18

¹ وبعدا رحله من أثينا وسار إلى كورنثوس ² ولقى يهودي اسمه عقيل وهو من أهل البنط ، وعاده وصل قريب من ايطاليا هو ومرته بركه ، لأن القيصر كلوديوس امر كل اليهود انهم يريحولهم من روما ، وسار بولس عسب يزورهم ³ وبعدا جلس عندهم واشتغل معاهم ، لأنه كان في نفس مهنته ، عمل الخيام ⁴ وكان كل سبت يكارح اليهود واليونانيين في بيت العباده ، عسب يحاول يقنعهم

⁵ فلوما وصلو سيلا وتيموثاؤس من مقدونية ، فلت بولس كل شي وفضى نفسه للتبشير في الرساله ، على ان يسوع هو المسيح ⁶ لكنهم عارضوه وجلسوا يسبوه ، رجع ينفض ملابسه وقال لهم :(انا بري منكم ، وانتوا المسؤليين من على نفسكم ذلحينه ، شاسير بعد اليوم لغيركم من الناس)

⁷ وانتقل من هاناك ونزل عند واحد اسمه تيتوس الصديق ، وكان بيته شق بيت العباده ⁸ وامن كريسبي بلمسيح هو وعائلته كلهم ، وكان من اللي مسؤليين على بيت العباده ، وخيرات من اهل كورنتوس اللي سمعوا بولس امنوا وتغطسوا

⁹ وفي ليله اتحاكا يسوع مع بولس في رؤيا وقال له :(لا تفتجعش ، ولا تسكت ¹⁰ انا معك ومحد يسطى انه يوجعك ، لأن معي شعب كبير في تيه المدينه) ¹¹ فجلس بعدها بولس هاناك سنه ونص يعلمهم

¹² ولوما وقع غاليون حاكم على آخائية ، تجمعوا اليهود كلهم وهجموا على بولس وشلوه للمحكمه ¹³ وقالوا :(ذيه الرجال يحاول يقنع الناس انهم يعبدوا الله عبادة مخالفه للشريعة)

¹⁴ فكان يشتي بولس انه يتحاكا فقال غاليون لليهود :(يا يهود : لو كان في شكاكم عمل جرايم او مخالفات ، كنت شسمع لكم ¹⁵ لكن مادام ان المشكله هي عن أسماء وعلى عقيدتكم فعليكم ان تتموا الخبر ذيه بينكم ، انا ما اشتيش اوقع قاضي في ذيه) ¹⁶ وطردهم من المحكمة ¹⁷ فمسكوا كلهم على سوستائيين رئيس بيت العباده ودقوه قدام المحكمه ، وغاليون مش مهتم لهم ¹⁸ وجلس بولس قليل في كورنتوس ، وبعدا سلم على الأخوة وسافر في البحر لسوريا ومعه بركه وعقيل ، فحلق راسه في مدينة كنكرية لأنه كان عليه نذر ¹⁹ ولوما وصلوا ل افسس فارقهم ودخل بيت العباده يكارح اليهود ²⁰ وطلبوه انه يجلس وقت اطول معاهم ، وما قبلش ²¹ ولكنه قال لهم لوما سلم عليهم :(شرجع لكم ان شاءالله) ، وسافر من البحر من افسس ²² ونزل في قيصرية ، ومنها طلع إلى اورشليم وسلم على الكنيسة ، وبعدا نزل ل انطاكية

²³ ولوما جلس فيها شويه ، خرج ورحله في غلاطية وفريجية وكان يقوي الطلاب

²⁴ وجا ل افسس يهودي اسمه ابلوس ، من أهل الإسكندرية ، فصيح لسانه ، ويستر يشرح الكتب المقدسة ²⁵ وكان قد تعلم مذهب الله وبيتحاكا عن يسوع بحماس قوي ، ولكنه ما يعرفش إلا غطاس يوحنا ²⁶ ولما بدأ يتحاكا بقوه في بيت العباده سمعه عقيل وبركه ، شلوه لبيتهم وفهموه مذهب الله سوا سوا

²⁷ وبعدا قرر السفر إلى أخائية ، وشجعوه الأخوه وكتبوا للمؤمنين اللي هاناك عسب يستقبلوه ويرحبوا به ، ولوما وص لهاناك كان يساعد قوي اللي أمنوا بفضل نعمة الله ²⁸ لأنه كان من شدة مكارحته مع اليهود يهزمهم قدام الناس ، ويرويهم من الكتاب ان يسوع هو المسيح