¹ وقام من هِناك وراح لمنطقة يهوذا وبعدين مشي للمنطقة الثاني اللي بالاردن . والناس أتجمعوا عنده مرة ثانية ، فاجلس يعلمهم مثلما كان يعمل من قبل ² وأجاءوا له بعض من الفريسين بسؤال علشان يختبروه ، وقالوا له " هل هو حلال الرجل يطلق مرته ؟ " ³ فجاوب : " بأيش موسى وصيكم ؟ " ، ⁴ قالوا له " موسى سمح أنو نكتب شهادة طلاق ونطلقها . " ⁵ قال لهم يسوع " أذأ بسبب قساوة قلوبكم موسى كتب لكم هذي الوصيه . ⁶ لكن من بدايه الخليقة الله خلي الأنسان ذكر وأنثى . ⁷ وهذا السبب الرجل يترك أبوه وأمُه ويرتبط بمرته . ⁸ ويكونوا الأثنين جسد واحد ومن اذاك الوقت هم واحد مش اثنين . ⁹ واللي جمعه الله ما يفرقوش الإنسان " ¹⁰ وفي البيت ، تلاميذه عادوا وسألوه عن أذا الأمر . ¹¹ فقلهم " اللي يطلق مرته ويتزوج واحدة ثاني ، يزني بها . 12 ¹² وإذا طلقت المره زوجها وأتزوجت واحد ثاني ، تكون ارتكبت الزنى !" ¹³ وأجاءوا له ناس مع الجُهال علشان يلمسهم ، بس التلاميذ لاموا اللي جابوهم . ¹⁴ ولما شاف يسوع أذأ زعل وقال لهم " خلوا الجُهال يجيئوا لعندي لا تمنعوهومش ، لأنوا الله يُدخل للمملكته مثلهم . ^{15 16} وأقول لكم الحق ، اللي ما يقبلش مملكة الله مثل الجاهل مش دخلهاش . " وبعدين حضنهم ، وطرح أيديه عليهم وباركهم . ¹⁷ ولما قده شيخرج للطريق، جري له رجل وسجد له وسأله : " يا معلم الصالح ، أيش اعمل علشان أورث الحياة الأبدية ؟" ¹⁸ بس يسوع قال له " ليش تدعيلي بالصالح ؟ مافيش صالح الا الله وحده ¹⁹ انت تعرف الوصايا : لا تقتلش و ماتزنيش وماتسرقش، وماتشهدش زور ، وما تظلمش احد ، وأبوك وامك كرمهم . " ²⁰ قال له الرجل : " يا معلم ، من وانا عادنا صغير أعمل بكل هذا الوصايا . " ²¹ فشاف له يسوع بحب وقال له " ناقصك حاجه واحده : روح وبيع كل اللي معك ، ووزع ثمنه على اللي هم فقراء ، علشان يكون معك كنز بالسماء، وبعدين تعال وتبعني . " ²² فزعل الرجل من هذا الكلام وراح وهو مهموم، لانه كان غني كثير . ²³ فتلفت يسوع لعنده وقال لتلاميذه : " كم هو صعب على الأغنياء انهم يدخلوا لمملكة الله ! " ²⁴ فاستغربوا التلاميذ من كلامه . فقلهم يسوع مرة ثانيه: يا عيالي كم هو صعب الدخول لمملكة الله ! ²⁵ مرور جملٍ منخزق إبرة أسهل من أنو واحد غني لمملكة الله ! " ²⁶ فأستغربوا التلاميذ زيادة وقالوا بينهم بين " على كذا منو شيقدر انو ينجو ؟ " ²⁷ فشاف لهم يسوع وقال : " الناس ما يقدروش ، بس الله يقدر ، لان الله على كل شيء قدير. ²⁸ فقله بطرس : " نحنا تركنا كل حاجه وتبعناك . " ²⁹ فقال يسوع " اقول لكم الصدق : اللي يسيب بيت أو إخوة او أخوات او ام او أب او اولاد او مزارع علشاني وعلشان الإنجيل ³⁰ شيحصل بيذي الدنيا ، حتى مع المُضايقات مية مرة من البيوت والاخوة والاخوات والامهات والاولاد والمزارع ، وفي الاخرة شيحصل حياة أبدية ³¹ وكثير اللي هم بالأول هنا شيكونوا في ألاخير هناك ، واللي هم في الأخير هنا شيكونوا بالاول هناك . " ³² وكانوا بالطريق شيطلعوا لمدينة أورشليم ،ويسوع كان يمشي قدامهم . وكانوا التلاميذ مُستغربين ، والناس اللي تبعوه كانوا خايفين . فيسوع شل الأثنى عشر ، مرة ثانية ، وكلمهم باللي شيحصل له . ³³ فقال : " إنتبهوا ! إحنا بالطريق لأورشليم ، واللي كان بشر شيسلم لرؤوساء الكهنة والفقهاء ، وشيحكموا علوه بالموت وبعدين شيسلمونه للأجانب ³⁴ وشيستهزوء بُه ، وشتفلوا علوه ، وشيجلدموه ، وشيقتلوه . بس هو شيقوم حي بعد ثلاث أيام " . ³⁵ وراح لعنده يعقوب ويوحنا عيال زبدي وقالوا له : " يا معلم ،نشتيك تعمل اللي كل نطلبه منك . " ³⁶ فقلهم : " أيش تشتوا أعمل لكم ؟ " 37 ³⁷ فقالوا له : " خلي نحنا نجلس في مجدك واحد عند يمينك والثاني عند شمالك . " ³⁸ فقلهم يسوع : " انتم مش عارفين أيش تطلبوا : تقدروا تشربوا الكأس اللي شربته انا ، ولا تنزلوا الى أعماق الوجع اللي شجلس أتوجعه؟ " ³⁹ فكلموه : أيوه ، نقدر . " فقلهم يسوع " تشربوا كأسي وتتوجعوا وجعي ، ⁴⁰ اما الجلوس عند يميني ولا شمالي ، مش هو لي علشان أجيبه ، هو للناس اللي أتجهز لهم ⁴¹ ولما العشرة التلاميذ سمعوا بهذا ، زعلوا من من يعقوب ويوحنا ⁴² فدعي لهم يسوع وقلهم : " انتم عارفين انو اللي يعتبروا انفسهم حكام على الناس يتسيدوا عليهم والعظماء حقهم يحكموا عليهم ⁴³ أما أنتم ما يكنوش هذا بينكم ، واللي يشتي منكم يكون عظيم ، يكون خادم بينكم . ⁴⁴ واللي يشتي يكون الأول بينكم ، يكون عبد للناس كلهم ⁴⁵ لانو اللي رجع بشر ماجاش علشان الناس تخدمه إنما اجاء علشان يخدمهم ويضحي بنفسه أضحيه على ناس كثير . ⁴⁶ وبعدين وصلوا لأريحا ، ولما قده شيخرج من أريحا ، ومعه ناس كثير وتلاميذه ، كان برتيماوس الاعمى أبن تيماوس جالس جنب الطريق يشحت ⁴⁷ ولما سمع انه يسوع الناصري ،جلس يصيح : " يا يسوع يابن داؤد أرحمني !" ⁴⁸ فصاحوا ناس كثير فوقه وقالوله : " اسكت . " بس هو زاد يصيح أكثر : " يا بن داؤد أرحمني ! " ⁴⁹ فيسوع وقف وقال : صيحو له ، فصيحوا للأعمى وقالوا له : " أتشجع وقم ، يسوع يدعي لك . " ⁵⁰ فرجم بالثوب حقه ، وقفز وراح لعند يسوع ⁵¹ يسوع سأله : " أيش تشتيني اسوي لك ؟ الأعمى قال له : " يا سيدي انا أشتي أشوف . " ⁵² يسوع قال له : " امشي والأيمان حقك قاشفيك ! وهذيك الساعة شاف ، وتبع يسوع في الطريق