¹ وأنتو ياكل الأخوة قد دريتو أن زيارتنا لا عندكم ماكانتش على الفاضي . ² مابلا قد أنتو داريين إنهو قبل مانجي لا عندكم ، وغلطو علينا قوي في فيلبي وأهانونا . لأن أحنا واجهنا معارضة قوية ، لكن إلهنا إدا لنا الجراءة علميد نبشركم بأنجيله . ³ وأحنا لا نصحنا مابنستخدمش التضليل ولا بنغريكم او بننصبكم . ⁴ لأن الله أختبرنا وأتمنا على الأنجيل . لأن أحنا بنبشر ولا هو علميد نرضي الناس ، لأن الله هو اللي بيفحص وبيختبر قلوبنا . ⁵ ومجابرنا سعما أنتو داريين ، ماكنش مجبر حالي ويسخسخ ، ولا كان غطايه للطمع ، والله بيشهد لنا . ⁶ ولا جربنا علميد نكسب مدح الناس ، لا أنتو ولا غيركم . مع أنو كان يحقلنا نطلب منكم حاجات خيرات ، لأن أحنا الرسل حق المسيح . ⁷ لكن حين كنا عندكم ، كنا طيبين معاكم ساع الأم اللي بتحن على عيالها . ⁸ وأحنا حبيناكم لدرجة أن أحنا نوينا نديلكم ، مش الأنجيل بس ، مابلا نزيد نديلكم أرواحنا والكل ، لانهو قد أنتو وقعتو عزيزين علينا قوي .. ⁹ وأنتو ياكل الأخوة ذاكرين، كيف أحنا خدمنا وتعبنا ، لأن أحنا لاما كنا بنبلغكم ببشارة الله، وكنا بنشتغل في شغلنا ليل الله مع نهاره علميد مانكونش حمل على أحد منكم . ¹⁰ وأنتو بتشهدو ، والله بنفسه بيشهد ، ماكنا بنفعلكم وكيف بنتصرف بينكم أنتو المؤمنين ، بالطهارة والتقوى من دون أي عيوب . ¹¹ وقد أنتو داريين كيف كنا بنتعامل مع كل واحد منكم سعما بيعامل الأب عياله . ¹² وكنا بنشجعكم ونعزيكم وبنطلب منكم وبنصمم عليكم علميد تعيشو مثلما يليق بمقام الله اللي بيداعيكم لا مملكته وجلاله . ¹³ وزيد بنشكر الله في كل وقت لأن أنتو حين سمعتو رسالة الله اللي بلغناكم بها ، وقبلتوها ومشهو علميد أن الرسالة كأنهي من البشر ، مابلا سعما هي في الحقيقة ، رسالة الله اللي هي شغالة فيكم أنتو المؤمنين . ¹⁴ وقد أنتو ياخوتي ، سعما جماعات المؤمنين اللي في بلاد يهوذا ، لأن شعب عيسى المسيح وهم هناك ، لأن اليهود لاحقوهم ، وأنتو والكل ، وعيال أمتكم لاحقوكم . ¹⁵ لأن اليهود هم اللي قتلو سيدنا عيسى والأنبياء وذلحين هم بيلاحقونا أحنا والكل . لأنو حين قدهم داريين كيف ما عيرضوش الله ويعادو الناس كلها . ¹⁶ وبيحاولو يمنعونا علميد مانقدمش رسالة النجاة للي مشهم يهود . وبهاذا بيزيدو ذنوبهم لا الأخير . وعلميد هاذا غضب الله عليهم . ¹⁷ يا كل الاخوة ، أحنا لاما أبتعدنا عليكم ، ما خطيت الا فترة قليلة وبعدها رجعنا نشتاق لكم قوي ، ونوينا بأن نبسركم . مع أنكم كنتو بعيدين من عيوننا لكن ماكنتوش بعيدين من قلوبنا . ¹⁸ وكنا نشتي نجي ونزوركم ، وبالحقيقة أنا بولس وقد حاولت أكثر من مرة ، لكن الشيطان كان بيصعبها علينا . ¹⁹ لأنهو لاما يجي سيدنا عيسى مرة ثانية ، ومن اللي عيكون أملنا وفرحتنا ؟ لأن أنتو وبدون شك ، أيوة أنتو عتوقعو أكليلنا اللي عنفتخر به قدامه . ²⁰ وفعلآ أنتو فخرنا وفرحتنا ..