17

¹ وخطوا من امفيبوليس وابولونية لوما وصلوا الى تسالونيكي ، وكان به بينها بيت عبادة لليهود ² فدخل بولس بيت العباده ساع عادته ، وجلس يكارحهم ثلاث اسابيع من الكتاب المقدس ³ يشرحها ويرويهم كيف كان لازم على يسوع انه يتوجع وبعدا يقوم من بين الأموات ، وقال :(يسوع ذيه اللي بين ابشركم به هو المسيح) ⁴ واقتنعوا بعضهم ووقعوا مع بولس وسيلا ، وكمان ناس خيرات من اللي يعبدوا الله ، ونسوان وجيهات

⁵ واتلوا اليهود بالحسد ، وجمعوا من عيال الشوارع الأشرار وفعلوا عصابه وبدأو يفعلوا فوضى في المدينة ، وفتشوا في بيت ياسون على بولس وسيلا عسب يخرجوهم للناس ⁶ وما لقيوهمش ، وبعدا شلوا ياسون وبعض المؤمنين لحكام حق المدينة وهم يصيحوا :(هولا اللي فعلوا الفتنة في كل بقعه وهم ذلحينه هانا ⁷ في ضيافة ياسون ، وكلهم بيخالفوا أوامر القيصر ، ويقولوا : ان به ملك ثاني اسمه يسوع) ⁸ فهاجوا بذيه الكلام الحكام والناس ⁹ وشلوا كفالة من ياسون والبقية ، وبعدا فلتوهم ¹⁰ فرسلوا الأخوة على طول بولس وسيلا الى بيرية في الليل ، ولوما وصلوا بينها دخلوا بيت عبادة لليهود ¹¹ وكانوا هولا متسامحين اكثر من اللي كانوا في تسالونيكي ، وجلسوا يسمعوا الرساله وهم راغبين قوي ، وجلسوا يدرسوا الكتاب المقدس كل يوم عسب يتأكدوا منه ¹² وآمنوا خيرات منهم ، وآمنوا من اليونانيين نساء عفيفات ورجال خيرات

¹³ فلوما دروا في تسالونيكي ان بولس يبشر في بيرية جو ليهم وجلسوا يهيجوا الناس عليهم ¹⁴ فرسلوا الأخوة بولس طوالي صلا البحر وبقي سيلا وتيموثاؤس فتره في بيرية ¹⁵ واما اللي ساروا مع بولس وصلوه الى اثينا ، وبعدا رجعوا بوصية منه الى سيلا وتيموثاؤس انهم يلحقوا به سريع ¹⁶ ولوما كان وصل بولس اثينا وجلس مريع لسيلا وتيموثاؤس ، زعل قوي حين ابسر المدينة كلها ملان بالأصنام ¹⁷ وجلس يكارح اليهود والمتعبدين في بيت العبادة ، ومن يبسرهم كل يوم في ساحة المدينة ¹⁸ وكان به جماعه من الفلاسفة الأبيقوريين والرواقيين يكارحوه ، فقال بعضهم :(ايش يشتي ذيه الثرثار انه يتحاكا؟) وقالوا ناس ثانين :(هو يبشر بإلاه غريب) ، لأن بولس كان يبشر بيسوع والقيامة ¹⁹ فشلوا بولس لمجلس المدينة في الأريوباغوس ، وقالوا له :(نشتي نعرف ذيه المذهب الجديد اللي بتبشر به ²⁰ لأن تعاليمة غريبه علينا ، واحنا نشتي نعرف معناه) ²¹ وكان الأثينيين كلهم واللي مقيمين عندهم من الأجانب يضيعوا أقاتهم كل في ان يقولوا ويسمعوا حاجة جديدة

²² وسنب بولس في وسط المجلس وقال :(يا أهل أثينا ، انا ابسركم اكثر الناس ملتزمين في كل وجه ²³ لأني لوما كنت بين اطوف هنيه في مدينتكم وابسر معابدكم ، ابسرت مسلخ مكتوب عليه إلى الإله المجهول ، فذيه اللي تعبدوه ومش انتوا دارين منهو ، هو نفسه اللي بين ابشركم به

²⁴ انه الله خالق الكون وكل شي بينه ، فهو رب السماء والأرض ، ما يسكنش في بيوت يبنيها البشر ²⁵ وما تخدمش ايدي بشرية ، لو هو يحتاج لشي ، لأنه هو اللي يدي للبشر كلهم الحياة ونسمة الحياة وكل حاجة ²⁶ خلق البشر كلهم من أصل واحد وسكنهم على وجه الأرض كلها ، وفعلهم الأوقات وحدد مساكنهم ²⁷ عسب يطلبوه في كل بقعه ويهتدوا ليه ، مع انه مشو بعيد من كل الناس ²⁸ لأننا فيه نعيش ونتحرك ، وساع ما قال واحد من شعراءكم :نحن قبس منه

²⁹ ولأننا ابناء الله ، لازم اننا نعرف ان الألوهيه مشهي شكل فعله الانسان بمهارته من ذهب او من فضه أو حجر ³⁰ ولو الله ما يشتي يذكر بالماضي عسب الجهل فهو ذلحينه يدعي الناس كلهم في كل مكان للتوبه ³¹ لأنه حدد يوم يحاسب فيه العالم بالعدل بواسطة الرجال اللي اختارة ، وروا كل الناس كيف انه قومه من بين الأموات

³² فلوما سمعوه يتحاكا عن قيامة الأموات اتمهزأو به وقال بعضهم :(عنسمع كلامك ذيه مره ثانيه) ³³ فخرج بولس من وسطهم ³⁴ لكن بعضهم وقعوا معه وآمنوا ، ومنهم ديونيس وهو عضو في الأريوباع ، ومره اسمها داماريس وغيرهم