¹ Mati', jangkah asat utukng, smaan imam kapala ge' ayo ama-ama bangsa dakoh naap kaputusan samahu tentang Yesus ya' ngukum kabis Ini.' ² Ge', ayoa' ningo' Yesus, lalu minsakng ge' nyarah-A wa' gubernur Pilatus.

³ Jangkah Yudas, da nyarah Yesus, mile' bahwa Yesus gatnangkatn hukuman, ini' rasa nyesal ge' mangkure' 30 kapikng pirak wa' imam-imam kapala ge' ayo ama-ama, ⁴ waatn a', "Iko' nga baduse karna nyarah daya' da ti' basara." Tapi, ayoa muji', "Jai urusan a' nige' kai? Dakoh urusanmu'!"

⁵ Ge', Yudas nyangkahatn kapikng-kapikng pirak dakoh ka Bait Jabata ge' ngagatn a'. Lalu, ini' anu ge' gantong adup a.'

⁶ Tapi, imam-imam kapala naap kapikng-kapikng pirak dakoh ge' muji', "Kati' gatnmurokng ya' mana' a' ka sadatn kas karna diah anilah raga daya'." ⁷ Maka, ayoa' naap kaputusan samahu ge' nige' uang dakoh, ayoa' mari tana tukang pariok sebage tampat sibur ya' ayo sok asing. ⁸ Kohtalah sabab a', tana' dakoh gatnmuji' 'Tana Daya' sampe no diah, ⁹ Nige' ladakoh, ganaplah jai da gatn Nabi Yeremia muji': ¹⁰ Ayoa' manggune 30 kapikng pirak ya' mari tana tukang pariok, ulah da nga Tuhan parintah wa'iko'."

Yesus ge; Gubernur Pilatus

¹¹ Mati', Yesus agutn ka tura' Gubernur ge' Gubernur mansikatn wa'-Ini', "Diu'ta Akupm Raja sok Yahudi?" Waat Yesus, "Ai', ulah da imu ngamuji."

¹² Tapi, jangkah Ini' gatn imam-imam kapala ge' ayo ama-ama nuduh, Ini' ti' naham jai pun.

¹³ Lakadakoh, Pilatus nyansana wa'-Ini', "Anita Akupm ti' dangah batol karah ayoa' da nuduh Akupm?"

¹⁴ Tapi, Yesus ti' naham Pilatus, biar ya' nyiteng tuduhan pun singge gubernur dakoh aru heran.

Pilatus Gagal Ngarapas Yesus

¹⁵ Mati', wa' satiap ari raya, Gubernur biasa ngarapas bagi sok karah, nyungan tahanan da gatn ayoa' ngatte. ¹⁶ Wa' ano dakoh, Ayoa' ani umpu' tahanan da terkenal, da gatnmuji' Barabas. ¹⁷ Jadi, jangkah sok karah bakumpur, Pilatus mansikatn wa' ayoa', "Asilah da mu' ngatte ya' gatnngarapas, Barabas ato Yesus, da gatnmuji' Kristus?" ¹⁸ Sabab, Pilatus pane bahwa karna iri, ayoa' nga nyarah Yesus wa'ini.'

¹⁹ Jangkah Pilatus agi' unyung ka karusi pangadilan, sautn a' ngirim pusutn wa'ini', "Iya' umas jai pun tarhadap Sok tsmsn dskoh. Sabab, iko nga menderita karah macam ano diah sadatn mimpi karna Ini'."

²⁰ Tapi, ayo imam kapala ge' ayo ama-ama nganjong sok karah ya' mahi Barabas ge' ngamis Yesus.

²¹ Gubernur mansikatn wa' ayoa', "Da dume umpatn kadua sok dakoh da imu' ngatte ya' iko' ngarapas bagimu? Ge', ayoa' nyansana, "Barabas!"

²² Pilatus nyansana wa' ayoa', "Kalo daladakoh, jailah da arus ko'umas nige' Yesus da gatb muji' Kristus?" Ayoa' smaan muji', "Nyalib Kini'!"

²³ Ge', Pilatus mansikatn, "Kajai? Ini' nga umas kajahatan jai?' Tapi, ayoa' ngampak labih kuat agi', "Nyalib Kini!"

