¹ وشريعة موسى هي غير ظل للبركات الجديدة ، وهي مش هي الحقيقة نفسها ، وبحسب الشريعة بتقدم الضحايا واصل سنه بعد سنه ، ولكن الشريعة ما تسترش انها تخلي اللي يتقربو بها لله كاملين ² لأنه لو كان هاذه عيسبر كان عيوقفو تقريبها ، لأن اللي بيقربوها يكونو قدهم طاهرين قوي ، وبهاذه ما يحسوش بذنب ³ لكن الصدق هي ان هاذه الضحايا بتذكر الناس بذنوبهم سنه بعد سنه ⁴ لأن دم العجول والتيوس ما يسترش ان يمسح الذنوب ⁵ ولذيه قال المسيح لله عند دخوله للعالم ما اشتيش ذبيحه ولا قربان ولكن جهزت لي جسم ⁶ ومش بالمحرقات فرحت ولا بالذبايح كفارة للخطايا ⁷ فقلت هوذا انا اجي يا الله علميد افعل بمشيئتك ساع ما مكتوب عني في صفحة الكتاب ⁸ فهو قال اول شي :(ما اشتيش ذبايح وقرابين ومحروقات وذبايح كفارة للذنوب ولا فرحت بهن) مع ان تقريبها بيتم حسب الشريعة ⁹ وبعدا قال :( هوذا انا اجي علميد اعمل بمشيئتك) وأبطل الترتيب الأول علميد يقيم الثاني ¹⁰ واحنا بفضل تيك الارادة تقدسنا بجسم عيسى المسيح اللي قدمه قربان مرة واحدة ¹¹ ويسنب الكاهن اليهودي كل يوم ويقوم بالخدمة ويقدم الذبايح نفسها مرات خيرات ، وهي ما تسترش انها تمسح ذنوب ¹² وأما المسيح بيقدم للأبد ذبيحة واحدة كفارة للذنوب ، وبعدا جلس على يمين الله ¹³ وهو ذلحينه مريع ان يخلي الله اعداءه تحت ارجله ¹⁴ وبتيه الضحية الواحدة يخلي كل اللي خصصهم له كاملين للأبد ¹⁵ والروح القدس والكل يشهد بهاذه وأول شي بيقول: ¹⁶ (هاذه هو العهد اللي اعلمهم إياه في الأيام الجايه يقول الرب: عد اخلي شرايعي في قلوبهم وأكتبها في عقولهم ¹⁷ وبعدا يقول : واذكرهم بذنوبهم وآثامهم من بعد) ¹⁸ واين ما يوقع السماح عن هاذه كله ، ما تبقاش حاجه لقربان علميد الخطيه ¹⁹ واحنا يا خبره نستر ندخل بثقه للمقدس الحقيقي السماوي بدم المسيح ²⁰ وهاذه بواسطة الطريق الجديد الحي اللي فتحه لنا من الستارة ، يعني جسمه البشري ²¹ ولنا والكل كاهن عظيم على بيت الله ²² ولازم نقرب بقلب صادق وقلوبنا مطهرة من سوء النية واجسامنا مغسوله بماء طاهر ²³ ولازم اننا نواصل في اعلان رجائنا بغير ما نتردد ، لأن الله أمين بينفذ ما وعد به ²⁴ ولازم اننا نهتم ببعضنا ، ونتعاون في المحبة والعمل الصالح ²⁵ ولا تنقطعوش عن الاجتماع ساع ما تعود بعضكم انه يفعل ، ود شجعو بعضكم ، خاصه وانتو تبسرو ان يوم ربنا قد قرب ²⁶ لو كنا بعد ما عرفنا الحق بنفعل الذنوب بقصد ، فمابش ضحية تكفر لذنوبنا ²⁷ ولكن نريع بفجيعه ليوم الحساب ولهيب النار اللي عتاكل أعداء الله ²⁸ من عيخالف شريعة موسى ، كان بيقتل بدون رحمه إذا شهدو عليه 2 او 3 ²⁹ يعني في رأيكم كم عيكون العقاب اشد لمن هو داس ابن الله تحت رجله ، واستهان بدم العهد اللي طهرنا به ، وسب الروح اللي بيدي النعمه؟ ³⁰ واحنا دارين من اللي قال :(انا انتقم ، وانا اللي اجازي) وقال كمان :(ربنا عيحاكم شعبه) ³¹ فيا ويله من عيوقع في يد الله الحي ³² اتذكرو الأيام الأوله وكم جاهدتو وتحملتو من الأوجاع بعدما اشرق عليكم النور ³³ من جهه تعرضتو للسب والملاحقة ، ومن جهه ثانيه كنتو شركاء للي تعاملو ساع هاذه العمل ³⁴ وشاركتو المحاحبيس في اوجاعهم وصبرتو فارحين في نهب مالكم ، دارين ان لكم مال أفضل ما يزولش ³⁵ لا تضيعوش ثقتكم ، لأن لها جزاء كبير ³⁶ وانتو بحاجة للصبر علميد تفعلو ارادة الله ، ويوقع لكم ما وعدكم به ³⁷ (بعد فترة قليلة قوي عيجي اللي تريع له وما يتأخرش ³⁸ البار عندي بالايمان يعيش واذا ارتد ما ارضاش به) ³⁹ ومش احنا من أهل الرده الهالكين ، ولكن من أهل الايمان الناجين