23

¹ وابسر بولس للمجلس وقال : يا اخوه ، عشت بضمير لله إلى ذيه اليوم ² فقال حنانيا رئيس الكهنة لخدامه انهم يضربوا بولس على فمه ³ فقال بولس : ضربك الله يا الجدار المبيض ، كيف تجلس هانا عسب تحاكمني بالشريعة ، وبعدا تخالف الشريعه وتقلهم يضربوني؟

⁴ فقال الموجودين لبولس : انت بتسب رئيس كهنة الله؟

⁵ فقال بولس : ماكنتش داري يا اخوه انه رئيس الكهنة ، لأن الكتاب المقدس يقول : لاتلعنش رئيس شعبك

⁶ وكان بولس داري ان بعضهم صدوقيين وبعضهم فريسيين ، رجع صاح في المجلس : يا اخوه ، انا فريسي ابن فريسي ، وانا بتحاكم الأن عسبة اني عندي رجاء ان الموتى عيقوموا ⁷ وحين قال ذيه الحكا ، وقعت مشاكل بين الفريسيين والصدوقيين ، واتقسم المجلس ⁸ لأن الصدوقيين ما يؤمنوش بقيامة الموتى وبوجود الملائكه والأرواح ، واما الفريسيين مؤمنين بذيه كله

⁹ وزاد الصياح ، وقام بعض الفقهاء من الفريسيين وجلسوا يحتجوا قوي وقالوا : احنا مابنبسرش اي ذنب على ذيه الرجال ، يمكن حاكاه روح أو ملاك ¹⁰ وزادت المشاكل لوما افتجع القايد انهم عيقتلوا بولس ، وقال لعساكره انهم ينزلوا صليه ويشلوه للقلعه

¹¹ وفي الليل جا المسيح ووقف شق بولس وقال له : اطمن لازم تشهد لي في روما ساع ما شهدت لي في اورشليم ¹² ولوما طلع الصبح اتفقوا اليهود وحلفوا انهم ما ياكلوش ولا يشربوا إلا لوما يقتلوا بولس ¹³ وكانوا عددهم اكثر من 40 رجال ¹⁴ فجوا لاعند ؤرساء الكهنة والشيوخ وقالوا :(احنا حلفنا يمين ما ناكلش ولا نشرب إلا لوما نقتل بولس ¹⁵ اتوا اطلبوا من اعضاء المجلس وقايد الكتيبه انهم يدو بولس هانا عسب انكم تشتوا تفعلوا تحقيق في قضيته ، واحنا عنكون جاهزين عسب نقتله قبل مايوصل للمجلس)

¹⁶ وسمع ابن اخت بولس بالكمين ، وسار للقلعه ودخل عند بولس وحاكاه بالخبر

¹⁷ وصيح بولس لواحد من الضباط وقال له :(شل ذيه الشاب للقايد لأن معه خبر يشتي يحاكيه به) ¹⁸ وشله الضابط للقايد وقال :(صيح لي المسجون بولس وقال اشل ذيه الشاب لاعندك ، عسب معه مجبر يشتي يحاكيك به)

¹⁹ فمسك القايد بيده وانفرد به على جنب وسأله :(ايش عندك؟ حاكيني)

²⁰ فقال :(اتفق اليهود على انهم يطلبوا منك تنزل بولس غدوه للمجلس بحجة انهم يشتوا يحققوا في موضوعه ²¹ فلا تصدقهمش ، لأن به اكثر من اربعين واحد منهم فعلوا له كمين وحلفوا ما ياكلوش ولا يشربوا إلا لوما يقتلوه ، وهم جاهزين ومريعين ايحين عتسمع لهم)

²² فقال القايد للشاب :(لاتقلش لحد إنك حاكيتني بذيه الخبر) وخلاه يرحله من عنده ²³ وبعدا داعا القايد لأثنين من ضباطه وقال لهم :(جهزوا ميتين عسكري وسبعين فارس وميتين مسلح بالرماح عسبب يسيروا إلى قيصريه من الليل الساعه تسعه مساء ²⁴ وجهزوا لبولس حصان يحمله سالم للحاكم فيلكس)

²⁵ وكتب للحاكم برساله يقول فيها : ²⁶ (من كلوديوس ليسياس إلى صاحب العزه فيلكس ، سلام : ²⁷ مسكوا اليهود ذيه الرجال وكانوا يشتوا يقتلوه ، فلوما عرفت انه روماني اسرعت به مع عساكري ²⁸ وكنت اشتي اعرف ايش تهمته ، وجيت به لمجلسهم ²⁹ وتوضح لي انهم يتهموه بحاجات تخص شريعتهم وان مابش شي من التهم تستاهل الموت أو الحبس ³⁰ وبعدا سمعت انهم فعلوا خطه لأغتياله ، فرسلته لك على طول ، وحاكيت خصومه ان يقدموا لك دعاويهم عليه)

³¹ وقام العساكر ونفذوا اوامر القايد ، وشلوا بولس في الليل إلى أنتيباترس ³² وفي اليوم الثاني رجعوا للقلعه وفلتوا الفرسان يواصلوا السفر معه ³³ فلوما وصلوا الفرسان إلى قيصريه ، دخلوا بولس على الحاكم وسلموا له الرساله ³⁴ فقراها وسأل بولس عن الولايه اللي هو منها ، ولوما عرف انه من كيليكية ³⁵ قال له :(شسمع منك لوما يجوا خصومك) وقال لعسكره انهم يوبهوا لبولس في قصر هيرودس