²⁴ Jangkah Pilatus mile' bahwa ini' ti' aba' nyelesai jai pun, malah karusuhan mule tajadi, ini' naap paitn ge' nyuci barekng a' ka tura' sok karah dakoh ge' nyansana, "Iko' ti' basara tumukng daya' Sok diah. Dakoh urusan adupmu!"

²⁵ Ge', smaan sok dakoh naham, "Daya'-A ani atas kai ge' anak-anak kai!"

²⁶ Lakadakoh, Pilatus ngarapas Barabas bagi ayoa' ge' ngalaka nyambuk Yesus, Pilatus nyarah Ini' ya' gatnnyalib.

Sardadu Pilatus Mangolo'-olo' Yesus

²⁷ Lakadakoh, ayo sardadu gubernur minsakng Yesus ka markas pamadi' gubernur ge' ngumpur smaan pasukan Romawi ngangkalilikng Ini.' ²⁸ Ayoa' muka' baju Yesus ge' nakkat jubah ungu wa-Ini.' ²⁹ Ge', ngalaka manganyam nyabuah mahkota dabaunak samahu-mahu, ayoa' nakkat a' ka abak Yesus, nyasantak buro' wa' barekng sentao'-A, ge' basujud ka tura'-A, ge' mangijek Ini', waat ayoa', "Salam, Raja sok Yahudi!"

³⁰ Ayoa' ngaruja'-A, naap buro' dakoh, lalu mantokng a' ka abak-A. ³¹ Ngalaka ayoa' mangejek Ini', ayoa' muka jubah ungu dakoh umpatn Yesus, ge' agi' nakkat pangiak -A sendiri, ge' minsakng-A anu ya' nyalib-A.

Yesus Gatnnyalib

³² Jangkah ayo sardadu dakoh mungkas, ayoa' amput nyungan are umpatn Kirene da bagaatn Simon. Ayoa' makse Simon ya' mikul salib Yesus. ³³ Ge', jangkah utukng ka nyabuah tampat da bagaatn Golgota, da bararti "Tampat Tengkorak", ³⁴ ayoa' mangkatn-A anggur ya' gatnnyucur da gatnnyampur nige' ampadu, ge' ngalaka nyacap a', Ini' kati' ittuh nyucura.' ³⁵ Jangkah ayoa' manyalib Yesus, ayoa' magi-magi pangiak-A ka antara ayoa' nige' matatn undi. ³⁶ Lakadakoh, ayoa' unyung ge' mangawasi-A ka dakoh. ³⁷ Ge', ka tumukng abak-A ayoa' masang tuduhan tarhadap-A, "DIAHTALAH YESUS, RAJA SOK YAHUDI.' ³⁸ Jangkaha dakoh, ani dua panjahat da gatnnyalib samahu nige' Yesus. Nyungan ka suutn sentao' ge' da nyungan ka suutn sengkiri. ³⁹ Ge', ayo sok da nabo', manghujat Ini gae gileng-gileng abak, ⁴⁰ ge' nyansana, "Akupm da ao' ngaruboh Bait Jabata ge' mantagut a' agi' sadatn taru ano, nyalamatmih adup-Mu sendiri! Sa' Akupn Anak Jabata, susor umpatn salib dakoh!."

⁴¹ Ladakoh uga' imam-imam kapala, samahu ayo ahli Taurat, ge' ayo ama-ama ngijek Yesus, waat ayoa, ⁴² "Ini' nyalamat sok laitn, tapi Ini' ti' kaatn nyalamat Adup-A sendiri. Sa' Ini' anilah Raja Israel, tea'lah Ini' susor umpatn salib mati' diah ge' ite' ao' pacaya wa'-Ini. ⁴³ Ini' pacaya wa' Jabata, maka tea'lah Jabata da nyalamat-A mati', sa' Jabata manghendaki-A. Karna Adup-A ta da muji', 'Iko anilah Anak Jabata." ⁴⁴ Ayo panjahat gatn nyalib samahu' nige' Ini' uga' ngijek-A.

