¹ والعهد الأول كان له فرايض للعبادة ، وبقعه مقدسة في هاذه الأرض ² وقد وقعت خيمة الجزء الأول منها يسموه المقدس وبينه المنارة والمايده وخبز القربان ³ وبعدا قفى الستارة الثانيه الجزء اللي يسموه المقدس الداخلي ⁴ وبينه المبخرة الذهبية وصندوق العهد وكله مغطى بالذهب ، وداخله جره وبينها المن وهي من ذهب ، وعصى هارون اللي طلع بينها اوراق ، ولوحين من حجر عليهن وصايا العهد ⁵ وفوق الصندوق الملكين المقربين ، يعبرو عن جلال الله ، وجناحاتهم بتظلل الغطاء ، ومابش مجال ذلحينه علميد نتحاكا عن هاذا كله بالتفاصيل ⁶ وكل شي كان على هاذه الترتيب ، ويدخلو الكهنة للمسكن الأول في كل وقت ويفعلو شعاير العباده ⁷ ولكن رئيس الكهنة لوحده يدخل للجزء الثاني مره في السنه ، ومايدخلش إلا ومعه الدم اللي عيقدمه كفارة لذنوبه وللذنوب اللي فعلها الشعب من جهل منهم ⁸ وبهاذه يشتي الروح القدس انه يبين مادام الخيمه الأرضية موجودة يعني الطريق للمقدس السماوي مش مفتوح ⁹ وهاذه يأشر للوقت الحاضر ، والقرابين والضحايا اللي بيقدموها ماتسترش انها تنقي ضمير من بيقدمها ¹⁰ لأنها بس فرايض خارجية على الأكل والشرب والوضوء بس ، وعلميد هاذه يفعل بها لوما يجي وقت النظام الجديد ¹¹ وأما المسيح جاء على اساس انه الكاهن الأعلى علميد خدمة البركة الجديدة ، ودخل لخيمة أعظم وافضل ، ماصنعوهاش الناس ومش هي من هاذه الدنيا ¹² وهو دخل المقدس الداخلي الحقيقي مرة واحدة ، وشل معه مش دم تيوس وعجول ، ولكن دمه هو ، وبهاذه حقق لنا الفداء الأبدي ¹³ ولو كان دم التيوس والثيران ورماد العجول يقدس النجسين ويطهر جسمهم ¹⁴ فالأولى دم المسيح اللي قدم نفسه لله بالروح الأبدي قربان مابش فيه عيب انه ينظف ضمايرنا من الأعمال الميتة علميد نعبد الله الحي ¹⁵ ولذيه هو الوسيط لعهد جديد يوقع فيه للمدعوين الميراث الأبدي ، لأنه مات كفارة للمعاصي اللي فعلها الشعب في أيام العهد الأول ¹⁶ وبقعة ما تكون الوصية لازم إثبات موت الموصي ¹⁷ لأن الوصية محد يفعل بها إلا بعد موت الموصي ، ومابش لها قيمة مادام الموصي حي ¹⁸ ولذيه حتى العهد الأول عمل بواسطة الدم ¹⁹ لأن موسى بعدما حاكا الشعب بكل وصايا التوراه ، شل دم عجول وتيوس ومعه شويه ماء ورشه على الكتاب نفسه وعلى كل الشعب بواسطة صوف احمر وحزمه من السعتر ²⁰ وقال :(هاذا هو دم العهد اللي وصاكم الله تحفظوه) ²¹ وبنفس الطريقه رش الدم على الخيمه وكل أدوات العباده ²² لأن التوراة توصي بأن يتطهر كل شي تقريباً بالدم ، ومابش مغفرة بدون الدم ²³ فلو هو ساع هاذه الحاجات السماوية لازم انها تطهر بتيه الشعاير ، يعني الحاجات السماوية بنفسها يشتي لها تطهير بذبايح احسن من تيك ²⁴ لأن المسيح مادخلش قدس فعلته يد البشر هو صورة للحقيقي ، لكن دخل السماء بنفسها علميد يبدي ذلحينه في محضر الله علميدنا ²⁵ مش هو علميد عيقدم نفسه مرات خيرات ساع ما يدخل رئيس الكهنة لقدس الأقداس كل سنه بدم مشو دمه ²⁶ وإلا كان عليه إنه يتوجع خيرات من يوم انشاء العالم ، ولكنه بدي مره واحده وقت إكتمال الأوقات علميد يبعد الذنوب بتقديم نفسه ذبيحة لله ²⁷ وساع ما يموت البشر مرة واحده ، وبعد هاذه ليوم الدين ²⁸ وهاكذا قدم المسيح نفسه ضحية مرة واحده علميد يبعد ذنوب خيرات ، وعيجي مرة ثانية ، مش علميد يبعد ذنوب ، ولكن علميد ينجي اللي مريعين له