¹ أما احنا حولنا سحابه كثيفه من الشهود ، وعلينا اننا ندرب مننا كل ثقل وكل ذنب عالق بنا ، ونجري بعزم في ساحة الجهاد الممدوده قدامنا ² لازم اننا نركز عيوننا على عيسى مصدر وهدف ايماننا ، فهو علميد الفرح اللي مراعي له تحمل الصليب وما همه عاره ، فجلس عن يمين عرش الله ³ فكرو في هاذا اللي تحمل هاذه العداوة من الأشرار ، علميد ما تفشلوش ولا تيأسو ⁴ انتو بتجاهدو ضد الذنب ، لكن للأن ما قاومتوش لدرجة تسكبو الدم ⁵ وشكلكم نسيتو الكلام اللي يحاكيكم ساع الجهال (لا تحتقروش يا ابني تأديب الرب ولا تيأسش إذا صيح فوقك ⁶ لأن من يحبه الرب يأدبه ويجلد كل ابن له) ⁷ فتحملو التأديب والله بيعاملكم ساع البنين ، هل به هاناك ابن ما بيأدبش ابوه؟ ⁸ فلو مابش نصيب لكم في هاذه التأديب وهو من نصيب كل العيال ، فأنتو من عيال الزنى ⁹ كان لنا اباء بيشربو يأدبونا وكنا نحترمهم ، يعني لازم ان نخضع أكثر للأب الروحي ، علميد توقع لنا الحياة ¹⁰ وهولا الأباء ادبونا ايام قليلة وهاذا ساع ما يستحسنو ، أما الله بيأدبنا لخيرنا ، علميد نوقع كاملين ساعه ¹¹ ومن الطبيعي ان كل تأديب في وقته يوقع موجع ومشهو حالي ، لكنه بعد هاذا يدي سلام وصلاح في الي تعلمو منه ¹² فشدو ايديكم الراخيه وركبكم الضعيفة ¹³ وافعلو طرق مستقيمة لأرجلكم علميد ما ينكعش التعبان عاده زد يتقوى ¹⁴ حاولو توقعو في سلام مع كل الناس ، وعيشو حياة القداسه اللي من غيرها محد عيبسر الرب ¹⁵ واوبهو علميد محد يخسر نعمة الله ، وعلميد ما تنبتش بينكم المراره فتضبح بكم وتخرب خيرات منكم ¹⁶ لا يكنش به زاني بينكم ، او سفيه ساع عيسو اللي باع بكوريته بأكله واحده ¹⁷ انتو دارين انه لاما كان يشتي انه يورث البركه خاب ومالقيش مجال للتوبه ، مع انه طلبها وهو بيبكي ¹⁸ انتو ما قربتوش من جبل ملموس بنار ملتهبه وظلام وضباب وزوبعه ¹⁹ وصوت بوق وصياح حتى ان اللي سمعوه كان يشتوه يوقف ²⁰ لأنهم ما تحملوش هاذا الانذار :(حتى البهيمة لو لمست الجبل عترتجم بالحجارة) ²¹ وكان المنظر رهيب حتى ان موسى قال :(انا بين ارتعش الخوف) ²² وزد انتو قربتو من جبل صهيون ، من مدينة الله الحي من اورشليم السماوية ، وآلاف الملايكة في حفلة عيد ²³ من محفل الأبكار المكتوبة اسماءهم في السماوات ، من الله ديان البشر كلهم ، من ارواح الأبرار اللي وصلو للكمال ²⁴ وإلى عيسى وسط العهد الجديد ، وللدم المرشوش اللي بيتحاكا برسالة أحسن من رساة دم هابيل ²⁵ اوبهو ان لا ترفضوش اللي بيتحاكا ، فلو كان اللي رفضو المتحاكي بكلام الوحي في الأرض ما نجوش من العقاب ، فكيف عننجي احنا يعني ، لو رفضنا المتحاكي من السماء؟ ²⁶ وهو اللي زعزع صوته الأرض في ذيك الوقت ، ولكنه ذلحينه وعدنا وقال :(عد ازلزل السماء ، مش الأرض وحدها ، مرة ثانية) ²⁷ ولاما قال (مرة ثانية) دليل على ان الأشياء المخلوقة عتتزعزع وتتحول علميد تبقى الاشياء اللي ما تزعزعتش ²⁸ لازم نوقع شاكرين لأننا حصلنا على ملكوت ما يتزعزعش ، وبالشكر نعبد الله عبادة خشوع وتقوى يرضى عنها ²⁹ لأن إلهنا هو نار آكله