Pangkabis Yesus

⁴⁵ Mati', umpatn jam kainum, kagalapan tumukng smaan tana' dakoh, sampe jam kapire. ⁴⁶ Kira-kira, wa' jam kapire, Yesus ngampak nige' saratn da kuat, waatn-A, "Eli, Eli, lama sabakhtani?" Da ratia, "Jabata-Kom Jabata-Ko, jailah Akupm ngagatn Iko'?"

⁴⁷ Ge', nyamani umpatn ayoa' da agutn ka teetn, jangkah ayoa' ngadangah dakoh, ayoa' nyansana, "Sok diah agi' maba' Elia."

⁴⁸ Tiba-tiba, nyungan umpatn ayoa' talama', ge' naap bunga karang, masa a' nige' paitn anggur masum, ge' ninggo'a' wa' nyabuah buro', ge' mangkatn a' wa' Yesus ya' gatnnyucur. ⁴⁹ Tapi, da laitn a' nyansana, "Kaeh ite' ile', diu'ta Elia ao' utukng nyalamat-A."

⁵⁰ Ge', Yesus ngampak nyasidah agi' nige' sarat da kuat ge' nyarah Roh-A.

⁵¹ Ge', ile', saput sadatn Bait Jabata rarak jadi dua bagian, umpatn samoo sampe ka saroh, ge' bumi baguncang, ge' batu'-batu' tabatah. ⁵² Sibur-sibur tabuka, ge' karah ungan ayo sok da suci da laka kabis gatnngabangkit. ⁵³ Ge', ngalaka mungkas umpatn sibur-sibur a', ngalaka kabangkitan Yesus, ayoa' maruh ka kota suci ge' nyua' adup a' wa' sok karah.

⁵⁴ Mati', kapala pasukan, ge' ayoa' da samahu nige'a' mangawasi Yesus, jangkah ayoa' mile' gempa bumi ge' smaan hal da tarjadi diah, ngajadi aru buut a' ge' nyansana, "Taman, Ini' anilah Anak Jabata!"

⁵⁵ Ka teetn, ani karah mahu da mile' umpatn jauh, da nganang Yesus umpatn Galilea ya' malayan Ini.' ⁵⁶ Ka antara ayoa' ani Maria Magdalena, Maria sino' Yakobus ge' Yusuf, uga' sino' umpatn anak-anak Zebedeus.

Yesus Gatnnyibur

⁵⁷ Jangkah ano mule ngarum, utukngta nyungan da kaya umpatn Arimatea da bagaatn Yusuf, da uga' nga jadi murid Yesus. ⁵⁸ Ini' anu wa' Pilatus ge' mahi ungan Yesus. Lalu, Pilatus mangkatn parintah ngadu mangkatn ungan Yesus wa' Yusuf. ⁵⁹ Ge, Yusuf naap ungan Yesus, ge' mungkus-A nige' saput blacu da barasih, ⁶⁰ ge' magurikng-A sadatn sibur da bahu, da adup a', da laka gatn ngari' wa' talidi batu'. Lalu, Yusuf mangguling nyabuah batu' ahyo ka pintu sibur dakoh ge' anu. ⁶¹ Ge', ka teetn, ani Maria Magdalena ge' Maria da lain agi' unyung ka tura' sibur dakoh.

Kubur Yesus Gatnjaga

⁶² Wa' jakkap anoa', kohta ano ngalaka parsiapan ya' Sabat, imam-imam kapala ge' ayo sok Farisi gatnngumpur ka hadapan Pilatus. ⁶³ Ayoa' nyansana, "Tuan, kai sanuut bahwa jangkah si lacceh dakoh maseh idup, Ini' suah nyansana, "Ngalaka taru ano, Iko' ao' bangkit agi'.' ⁶⁴ Karna dakoh, marintahmih supaya sibur dakoh gatnngajaga sampe ano da kataru, asi pane ayo murid-A mungkin utukng ge' nangko-A, ge' nyansana, "Ngalaka taru ano, Iko' ao' bangkit agi',' Ge', panipuan da unyhi' ao' labih jahe' daripada da pamule a'."

⁶⁵ Pilatus nyansana wa' ayoa', "Imu' ani umpu' panjaga. Anu, jagamih ulah jai da imu' pane." ⁶⁶ Lalu, ayoa' anu ge' ngaman sibur dakoh samahu nige' regu panjaga, ge' nyigel batu' panutup sibur.