Pasal 28
Peristiwa Kebangkitan Yesus
1
Mati', ngalaka Sabat jangkah ngana' asat, wa' ano pamule minggu dakoh, Maria Magdalena ge' Maria da laitn anu mile' sibur dakoh.
2
Ge, mile', tajadi gempa bumi da ahyo karna Malaikat Tuhan disah umpatn surga, utukng mambarikng batu dakoh, lakadakoh unyung ka tumukng a.'
3
Bahas a' ulah kilat ge' pangiak a' ranakng ulah salju.
4
Karna rasa buut wa' ini', ayoa' da ngajaga dakoh taguncang ge' ngajadi ulah sok da kabis.
5
Ge', malaikat dakoh nyansana wa' mahu-mahu dakoh, "Iya' buut karna iko' pane kalo imu' najo Yesus da nga gatnnyalib.
6
Ini' ti' ani ka diah karna Ini' nga bangkit ulah da gatn-Na' muji'. Kaeh, ile'lah tampat Ini' gurikng.
7
Capatlah anu ge' muji' ka ayo murid-A bahwa Ini' nga bangkit umpatn antara sok kabis, ge' ile', Ini' nyantulu' imu' ka Galilea. Ka teetn, imu' ao' mile' Ini'. Mamparhatita, iko' nga muji' a' wa'imu'."
8
Ge', ayoa' galabak- abak ngagatn sibur dakoh nige' rasa buut ge' sukacita ahyo; ge' talama' ya' mangkatn pane wa' ayo murid-A.
9
Ge', ile', Yesus amput ayoa' ge' nyansana, "Salam!" Lalu, ayoa' utukng wa' Yesus, minte kaja'-A, ge' nyambah-A.
10
Lakadakoh, Yesus nyansana wa' ayoa', "Iya' buut; anu ge' muji'lah wa' age-age-Ko' ya' anu ka Galilea, ge' ka teetn ayoa' ao' mile' Iko'."
Ayo Panjaga Sibur Gatnmayar ya' ya' Ngalaceh
11
Samantara ayoa' anu, bamani panjaga dakoh anu ka kota ge' muji wa' imam-imam kapala tentang smaan hal da nga tajadi.
12
Ge', jangkah ayoa' gatnngumpul samahu ayo tua-tua. Ngalaka barunding, lalu ayoa' mangkatn uang karah wa' ayo panjaga dakoh,
13
ge' muji', "Muji' alah, 'Murid-murid Yesus utukng wa' ngarum ano ge' nangko-A waktu kai buus.'
14
Ge', sak hal diah tadangah ka gubernur, kai ao' ngayakin a' ge' ngadumu' kati camas."
15
Maka, ayoa' nyamut uang dakoh ge' umas ulah da gatnngadu wa' ayoa'; ge' saratn dakoh maseh tarsebar ka antara sok Yahudi sampe ano diah.
Amanat Agung Yesus
16
Lakadakoh, kasabalas murid anu ka Galilea, ka bukit da nga gatn Yesus nujo' wa' ayoa.'
17
Jangkah ayoa' mile' a', ayoa' nyambah-A, bamani ani da ragu.
18
Lalu, Yesus utukng ge' muji' wa' ayoa', "Smaan kuasa nga gatnmangkatn wa'-Iko', ka surga atopun ka bumi.
19
Karna dakoh, anulah ge' umaslah smaan bangsa jadi murid, baptislah ayoa' sadatn gaatn Sama', Anak, ge' Roh Kudus,
20
jarlah ayoa' ya' nganang smaan da Iko' merintah wa' imu'; ge' mile'ta, Iko' salalu samahumu', bahkan sampe wa' pangkabas zaman."