¹ وقال لهم يسوع :"أقولكم الصدق :بعض الواقفين هِنا ،ماشِموتوش إلا لما يشوفو مملكة الله تظهور بقوة." ² وبعد ست أيام ،أخذ يسوع بطرس ويعقوب ويوحنا لوحدهم ،وطلع بهم لجبل مرتفع. وتغير شكله قدامهم . ³ ورجعت ملابسه بيضاء تلمع أزيد من الثلج ،مافيش أي مبُيض بالدنيا يُبيض مثله. ⁴ وظهر لهم إيليا وموسى كانوا يتكلموا مع يسوع . ⁵ فبدأ بطرس يقول ليسوع :"ياسيدي ما أحسن إنوه نجلس هِنا ! نعمل ثلاث خيام واحدة لك ، وواحدة لموسى ،وواحدة لإيليا" ⁶ ماعادريش أيش يقول ، لإنو كانو خائفين مرّه . ⁷ وجأت سِحابه وظللت عليهم وسمعواصوت السحابة يقول:"أذى هو إبني حبيبي إستمعوا لُه!" ⁸ وفجأه تلفتو جنبهم ،ولا شافوا أحد معهم إلا يسوع وحده. ⁹ ولما هم نازلين من الجبل ،وصيهم مايخبروش أحد باللي شافوه إلا بعد ما يقوم هو من الموت . ¹⁰ فعملوا بوصيته ،بس كانوا يتسألوا بينهم البين :" أيش يعني القيامة من بين الأموات؟" ¹¹ وسألونه:"ليش يقولوا الفقهاء إنوه إيليا لازم يجي أولاً؟" ¹² فجاوبهم:"صحيح ، إيليا يجي أول ويصلح كل الأمور .وكمان أجى بالكتاب عن اللي رجع بشر إنوه لازم يتألم كثير ويهتان. ¹³ أقولكم إنو إيليا أجى فعلاً،وعملو به كل مايشتوا،مثلما هو مكتوب عنه بالكتاب!" ¹⁴ ولما وصلو لعند باقي التلاميذ، شافوا ناس كثيرمتجمعين عليهم وبعض فقهاء اليهود يُكارحونهم . ¹⁵ ولمــا شاف الناس يسوع ، اتعجبوا كلهم وجـرو يسلموا علوه. ¹⁶ فسإلهم :"على أيش تُكارحونهم؟" ¹⁷ رد عليه واحد من المتجمعين :"يـا معلم ،جبتو إبني لعندك فيبه شيطان خلو أعجم ، ¹⁸ كلما يجي له،يصرعه على الأرض ،ويرغي بلقفه ويضغط على أسنانه ويتيبَّس.وطلبتو من تلاميذك يُعالجونه ويخرجوه، بس ماقدروش." ¹⁹ قلهم يسوع:"يـا جيل غيرمؤمن لـمتى شجلس معكم ؟لـمتى شتحملكم ؟ هاتوا لي الولد." ²⁰ فقربونه لعند يسوع.مجرد ما شاف الشيطان يسوع صرع الولد،فوقع على الأرض ،وكان يتمرغ ويرغي بلقفه. ²¹ فسِئل يسوع أبو الولد : من متى ذا بدأ يجي له ؟فجاوب : من وعاده طفل. ²² وكثير ما كان يرجم به للنار وللماء من شان يقتله .إذا أنت قادر تعمل له شيء ،إرحم حالنا وساعدتنا . ²³ فقال له يسوع :ليش تقول إن كنتو اقدر؟ "كل شيء ممكن عند المؤمن " ²⁴ فصاح أبو الولد وقال: "أنا مُصدِّق ياسيـد فساعدني عشان يتقوى إيماني الضعيف" ²⁵ ولما شاف يسوع إنو عدد الناس يكثُروا، نِهِر الشيطان النجس،وقال له :"ياشيطان يا اللي أعجمت أذى الولد وقفلت أُذنه ، أنا أأمُرك إخرج منه ،ولا تدخُلش فيبه مـره ثاني! " ²⁶ فصاح الشيطان وصرع الولـد بقوة وخرج منه ورجع الولد كأنه ميت،فقال كثيرمنهم إنو مات . ²⁷ لكن يسوع مسكه بيده وقيمه قِياَّم . ²⁸ وبعد ما دخل يسوع البيت سألونه تلاميذه لوحده :"ليش ما قدرناش إحنا نُخرج الشيطان؟" ²⁹ قلهم :"آذى النوع مايخرجش بشيء إلا بالصلاة والصوم " ³⁰ وخرجوا من هِناك وخلفوا منطقة الجليل،ومايشتيش يسوع أحد يعرف مكانه. ³¹ لإنو كان يدرس تلاميذه ويقلهم :"اللي رجع بشر،شسلمونه ليد الناس ،ويقتلونه،وبعد ما يُقتل يقوم حي باليوم الثالث" ³² بـس مافهموش كلامه.وخافوا إنو يسألونه عن معناته . ³³ وبعدين أجاؤو لكفرناحوم.ولما اجتمعوا بالبيت ،سألهم يسوع :"على إيش كنتم تتكارحوا بالطريق؟" ³⁴ فسكتوا،التلاميذ وماجاوبوش بشيء،لإنهم كانوا يتكارحوا بالطريق منو الأعظم بينهم؟ ³⁵ فجلس يسوع ،و دعي للاثنعشر تلميذ وقالهم:" إذا احد يشتي يكون الاول،يُخلي نفسه آخر واحد وخادم للكل !" ³⁶ وبعدين أخذ يسوع ولد صغير ووقفه وسطهم وضمه لحُضنه وقلهم : ³⁷ "اللي يَقَبل طفل مثل آذى إكراماً لإسمي يُعتبر قِبلنا،واللي يقبلنا فهو قِبِل اللي أرسلنا كمان" ³⁸ قآله يوحنا :"يامعلم ،شِفنا واحد يخرج الشياطين بقوة إسمك ،حاولنا إنو نمنعه لإنو ماهوش تبعنا" ³⁹ فقلهم يسوع :لا تمنعُنوه ! لإنو اللي يعمل معجزة بقوة إسمي ،لا يمكن إنوه يسيء لي بآذي السرعة . ⁴⁰ لإنو اللي موش ضدنا فهو معنا . ⁴¹ أقولكم الصدق :اللي يسقيكم قلص ماء إكراماً لإسمي لإنكم تبع المسيح ،أجـرُه ماشِضيعش أبدا.ً ⁴² من كان عقبة قُـدام المؤمنين الصغار اللي يؤمنو بي ،أحسن لُه إنو يربِط حجر مطحن ثقيل على رقبتُه ،ويرجمو به للبحر. ⁴³ إذا كانت إيدك تُسبب لك إنو تٌخطئ إقطــعه: أحسن لك إنو تدخل للحياة بيد واحدة،من إنو تكون لك ثنتين يـدات وتدخل لجهنم اللي ماتطفاش. ⁴⁴ مكان الدود اللي مايموت ،والنارما تطفاش. ⁴⁵ ولو رجلك شتكون سبب لك إنو تُخطئ إقطعـــه :أحسن لك إنو تدخل للحياة برجل واحده ،من إنو يكون لك ثنتين أرجل وتدخل جهنم اللي ماتطفاش. ⁴⁶ مكان الدود اللي مايموت ،والنار ماتطفاش. ⁴⁷ ولو عينك شتكون سبب إنو تُخطئ إقلــعِه :أحسن لك تدخل لمملكة الله بعين واحده، من إنو تكون معك ثنتين عيون وتدخل جهنم . ⁴⁸ مكان الدود اللي مايموت ،والنار اللي ما تطفاش. ⁴⁹ لإنو كل واحد يُملّح ُ بنار ،وكل ذبيحة تُملّح بملح. ⁵⁰ الملح تمام ،بـس إذا راحت ملوحته،كيف نرجع له طعمه؟لازم يكون لكم ملح بأنفسكم ،وعيشوا بسلام بينكم البين!".