¹ واصلو على المحبة الأخوية ² ولا تنسوش الضيافة ، لأن بها ضيف بعضكم الملايكه وهم مش دارين ³ اتذكرو المحابيس كأنكم محابيس معهم ، واتذكرو المتعذبين كأنكم انتو بنفسكم بتتعذبو في الجسم ⁴ لازم يوقع الروح مكرم عند الكل ، والعلاقة الزوجية طاهرة ، لأن الله بيعاقب الفاسقين والزناة ⁵ لازم توقع سيرتكم من غير محبة الزلط واقتنعو باللي عندكم لأن الله قال : (لا اهملك ولا افلتك) ⁶ ونستر اننا نقول بثقة :(الله معينني ، فمشنا خايف ، وايش عيستر الانسان انه يفعل بي؟) ⁷ اتذكرو المرشدين حقكم اللي حاكوكم بكلام الله ، وابسرو نتيجة حياتهم واقتدو بايمانهم ⁸ عيسى المسيح هو نفسه الأمس واليوم وللأبد ⁹ لاتسيروش للضلال بتعاليم متنوعه غربية ، ومن الخير ان قلوبكم تتقوى بالنعمه ، مش بالأكل اللي ما ينفعش منها للي ياكلوها ¹⁰ معانا مذبح لتقديم القربان وما يحقش للي بيخدمو خيمة العهد انهم ياكلو منه ¹¹ لأن الحيوانات اللي بيدخل رئيس الكهنة بدمها لقدس الأقداس كفارة للذنوب تاكل النار اجسامها في خارج الخيمة ¹² وعلميد هاذا مات عيسى خارج باب المدينة ليقدس الشعب بدمه ¹³ جو نخرج صليه خارج المخيم ، ونشل العار معه ¹⁴ لأنه مابش لنا هانا في هاذه الدنيا مدينه باقية ، ولكننا نسعى لمدينة المستقبل ¹⁵ فلنقدم لله بواسطة عيسى ذبيحة الحمد في كل وقت ، ثمرة شفاه تسبح بأسمه ¹⁶ لاتنسوش فعل الخير والمشاركة في كل شي فمثل هاذه الذبايح ترضي الله ¹⁷ طيعو المرشدين حقكم واخضعو لهم ، لأنهم بيسهرو على نفوسكم كأن الله يحاسبهم عليها ، ويعملو عملهم بفرح مش بحسرة يوقع لكم فيها خسارة ¹⁸ صلو علميدنا ، فاحنا واثقين لسلامة ضميرنا ، ونشتي ان نحيا حياة شريفة بكل وسيله ¹⁹ وكمان ارجوكم ان تصلو علميدي علميد ارجع لكم بسرعة ²⁰ الله هو اللي يدي السلام بواسطة دم العهد الأبدي ، اقام من الموت سيدنا عيسى راعي الأطلى العظيم ²¹ اسأله ان يأهلكم بكل ما هو صالح علميد تفعلو مشيئته ، وأن يعمل فينا ما يرضية بواسطة عيسى المسيح ، اللي له الجلال لأبد الأبدين .. آمين ²² يا منعاه يا أخوتي اتحملو كلمات التشجيع هاذه بصبر ، أنا كتبت لكم رسالة مختصرة ²³ ادرو ان اخونا تيموتاوس خرجوه من الحبس ، فلو جا بسرعه عد اجي معه علميد ابسركم ²⁴ سلمو على كل قادتكم وعلى كل المؤمنين ، يسلم عليكم الإخوة اللي من إيطاليا ²⁵ النعمة معكم كلكم