19

¹ ولوما كان ابلوس في كورنتوس وصل إلى افسس ، بعد ما خطى من وسط البلاد ، ولقى طلاب هاناك ² فقال لهم :(هل اوقع لكم الروح القدس لوما أمنتوا؟)

فجاوبوه :(ماشي ، ولا حتى سمعنا انه موجود الروح القدس)

³ فقال :(يعني ايش من معمودية تغطستوا؟)

فقالوا له :(معمودية يوحنا)

⁴ فقال بولس :(غطاس يوحن عسب التوبه ، يدعي الناس عسب يؤمنوا باللي عيجي من بعده ، يعني يسوع) ⁵ فلوما سمعوا ذيه الخبر ، تغطسوا بأسم يسوع ⁶ وطرح بولس يده عليهم ، فنزل عليهم الروح القدس وجلسوا يتحاكوا بلغات غير لغتهم ويتنبأو ⁷ وكانوا تقريباً 12 رجال

⁸ ودخل بولس بيت العباده وجلس يتحاكا بقوه عن ملكوت الله حوالي ثلاثة أشهر ، وكان يجلس يكارح الناس ويقنعهم ⁹ فقاموا بعضهم يعاندوا ويبطلوا يؤمنوا ، وكمان بيتحاكو بالكذب على مذهب الله عند الناس كلهم ، وفلتهم بولس وجلس لحاله مع الطلاب يجابرهم كل يوم في مدرسة تيراتوس ¹⁰ وجلسوا كذيه لمدة سنتين ، لوما كل اليهود واليونانيين اللي كانوا ساكنين في ولاية آسيا سمعوا رسالة المسيح ¹¹ وفعل الله معجزات عجيبه على يد بولس ¹² حتى انه كان الناس يشلوا ملابس او مناديل لمست جسم بولس ، وتسير الأمراض منهم ، وتخرج الأرواح الشريره منهم

¹³ وحاول بعض اليهود من الشوارع اللي بيطردوا الأرواح الشريرة انهم يتحاكوا بأسم الرب يسوع ، فكانوا يقولو للأرواح الشريره :(بأسم يسوع اللي يبش به بولس نقسم عليك تخرج) ¹⁴ وكان من هولا الناس سبعه اخوه لواحد من رؤساء الكهنة واسمه سكاوا ¹⁵ فجاوبهم الروح الشريره :(يسوع انا اعرفه وبولس انا اعرفه ، ولكن من انتوا؟) ¹⁶ وبعدا هجم عليهم الرجال اللي بينه الروح الشريره ، واستر انه يضربهم كلهم ، وهربوا من البيت بلا ملابس ومجرحين

¹⁷ وسمعوا اهل افسس كلهم من اليهود واليونانيين بتيه الواقعه ، وافتجعوا قوي ، وكبر اسم الرب في قلوبهم ¹⁸ فجو خيرات من المؤمنين يعترفوا بأعمال الشعوذه ¹⁹ وجمعوا خيرات من المشعوذين كتبهم وحرقوها قدام عيون الناس كلهم ، وحسبوا قيمة تيه الكتب وطلع خمسين الف من الفضه ²⁰ وكذيه كان كلام المسيح ينتش بسرعه ويزيد بقوه

²¹ وبعد تيه الأحداث صمم بولس ان يمشي من ممقدونيا واخانية وقال :(بعد ما اسير هاناك لازم ابدي على روما والكل) ²² فرسل لمقدونية اثنين من مساعدينه وهم تيموثاؤس وارستس ، واما هو جلس كمان شويه في آسيا ²³ ووقع في ذيك الوقت فتنه قويه من سبة مذهب يسوع ²⁴ لأن الصايغ اللي اسمه ديمتريوس كان يفعل هياكل من فضه للمعبد حق الالهه أرطاسيس ، وكان يكسب من تيه المهره خيرات ²⁵ وبعدا جمع عماله مع ناس ثانين من نفس المهره وقال لهم :(انتوا دارين يا جماعه ان رزقنا من تيه المهره ²⁶ وانتوا ابسرتوا وسمعتوا كيف اقنع ذيه اللي اسمه بولس وغوى خيرات من الناس هانا في افسس وفي اغلب نواحي آسيه وبيقول إن الالهه اللي بنفعلها بالأيدي مشي الهه ²⁷ وذيه غلط ، عيخلي الناس يستهينوا بصناعتنا ، وكمان معبد الالهه العظيمه ارطاميس تسير منه هيبته ، وعاد هيبتها تسير منها عظمتها وهي اللي يعبدها كل الناس في آسيه والعالم كله)

²⁸ ولوما سمع الموجودين ذيه الخبر غثيوا خيرات وجلسوا يصيحوا :(العظمة لأرطاميس ، الهة أفسس) ²⁹ ووقع شغب في المدينة كلها ، ومسكوا الناس غايس ورستركي وهم من مقدونيا وأصحاب بولس في سفره ، وشلوهم لملعب المدينة ³⁰ وكان بولس يشتي يواجه الناس ، ومنعوه اطلاب ³¹ وكمان بعض المسؤلين في الولاية من أصحاب بولس رسلوا له عسب يوبه وما يسرش للملعب

³² ووقع الشغب في الموجودين كلهم ، وكان بعضهم يصيحوا بحاجه وبعضهم يصيحوا بحاجه ثانيه ، واغلبهم مش دارين ليش مجتمعين ³³ وقدموا اليهود اسكندر للأمام ، وحاكوه بعض الموجودين على الخبر ، وأشر بيده عسب يسكتوا ويقدم الدفاع للناس ³⁴ ولوما دروا انه يهودي جلسوا يصيحوا بصوت واحد حوالي ساعتين :(العظمة لأرطاميس ، الهة افسس)

³⁵ وفي الأخير قدر كاتب الحاكم انه يهدي الناس حين قال لهم :(يا أهل افسس ، لا تنسوش ان مدينة افسس هي حارسة هيكل أرطاميس العظيمة والصنم اللي نزل من السماء ³⁶ وذيه مابش عليه خلاف ، عليكم ان تهدأو وما تتهوروش ³⁷ اديتم هولا الرجلين ، ومحد منهم عبث في حرمة أرطاميس ، الهتنا ولا سب فيهم ³⁸ ولو كان ديمتريوس واهل المهره اللي بيشتغلوا فيها معاهم شكوى على احد ، به قضاء يسيروا صليه ³⁹ ولو لكم دعوى ثانيه ، فالحكم يوقع في جلسه قانونية ⁴⁰ عسب ما نتعرضش لتهمة اعمل على تهييج الفتنه ساع ماوقع اليوم ، ومابش لنا عذر في ذيه التجمع) ⁴¹ ومشيوا الناس بعد ما قال ذيه الكلام