع يوحنا وهو في السجن بأعمال المسيح ، فرسل له بعض طلابه ³ علميد يقولوا له :(هو انت اللي يجي ، ولا نريع لواحد ثاني؟)

⁴ فجاوبهم عيسى :(ارجعوا وحاكوا يوحنا باللي تسمعوا وتبسروه) ⁵ العميان يبسروا ، والعرج يمشوا ، والجرب يطهروا ، والصنج يبسروا ، والموتى يقوموا ، والمساكين تجيلهم البشاره ⁶ ويهنا لمن ما يفقدش ايمانه بي

⁷ فلوما رجعوا طلاب يوحنا المعمدان ، تحاكا عيسى للناس عن يوحنا ، فقال :(ليش خرجتم للصحراء وايش ابسرتوا؟ مش ساق نبات تهزها ريح؟ لا) ⁸ طيب لوما خرجتوا ايش ابسرتوا؟ هل هو رجال لابس ملابس ضخمه؟ لاـ اللي يلبسوا الملابس الضخمه هم في قصور الملوك ⁹ حاكوني ، ايش خرجتوا وابسرتوا؟ أنبياء ؟ اقول لكم :(ايوه ، وافضل نبي) ¹⁰ هو اللي يقول فيه الكتاب

:(انا ارسل رسولي تجاهك ،

علميد يجهز الطريق قدامك)

¹¹ اقول لكم الصدق :(ما بدي في الناس اعظم من يوحنا المعمدان ، وكن أصغر اللي في ملكوت الله أعظم منه) ¹² ومن أيام يوحنا المعمدان لليوم والناس بيحاولوا يدخلوا في ملكوت الله ، والمجاهدين يدخلوها ¹³ وحين جاء يوحنا كان به هاناك نبوءات الأنبياء وشريعة موسى ¹⁴ فلو انتوا تشتوا تصدقوا ، وتعرفوا ان يوحنا هو إيليا المنتظر ¹⁵ من كان معه اذان يسمع

¹⁶ بمن اشبه أبناء ذيه الجيل؟ هم ساع اولاد جالسين في الشوارع يتصايحوا ¹⁸ جاء يوحنا ما ياكلش ولا يشرب ، فقالوا :(بينه شيطان) ¹⁹ وجاء ابن الانسان ياكل ويشرب فقالوا :(ذيه رجال اكول وسكير وصاحب لجباة الضرايب والمذنبين ، لكن الحكمه تبرزها أعمالهم ²⁰ وجلس عيسى يصيح على المدن اللي فعل بينها اكثر معجزاته وما تابوش أهلها ²¹ فقال :(ويلش يا كورزين ! ويلش ي بيت صيدا ! فلو كانت المعجزات اللي عملتها هاناك وقعت في صور وصيدا انهم تابوا أهلها من زمان ، ولبسوا الخيش وكوزروا على الرماد) ²² لكني اقول لكم :(عيوقع مصير صور وصيدا يوم الحساب أسهل من مصيركم) ²³ وانتي يا كفر ناحوم ! قصدش عترتفعي للسماء؟ ماشي عتنكعي في الهاويه ، فلو وقع في سدوم اللي وقع فيش من المعجزات ، كانت عتبقى ليوم الدين ²⁴ لكني اقول لكم :(عيكون مصير سدوم يوم الحساب أسهل من مصيرش) ²⁵ وتحاكا عيسى في ذيك الوقت فقال :(أحمدك ياأبي ، يا رب السماء والأرض ، لأنك رويت البسطاء اللي ما ابسروه الحكماء والفهماء) ²⁶ أيوه ي أبي ، تيه مشيئتك

²⁷ أبي ادا لي كل شي ، ماحد يعرف الأبن إلا الأب ، ولا أحد يعرف الأب إلا الابن ، ومن يشتي الابن ان يبدي له

²⁸ جو لعندي يا كل التاعبين واللي احمالهم ثقيله ، وانا عد اريحكم ²⁹ شلوا نيري وتعلموا مني عتلاقوا الراحه لنفوسكم ، لأني وديع ومتواضع القلب ³⁰ ونيري هين وحملي خفيف