24

¹ وبعد خمسه أيام نزل رئيس الكهنة حنانيا إلى قيصريه ومعه بعض المشايخ ومحامي اسمه ترتلس ، واشتكوا على بولس للحاكم ² ولوما دعاه الحاكم ، جلس ترتلس يتهمه ويقول :(ياصاحب العزه فيلكس : يرجع الفضل في السلام اللي ننعم به عليك ، وان الاصلاح اللي تم لخير تيه البلاد من حسن تدبيرك ³ واحنا متقبلين ذيه كله بالشكر في كل ساع وفي كل بقعه ⁴ وعسب ما اطولش عليك الكلام ، ولكن اسمعنا بلطفك

⁵ ابسرنا ذيه الرجال بيسبب المشاكل ويفعل الفتن بين اليهود في بقعه في العالم ، وهو زعيم طائفة النصارى ⁶ وبعدا حاول انه ينجس الهيكل ، وقبضنا عليه وكنا نشتي نحاكمه على شريعتنا ⁷ فجا القايد ليسياس واستخدم معانا العنف وشله من بين ايدينا ⁸ وحاكا خصومه انهم يرفعوا شكواهم لاعندك ، فلوما تستجوبه انت بنفسك عتبسر ان شكوتنا عليه صحيحه)

⁹ ووافقوا باقي اليهود دعوى ترتلس وقالوا انها صحيحه ¹⁰ وبعدا أشر الحاكم لبولس يقله يتحاكا ، فقال :(انا داري انك بتحكم تيه البلاد من زمان ، وعسب ذيه شدافع عن نفسي وانا مرتاح ¹¹ عتستر تعرف اننا سرت إلى اورشليم للعباده قبل 12 يوم ¹² وما لقونيش خصومي اتكارح مع أي حد في بيت الله أو افعل شغب وفتنه لا في بيت العباده ولا في أي مكان ثاني ¹³ ومايستروش يثبتوا لك الشكوى اللي قدموها ضدي ذلحينه ¹⁴ ولكن انا أشهد اني اعبد إله ابائنا على المذهب اللي يقولوا عليه انه بدعه ، ومؤمن بكل مافي التوراه وكتب الأنبياء ¹⁵ وانا ارجوا الله ساعهم ، وهو قيام الموتى من الصالحين والآشرار ¹⁶ عسب ذيه افعل ما بجهدي عسب اوقع سليم النيه امام الله والناس

¹⁷ وجيت بعد غياب سنوات من اورشليم ، ومعي بعض التبرعات لشعبي ، وأقدم القرابين ¹⁸ وحين قيوني أعمل ذيه في بيت العباده ، كنت قد تطهرت وماكنش معي جمهور ، ولا فعلت أي فوضى ¹⁹ وكان عليهم ان يجوا صليك ويتهموني ، لو كان لهم حق عسب يشكوني به ²⁰ والحاضرين اللي هانا حليهم يقولوا أيش الجريمه حقي حين وقفت في المجلس ²¹ إلا تيه الكلمه اللي قلتها وانا بينهم : انتوا تحاكموني وانا اؤمن بقيامة الأموات) ²² وكان فيلكس عنده خبره في مذهب عيسى ، ورفع الجلسه وقال لوما يجي القايد ليسياس هانا شحكم في قضيتك ²³ وامر واحد من الضباط انه يحرس بولس ، ويكون له شويه حريه ، ويسمحوا لأصحابه انهم يزوروه ويخدموه

²⁴ وبعد أيام جاء فيلكس ومعه مرته دروسلا وهي يهودية ، وصيح لبولس وجلس يستمع لكلامه على الايمان بالمسيح ²⁵ ولوما تحاكا بولس عن الصلاح والعفه ويوم الدين ، افتجع فيلكس وقال له :(سير ذلحينه ومتى ما لقيت فرصه عد اداعيك مره ثانيه) ²⁶ وكان فيلكس يشتي بولس يديله رشوه ، عسب هذا كان واصل يداعي له

²⁷ وبعد سنتين جاء حاكم ثاني مكان فيلكس اسمه بركيوس فستوس ، وكان فيلكس يشتي يرضي اليهود فطرح بولس في السجن