¹ يا احبابي ، ازداد وانتشر اللي بيدعو النبوة . فلا تصدقوش كل روح ، انما اختبرو الارواح على ميد تدرو ان كانت من الله . ² وتقدرو تعرفو ان روح الله بهذا : كل روح يشهد ان عيسى المسيح جاء ساعما انسان ، فهو من الله . ³ وكل روح بينكر عيسى ، فهو مش من الله . انما هو روح عدو المسيح اللي سمعتو انه عيجي . وهو ذلحين موجود في العالم صدق . ⁴ ياعيالي الاعزاء ، انتو هزمتو هذولاء لانكم من الله ، ولان الروح القدوس الذي فيكم اقوى من ابليس اللي في الدنيا . ⁵ هم من هذي الدنيا ، وبيتكلمو من وجهة نظر هذي الدنيا ، على ميد هذا فإن اهل الدنيا بيسمعو لهم . ⁶ اما احنا ، فحنا من الله . فمن يعرف الله بيسمع لنا ، ومن هو مش هو من الله ، مابيسمعش لنا . بهذا نعرف روح الحق من روح الظلال . ⁷ يا احبابي ، لازم نحب مابيناتنا البين لان المحبة بتجي من الله وكل من يحب هو ابن الله ويعرف الله . ⁸ واللي مابيحبش ، ما يعرفش الله . لان الله الله ماحبهش . ⁹ وقد بين الله لنا بوضوح انه بيحبنا ، بأنهو رسل ابنة الوحيد للعالم على ميد نعيش بواسطتة . ¹⁰ فهذي هي المحبة اللي بين اقصدها : مش لانحنا بنحب الله ، انما لان هو حبنا ، ورسل ابنة على ميد يوقع ضحية التكفير لذنوبنا . ¹¹ يعني يا احبابي ، بما ان الله حبنا حذي المحبة القوية ، فأحنا لازم نحب مابيناتنا البين . ¹² ولا واحد ابسر الله نهائياً ، لكن ان كنا بنحب مابيناتنا البين ، يثبت الله فينا ، ومحبتة توصل فينا للكمال . ¹³ احنا داريين انحنا ثابتين فيه وهو فينا ، لانه ادالنا نصيب من روحة . ¹⁴ وقد ابسرنا ونشهد ، ان الاب رسل ابنه على ميد ينقذ العالم . ¹⁵ من يشهد ان عيسى هو ابن الله ، بيثبت الله فيه ، وهو في الله . ¹⁶ احنا نعرف ان الله بيحبنا ونؤمن بهذا . محبة الله ، ومن يعيش في محبة الله ، يعيش في الله والله فية . ¹⁷ بهذا توصل المحبة للكمال بيننا ، فنورع ليوم الحساب بثقة ، لانحنا ساعة بالمحبة واحنا في هذي الدنيا . ¹⁸ مابش خوف بالمحبة ، انما المحبة الكاملة بتبعد كل خوف . لان الخوف هو جزء من العقاب ، ومن بيخاف توقع محبتة مش كاملة . ¹⁹ احنا بنحب لانهو حبنا الاول . ²⁰ من بيقول انهو بيحب الله ، وهوبيكرة اخوة ، فهو كذاب . لان اللي مابيحبش اخوة اللي بيبسرة ، مايقدرش يحب الله اللي مابيبسرهش . ²¹ وهذي هي الوصية اللي اداها لنا : من بيحب الله ، بيحب اخوة والكل .