15

¹ وجوا لعيسى شويه من الفريسيين والفقهاء من اورشليم وسألوه : ² (ليش بيخالف طلابك تقاليد الأولين ، وما بيغسلوش ايديهم قبل الأكل؟)

³ فجاوبهم عيسى :(وليش انتوا تخالفوا وصية الله علميد تقاليدكم؟) ⁴ قال الله :(أكرم اباك وأمك ، ومن يسب أبوه أو أمه لازم ينقتل) ⁵ وأما انتوا تقولوا :(من كان معه شي يساعد به ابوه وامه وقال لهم ذيه اقدمه لله) ⁶ وما يلزمه ان يكرم ابوه ، وكذيه ابطلتوا كلام الله علميد تقاليدكم ⁷ يا منافقين ، صدق إشعياء في نبوءته عنكم حين قال : ¹⁰ وبعدا صيح للناس يجوا وقال لهم :(اسمعوا وافهموا) ¹¹ اللي يدخل الفم ما ينجسش الانسان ، ولكن اللي يخرج من الفم هو اللي ينجس الانسان

¹² وقربوا منه الطلاب وقالوا له :(انت داري ان الفريسيين انصدموا لوما سمعوا ذيه الحكا؟)

¹³ فجاوبهم :(كل غرسه ما غرسهاش ابي سماوي تنقلع من جذورها) ¹⁴ فلتوهم هم عميان يقودوهم عميان ، ولوما الأعمى يقوده أعمى عينكعوا سوا في الغرقه

¹⁵ فقال له بطرس :(فسر لنا ذيه المثل)

¹⁶ فرد عليه :(هو أنتم للأن ما بتفهموش؟) ¹⁷ ماتعرفوش انه اللي يدخل فم الانسان ينزل لبطنه ، ومنه لخارج الجسم؟ ¹⁸ واما اللي يخرج من الفم ، فهو من القلب يخرج ، وهو ينجس الانسان ¹⁹ لأن من القلب تخرج الأفكار الشوعه : القتل والزنى والفسق والسرقه وشهادة الزور والنميمه ²⁰ وتيه اللي تنجس الانسان ، أما الأكل بيد مش هي مغسوله ما تنجس الانسان ²¹ وخرج عيسى من هاناك وسار لأطراف صور وصيدا ²² وجت له مره كنعانيه من تيك البلاد وصاحت :(ارحمني ياسيدي ، يا ابن داود ، بنتي بينها شيطان ، ويعذبها خيرات)

²³ وما جاوبهاش عيسى بكلمه ، فقربوا منه طلابه وترجوه وقالوا له :(ابعدها عننا لأنها بتلحقنا بصياحها)

²⁴ فجاوبهم عيسى :(ما رسلني الله إلا للأطلى الضايعه من بني اسرائيل)

²⁵ ولكن المره جت له وسجدت له وقالت :(ساعدني ياسيدي)

²⁶ فجاوبها عيسى :(ما يصلحش إننا نشل خبز الجهال ونرجمه للكلاب)

²⁷ فقالت له المره :(ايوه يا سيدي ، حتى الكلاب تاكل من الفتافت اللي تنكع من موائد اصحابها)

²⁸ فجاوبها عيسى :(ما أعظم إيمانك يامره ، وعيوقع ما تشتي) وشفيت بنتها من تيك الساعه ²⁹ وخرج عيسى من هاناك وسار لشاطئ بحر الجليل ، وطلع الجبل وجلس هاناك ³⁰ وجوه ناس خيرات ومعهم عرج وعميان وعجم وغيرهم كثير ، وطرحوهم عن ارجيله فشفاهم ³¹ واستغربوا الناس لوما ابسروا العجم بيتحاكوا والعرج والمقعدين بيمشوا والعميان يبسروا ، وسبحوا رب بني اسرائيل ³² وصيح عيسى لطلابه وقال لهم :(انا راحم لهولا الناس ، لأنهم من ثلاثة أيام بلا أكل ، ومابش معاهم ما ياكلوه ، وما شتيش ارجعهم جاوعين علميد ما يتعبوش في الطريق)

³³ فقالوا له الطلاب :(منين لنا في تيه الصحراء خبز يشبع مثل هولا الناس كلهم؟)

³⁴ فقال لهم عيسى :(كم خبز معاكم؟)

قالوا :(سبع حبات خبز وسمكات صغار)

³⁵ وأمر عيسى الناس يجلسوا على الأرض ³⁶ وشل الخبز والسمكات وشكر الله ، وكسرها وادا لطلابه والطلاب وزعوهن للناس ³⁷ وأكلو كلهم لوما شبعوا ، وبعدا رفعوا اللي بقي من الكسر حوالي سبع سفر ملان ³⁸ وكان اللي أكلوا اربعه الف رجال من غير النسوان والجهال ³⁹ وصرف عيسى الناس وركب القارب وجاء لمنطقة مجدان