¹ أخيرآ ماعد عنقدرش نتحمل إكثر من هكذا ، وعلميد هاذا قررنا نورع لحالنا في أثينا . ² فقمنا ورسلنا تيموتاوس أخونا اللي بيشتغل معانا في خدمة الله علميد ينتشر إنجيل المسيح .ورسلناه علميد يثبتكم ويقوي إيمانكم . ³ علميد مايتراجعش أحد بسبب هاذه الشدايد ، وأنتو من أنفسكم داريين انهي من نصيبنا . ⁴ لأن أحنا لاما كنا عندكم حاكينكم بأن أحنا عنتبهذل من شدتهم . ووقع هاذا من صدق سعما أنتو داريين. ⁵ وهاذا هو السبب اللي خلاني ماعد أقدرتش اتحمل أكثر ، رسلوني لا عندكم علميد أدرى بأحوال أيمانكم ، علميد لا يكونش أبليس قد أغواكم وضاع تعبنا بلاش . ⁶ وذلحين رجع تيموتاوس من عندكم، وادالنا أخبار طيبة على أيمانكم ومحبتكم . وحاكنا بأن أنتو بتذكرونا دايمآ بالخير ، ومشتاقين تبسرونا سعما أحنا بنشتاق نبسركم . ⁷ وعلميد هاذا ياكل الأخوة ، وقع إيمانكم المشجع الكبير لنا في وسط أحزاننا وأوجاعنا . ⁸ سبرت لنا العيشة مادام وأنتو ثابتين مع المسيح . ⁹ وأحنا بنفرح فيكم قوي في وجود إلهنا ، وكيف نقدر نقدم لله مايستاهله من الشكر علميد كل هاذا الفرح ؟ . ¹⁰ وأحنا بنترشاه وبنصمم عليه ليل الله مع نهاره علميد نبسركم شخصيآ وعلميد نزيدكم بما بيحتاجله إيمانكم . ¹¹ أسئل إلهنا وأبونا بنفسه وسيدنا عيسى علميد يفتح لنا ونجي عندكم . ¹² أسئل المسيح بأن يخلي المحبة بينكم البين ولكل الناس وتزداد وتنسح بقوة سعما محبتنا لكم . ¹³ وآن يثبت قلوبكم علميد تكونو صالحين وبدون عيب قدام إلهنا وأبونا لاما يجي سيدنا عيسى مع كل أوليائه الصالحين ..