¹ الايمان هو ان نثق اللي نترجاه وتصديق اللي مانبسرش ² وقد رضى الله عن أجدادنا لإيمانهم ³ بالايمان نعرف ان الله خلق الكون بكلمه منه ، فوقع اللي بنبسره واللي مانبسره ⁴ بالايمان قدم هابيل ذبيحه لله احسن من اللي قدمها قابيل ، وبسبب ايمانه رضي الله عن قرابينه وشهد له انه صالح وبايمانه عاده بيتحاكا مع انه مات ⁵ بالايمان رفع الله اخنون بغير ما يبسر الموت ، وما لقاه احد لأن الله رفعه صليه ، وقبل ما يرفعه شهد له انه ارضى الله ⁶ وبغير ايمان مستحيل ارضاء الله ، لأن اللي بيتقرب لله لازم انه يؤمن بأنه موجود وانه يجازي اللي بيطلبوه ⁷ بالايمان اتوعظ نوح وبنى سفينه علميد ينجو اهل بيته لوما حذره الله باللي عيوقع من حاجات مش هو داري بها ، وهاكذا حكم على العالم وورث البر ثمرة للايمان ⁸ الايمان ابراهيم لوما دعاه الله انه يخرج للأرض اللي كانت عتوقع له نصيب ، أطاع وخرج وهو مش هو داري صلين هو ساير ⁹ وبالايمان نزل في أرض الميعاد كأنه في أرض غريبه ، وسكن في الخيام مع اسحق ويعقوب شركاءه في الوعد نفسه ¹⁰ لأن ابراهيم كان مريع للمدينه الثابته ، اللي الله مهندسها وبانيها ¹¹ بالايمان استرت ساره انها تحبل مع انها عاقر وعجوز ، لأنها اعتبرت ان اللي وعد أمين ¹² وولدت شعب ساع نجوم السماء في كثرتهم ، وساع الرمل اللي على شاطئ البحر محد يستر يعدهم ، وكل هاذا من رجال واحد قارب انه يموت ¹³ وفي الايمان مات هولا كلهم من غير ما يوقع هم ما وعد الله به ، لكنهم ابسروه وحيوه من بعيد ، واعترفو انهم غرباء وضيوف في هاذه الأرض ¹⁴ واللي يقولو هاذا الكلام بيثبتو انهم بيطلبو وطن ¹⁵ ولو كان ذكر الوطن اللي خرجو منه ، كان لهم فرصة ليرجعو له ¹⁶ لكن كانو مشتاقين لوطن احسن ، وطن سمائي ، علميد هاذه ما يستحيش الله انه يكون الههم ، فصلح لهم مدينة ¹⁷ وبالايمان ابراهيم لوما اختبره الله قدم اسحاق ابنه ذبيحه ، فاللي وقع له الوعد كان عيذبح ابنه الوحيد ¹⁸ مع ان الله كان قد قال له :(عن طريق اسحاق عيجي نسلك اللي يشل اسمك) ¹⁹ واتوكل ابراهيم على الله انه قادر يقيم الموتى ، وبطريقه رمزيه رجع له ابنه من الموت ²⁰ وبالايمان اسحاق بارك يعقوب وعيسو بحاجات تخص المستقبل ²¹ بالايمان يعقوب قبل ما يموت بارك من عيال يوسف ، وكان مستند على طرف عصاه ²² بالايمان يوسف لوما كان عيموت ، اتحاكا عن خروج بني اسرائيل من مصر ، ووصى انهم يشلو عظامه معاهم ²³ بالايمان خبو والدين موسى ابنهم ثلاثه اشهر بعد ولادته ، لأنهم ابسرو ان الطفل جميل ، وما خافوش من امر الملك ²⁴ بالايمان موسى لوما كبر مارضيش ان يعتبره الناس ابن بنت فرعون ²⁵ وحب انه يتحمل الذل مع شعب الله ، ولا انه يتهنى بالذنوب والحياة اللي ماتدوم ²⁶ واعتبر عار المسيح اغنى من كنوز مصر ، لأنه كان مريع للمكافأة الأبدية ²⁷ بالايمان فلت موسى مصر من غير ما يخاف من زعل الملك ، وجلس على ماهو في عزمه كأنه يبسر اللي ماتبسره العين ²⁸ بالايمان فعل الفصح ، ورش الدم على الأبواب ، وما عس ملاك الموت أي واحد من ابكار بني اسرائيل ²⁹ بالايمان خطيو بني اسرائيل في البحر الأحمر كأنه أرض يابسه ، ولاما حاولو المصريين انه يخطوه غرقو ³⁰ بالايمان نكعت أسوار آريحا بعدما طاف الشعب عليها سبعه أيام ³¹ بالايمان نجيت راحاب العاهرة من الهلاك مع العصاة ، لأنها رحبت باجاسوسين ³² وايش زد اقول كمان؟ الوقت ما عيكفيش لو تحاكيت عن جدعون وباراق وشمشون ويفتاح وداؤد وصموئيل والأنبياء ³³ لأنهم بالايمان قهرو الممالك ، واقامو العدل ووقع لهم اللي وعد به الله وغلقو اللقاف الأسود ³⁴ وطفو لهيب النيران ونجيو من حد السيف وتغلبو على الضعف ووقعو أبطال في الحرب وهزمو جيوش الغريبين ³⁵ واسترجعين بعض نساونهم اللي كانو قد ماتو ولكن رجعو للحياة ، وبعضهم تحملو التعذيب لاما ماتو ، وما رضيوش للنجاة علميد يقومو لحياة احسن ³⁶ وغيرهم جلسو يستهزؤ بهم ويجلدوهم ، وزد القيود والحبس ³⁷ ورجمو ونشرو وقتلو بحد السيف واتشردو لابسين جلود الغنم والتيوس ، محرومين ومقهورين ومظلومين ³⁸ وما كنش هاذا العالم يستاهلهم ، فكانو مطرودين في الصحراء والجبال والمغارات وكهوف الأرض ³⁹ كل هولا رضي الله عليهم علميد ايمانهم ، لكنهم ما وقعلهمش على ما وعدهم به ⁴⁰ لأن الله دبر لنا حاجة أحسن ، وهو ان يوقع لهم الكمال معنا احنا