¹ بهذيك الأيام كان به ناس كثير ، ومافيش معاهم شيء يأكلوا ، فدعي يسوع تلاميذه وقلهم: ² "أنا أشفق على الناس هاذوه لإنهم (جالسين معي ثلاثة أيام ومافيش معاهم حاجة يأكلوا . ³ ولو روحناهم للبيوت حقهم جوعانين شيقع بهم تعب قوي بالطريق ، لأنه بعضهم جاء من مكان بعيد." ⁴ فالتلاميذ كلموه: "كيف شيقدر واحد يشبع هاذوم خبز هونه بهذاه الصحراء؟" ⁵ فسالهم: "كم به معاكم خبز؟" فقالوا له: "سبع حبات." ⁶ فكلم الجموع يتكئوا على الأرض ، وشل السبع الحبات الخبز ، وشكر الله وقسمه وجاب لتلاميذه من شأن يوزعوا بين الناس ، فوزعوها ⁷ . وكان به قليل سمك صغير ، فيسوع باركه وكلم تلاميذه يوزعوه كمان (مثل الخبز) . ⁸ والناس اكلوا لما شبِعوا ، وبعدين التلاميذ رفعوا باقي الأكل بسبع سلال . ⁹ والناس اللي أكلوا كانوا بحوالي اربعة الاف . وبعدين يسوع روحهم . ¹⁰ وطلع القارب مع تلاميذه ومشي لمنطقة دلمانوتة . ¹¹ وبعدين جاء فقهاء اليهود وجلسوا يتناقشوا مع يسوع ، فطلبوا منه آية من السماء من شأن يختبروه . ¹² فتنهد من قلبه وقلهم: "ليش الشعب هاذه يشتي آية؟ أقلكم الصدق ، الشعب هاذه ماشيحصل ولا آية!" ¹³ وبعدين فلتهم ورجع للقارب ومشي للساحل الثاني . ¹⁴ فالتلاميذ نسوا يشلوا معاهم خبز ، ومافيش معاهم بالقارب إلا خبز واحد . ¹⁵ ووصاهم يسوع وقلهم: "اِنبتهوا! خليكم حذرين من خمير فقهاء اليهود وخمير الملك هيرودس." ¹⁶ وتكلموا بينهم بين: "مابش خبز معنا!" ¹⁷ فعرف يسوع وقلهم: "ليش تتكلموا بينكم بين إنه مابش معاكم خبز؟ (هل) لحد الآن ماتفهموا ولاتعرفوا؟ هل معاكم قلوب مقفلة؟ ¹⁸ مش معاكم عيون ماتشوفش وآذان ماتسمعش؟ ماتذكروا ¹⁹ لما قسمت خمس حبات خبز بين خمسة الاف شخص؟ كم سله مليانه بباقي الخبز رفعتم؟" فقالوا له: "اثنا عشر ." ²⁰ "ولما قسمت السبع الحبات الخبز بين اربعة الاف شخص ، كم سلة مليانة بباقي الخبز رفعتم؟" فقالوا له: "سبع حبات." ²¹ فقلهم: "لحد الآن مافهمتوا؟" ²² وجاء لقرية بيت صيدا ، وجابوا لعنده رجُل أعمى وترجوا مُنه يلمسه . ²³ فمسك بيد الأعمى وقاده لخارج القرية ، وتفل لعيونه ، وطرح يداته علوه وسأله: "تشوف شيء؟" ²⁴ فشاف لعنده وقله: "اشوف الناس تمشي مثل الأشجار!" ²⁵ فطرح يسوع يداته فوق عيون الرجل مرة ثانية . ولما الرجل فتح عيونه وشاف ، فرجع صحيح يشوف كل شيء واضح . ²⁶ فرسله لبيته وقله: "لاتروحش القرية." ²⁷ ومشي يسوع وتلاميذه لقرى قيصرية فيلبس ، وبالطريق سأل تلاميذه: "الناس تقول عليا ، من أنا؟" ²⁸ فقالوا له: "ناس يقولوا عليك يوحنا المعمدان . وناس يقولوا عليك إيلياء ، وناس يقولوا عليك واحد من الإنبياء." ²⁹ فسألهم: "وانتم إيش تقولوا عليا ، من أنا؟" فجوب له بطرس."أنت المسيح." ³⁰ فقلهم إنتبهوا تكلموا أي واحد عني ³¹ وبدأ يُعلمهم أن ابن الإنسان لابد يتوجع كثير ، ومايقبله الشيوخ ورؤساء الكهنة وفقهاء اليهود ويُقتل ، وبعد ثلاث أيام يقوم من الموت . ³² وتكلم بهاذه الموضوع بالعلن (قدام الجميع) ، فشله بطرس على جنب وجلس يلومه . ³³ فالتفت وشاف لعند التلاميذ ، وصيح على بطرس وقله: "أمشي من قدامي ياشيطان! أنت تفكر مثل البشر ومش مثلما يفكر الله." ³⁴ وبعدين دعي للناس والتلاميذ وقلهم: "اللي يشتي يتبعني ، لابد علوه يتخلى عن نفسه ، ويتحمل صليبه ويتبعنا . ³⁵ لإنه اللي يشتي ينقذ حياته يضيعها . أما اللي فقد حياته من شأني (في طريقي) ومن شأن رسالة الإنجيل فإنه ينقذها . ³⁶ لإنه إيش بايستفيد الإنسان لو ربح العالم كُله ، وضيع نفسه؟ ³⁷ إيش بايجيب ³⁸ لإنه اللي يستحي مني ومن كلامي قدام هاذه الشعب الفاسق العاصي ، يستحي منه ابن الإنسان لما يجي عند مجد أبيه (أبي) مع الملائكة الطاهرين."