¹ ابسرو ما احلا المحبة اللي حبنا فيها الاب حتى نسمى ابنا الله ² يا احباب ، احنا صدق عيال الله ، لكن حالتنا الجاية ماقد بانتش لنا . لكن داريين انهو لما يجي المسيح عنوقع ساعه ، لانحنا عنبسرة بالحقيقة . ³ وكل من عندة هذا الامل في المسيح ، يطهر نفسة ساعما المسيح طاهر . ⁴ من يغلط ، بيكسر شريعة الله . لان الغلط في الحقيقة هو كسر الشريعة . ⁵ وانتو دارين ان المسيح جاء على ميد يرفع ذنوبنا . وهونفسة بدون ذنب . ⁶ كل من بينتمي لة مابيغلطش . كل من بيذنب . ما ابسرهش ولا يعرفة ابداً . ⁷ يا عايالي الاعزاء ، لا تسمحوش لاحد انهو يخدعكم . من بيفعل الخير فهو خير ، ساعما المسيح خير . ⁸ من فعل الغلط ، بينتمي لابليس ، لان ابليس غلط من البداية . والسبب في ان ابن الله جاء ، هو على ميد يخرب عمل ابليس . ⁹ عيال الله مايفعلوش الخطيئة ، لان فيهم طبيعة الله . انما هم هم مايقدروش يغلطو ، لان الله هو ابوهم . ¹⁰ بهذا نفرق بين عيال الله وعيال ابليس : من اللي مابيفعلش الخير ، فهو مش من الله ، وزد اللي مابيحبش اخوة . ¹¹ وهذي هي الرسالة اللي سمعتوها من اول : انحب مابيناتنا البين . ¹² لا توقعش ساع قابيل اللي بينتمي لابليس الشرير فقتل اخوة . وليش قتلة ؟ لان افعالة كانت شريرة وافعال اخوة كانت خيرة . ¹³ يا اخوتي ، لا تستغربوش ان كان اهل تلدنيا بيكرهوكم . ¹⁴ احنا داريين انحنا انتقلنا من الموت لا الحياة ، لانحنا بنحب الاخوة . اللي مابيحبش فهو عادهو ميت . ¹⁵ من بيكرة اخوة فهو قاتل . والقاتل ساعما تعرفوش مابش لة حياة الخلود . ¹⁶ بهذا ندرا ايش هي المحبة الصدقية : ان عيسى المسيح ضحى بنفسة على ميدنا . فحنا لازم نضحي بأنفسنا على ميد الاخوة . ¹⁷ ان كان واحد معة من خيرات هذي الدنيا ، ويبسر ان احوة حاجتة ، ومع هذا مايشفقش علية ، فكيف عتوقع محبة الله في قلبة ؟ ¹⁸ يا عيالي الاعزاء ، لازب نحب محبة من صدق بالافعال ، مش بالكلام واللسان . ¹⁹ وبهذا نقدر نعرف انحنا بنسير في طريق الحق ، وترتاح قلوبنا في محضرة ، ²⁰ حتى ولو كانت قلوبنا بتلومنا على شي . لان الله اعظم من قلوبنا ويعرف كل شي . ²¹ يا احبابي ، ان كانت قلوبنا مابتلومناش ، فأنحنا نقدر نقرب لالله بثقة ، ²² ونكسب كل اللي بنطلبة منة ، لانحنا بنطيع وصيتة وبنفعل اللي بيرضية . ²³ ووصيتة هي ان نؤمن بأسم ابنة عيسى المسيح ، وان نحب مابيناتنا البين ساعما وصانا . ²⁴ فلما نفعل بوصاياة، نثبت فية وهو فينا . واحنا نعرف انهو بيثبت فينا بالروح اللي اداها لنا .