25

¹ وحين وصل فستوس بعد ثلاثه أيام للولايه ، طلع من قيصرية إلى اورشليم ² فجوا صليه رؤساء الكهنة وقادة اليهود ، واشتكوا له من بولس ³ وكانوا يشتوا منه انه يرضيهم ويرسل بولس إلى اورشليم ، لأنهم قد جهزوا له خطه عسب يقتلوه في الطريق ⁴ فجاوبهم فستوس ان بولس عيبقى محبوس في قيصرية ، وهو عيرجع لها من بعد ⁵ وقال :(عينزل معي قادتكم إلى قيصريه ، ويقدموا شكواهم لو كان ذيه الرجال متهم)

⁶ وجلس فستوس عندهم ثمانيه أو عشره أيام ، وبعدا نزل إلى قيصرية ، وفي اليوم الثاني جلس على منصة القضاء وقلهم يدوا بولس قدامه ⁷ ولوما وصل بولس حوشوا عليه اليهود اللي جو من اورشليم ، وقدموا شكاوي خيرات عليه وما استروش انهم يثبتوها

⁸ فدافع بولس على نفسه قال :(ما فعلت ايش حاجه ضد عقيدة اليهود ولا ضد بيت الله ولا ضد قيصر)

⁹ وكان يشتي فستوس ان يرضي اليهود ، فقال لبوس :(انت مستعد عسب تسير إلى اورشليم ، وتوقع محاكمتك في تيه الشكاوي هاناك؟)

¹⁰ فجاوب بولس :(انا ذلحينه واقف في محكمت قيصر حيث ما اتحاكم ، انا ما غلطتش على اليهود في شي ، وانت داري بذيه الشي ¹¹ ولو ثبت اني غلطان في شي يستاهل الموت ما كنتش عد اهرب من الموت ، واذا كان اللي بيتهموني به باطل ما يحقش لحد يسلمني لهم ، وانا رافع قضيتي للقيصر)

¹² وتشاور فستوس مع مساعديه وبعدا قال :(رفعت للقيصر قضيتك ، وللقيصر تسير) ¹³ وبعد أيام ، جا الملك أغريباس وبرنيكه إلى قيصرية عسب يسلموا على فستوس ¹⁴ وجلسوا هاناك أيام خيرات ، فعرض فستوس على الملك قضية بولس وقال له :(به هانا رجال تركه فليكس مسجون ¹⁵ ولوما كنت في اورشليم اشتكى عليه رؤساء الكهنة وشيوخ اليهود وطلبوا أن احكم عليه

¹⁶ فقلت لهم : من عادة الرومان ما يسلموش احد للموت ، إلا لوما يواجه اللي يتهموه ويسمح له يرد على اتهاماتهم ¹⁷ فلوم جو لهانا ، جلست لليوم الثاني من دون تأخير ، وقلت لهم يدو الرجال ¹⁸ فلوم قاموا أعداءه عسب يتحاكوا ، ماقلش اي تهمه من اللي كنت اتوقعها ¹⁹ وكان بينهم وبينه مكارحه على دينهم ، وبرجال اسمه يسوع ، وبولس يقول انه حي ²⁰ واحترت كيف احقق في الموضوع ، وسألت بولس لو هو مستعد يسير إلى اورشليم وتوقع محاكمته في تيه الشكاوى هاناك ²¹ ولكن بولس رفع قضيته إلى القيصر عسب يحكم فيها ، وامرتهم ان يحفظوه في السجن لوما ارسله للقيصر)

²² فقال أغريباس لفستوس :(انا نفسي اسمع ذيه الرجال)

فجاوبه :(غدوه عتسمعه)

²³ وفي اليوم الثاني جو أغريباس وبرنيكه في موكب ضخم ، ودخلوا قاعة الاستماع يحوطوها القاده العسكريين ووجهاء المدينه ، أمر فستوس انهم يدو بولس ²⁴ فقال فستوس :(أيها الملك أغريباس ، ويا كل الحاضرين ، ذيه الرجال اللي تبسروه اشتكوا عليه الشعب اليهودي كله في اورشليم وهانا ، وكانوا بيصيحوا ما نفلتش حي ²⁵ واما انا ، ما ابسرتش انه فعل شي يستاهل الموت ، ولكنه رفع قضيته إلى جلالة القيصر ، وقررت اني ارسله إلى روما ²⁶ وانا مابش عندي شي واضح عسب اكتبه إلى جلالة القيصر ، عسب ذيه اديته قدامكم كلكم ، وخاصه انت يا ملك أغريباس ، عسب اذا سألتوه عن قضيته ولقيت شي اكتبه ²⁷ لأن من الخباله اني ارسل مسجون من غير ما اكتب التهم اللي عليه)