¹ Jangkah Yesus laka muji' smaan saratn-saratn diah, Ini' nyansana wa' ayo murid-A, ² "Imu' pane bahwa dua ano agi' Paskah utukng ge' Anak Talino ao' gatnnyarah ya' gatnnyalib.

³ Lakadakoh, ayo imam kapala ge' ama-ama bangsa dakoh ao' gatnngumpur samahu ka istana Imam Ahyo, da bagaatn Kayafas. ⁴ Ge', ayoa' bapakat ya' nangkap Yesus nige' tipu daya ge' ngamis-A. ⁵ Tapi ayoa' muji', "Iya' pas parayaan supaya kati' ani karusuhan ka antara sok karah."

Yesus Gatnngangkabinyak ya' Nyungan Mahu

⁶ Mati', jangkah Yesus ani ka Betania, ka ramin Simon si Kusta, ⁷ nyungan mahu utukng wa'-Ini' nige' nyabutol guci pualam ine' dabiatn binyak wangi da batol mahal, ge' mahu dakoh nuntokng a' ka tumukng abak Yesus jangkah Ini' agi' unyung uman. ⁸ Jangkah murid-murid mile' a', ayoa' baji' ge' nyansana, "Jai pemborosan diah? ⁹ Sabab, binyak wangi dakoh bisa gatn nyual nige' raga da mahal ge' gatnmangkatn wa' da papa."

¹⁰ Tapi, Yesus, panane hal diah, nyansana wa' ayoa', "Jai imu' nyusah mahu diah? Sabab, ini' umas parbuatan bait wa'-Iko.' ¹¹ Sabab, imu' salalu umpu' ayo sok papa samahumu', tapi imu' kati' ao' selalu umpu' Iko.' ¹² Jangkah mahu diah mubuh binyak wangi ka ungan-Ko', ini' umas a' ya' nyiap ano-Ko' gatnnyibur. ¹³ Iko' muji' da sabatol a' wa'imu' bahwa ka dume saja Injil diah gatnngabar ka smaan dunia diah, jai da nga gatn mahu diah umas ao' gatn nyarita uga' sebage peringatan ao' ini'."

Rencana ya' Menghianati Yesus

¹⁴ Lakadakoh, nyungan umpatn kadua balas murid, da bagaatn Yudas Iskariot, anu wa' imam-imam kapala, ¹⁵ ge' nyansana, "Imu' ao' mangkatnko jai sak iko' nyarah Ini' wa'imu'?" Ge', ayoa' natap 30 kapikng perak ya' dini.' ¹⁶ Ge', mule dakoh, ini' najo kasampatan bait ya' nyarah Yesus.

Paruman Paskah

¹⁷ Mati', wa' ano partama Roti Kati' Baragi, ayo murid utukng ka Yesus ge' mansikatn, ka ume Akupm ngate kai nyiap uman Paskah bagi-Mu'?"

¹⁸ Yesus naham, "Maruhlah ka kota, ka sook, ge' muji' wa'ini', 'Guru muji' "Waktu-Ko' nga jiket. Iko' ao' meraya Paskah ka raminmu' samahu murid-murid-Ko.' ¹⁹ Ayo murid umas samu da Yesus laka bapesan ka ayoa' ge' nyiap Paskah dakoh.

²⁰ Mati', jangkah mule ngarum, Yesus unyung uman samahu nige' kadua balas murid. ²¹ Ge', waktu ayoa' agi' uman, Ini' nyansana, "Iko muji' da sabatol a' wa'imu' bahwa salah satu umpatn imu' ao' manghianati Iko'." ²² Ayoa' batol susah ge' masing-masing sok mule nyansana wa'-Ini', "Da pasti a', inya iko' Tuhan?"

²³ Ge', Ini' naham, "Ini', da nyihup barekng a' ka sadatn mangkok samahu-mahu Iko', ini'talah da ao' manghianati Iko.' ²⁴ Anak Talino ao' anu ulah da tatulis manganai Ini'. Tapi, celakata sok dakoh, da karna a' Anak Talino gatnhianati! Ao' labih bait bagi sok dakoh sak ini' kati' suah gatnbaranak."

²⁵ Lakadakoh Yudas, da ao' nyarah Yesus, nyansana wa'-Ini', "Pasti inya iko', Rabi?" Yesus nyansana wa'ini', "Imu' ngalaka muji' a'."

Peringatan ao' Ungan ge' Daya' Kristus

²⁶ Jangkah ayoa' agi' uman, Yesus naap roti. Ge', ngalaka memberkat a', Yesus matah-matah a' ge' mangkatn a' wa' ayo murid nige' nyansana, "Naaplah ge' umanlah, diah anilah ungan-Ko'."

²⁷ Lakadakoh, Ini' naap cawan, ngucap syukur, ge' mangkatn a' wa' ayoa', waat-A, "Imu' smaan, nyucurtalah umpatn diah. ²⁸ Sabab, diah anilah daya'-Ko', daya' perjanjian, da gatn nuntokng ya' sok karah ya' ngampun duse-duse. ²⁹ Iko' muji' wa' imu' bahwa Iko' kati' ao' nyucur asil puutn anggur diah, umpatn mati' sampe ano dakoh, jangkah Iko' nyucur anggur da bahu samahu imu' sadatn karajaan Sama'-Ko'."

³⁰ Ngalaka ngado nyabuah lagu, ayoa' anu ka bukit Zaitun.

Petrus Ao' Nyangkal Yesus

³¹ Lakadakoh Yesus nyansana wa' murid-murid-A, "Imu' smaan ao' tasingkak karna Iko' ngarum diah. Karna ani tatulis, 'Iko' ao' mangkukng gembala, ge' domba-domba umpatn kalumpok dakoh ao' tacire -bare.' ³² Tapi ngalaka Iko' bangkit, Iko' ao' nyantulu' imu' ka Galilea."

³³ Petrus nyansana, "Biarpun smaan tasingkak karna-Mu', iko' kati' ao' suah tasingkak."

³⁴ Waat Yesus kaini', "Iko' muji' da sabanara kaimu' bahwa wa' ngarum diah, katinga siap ngangkuak, imu' ao' nyangkal Iko' taru kali."

³⁵ Petrus nyansana wa'-Ini', "Sekalipun Iko' arus kabis samahu-Mu', Iko' kati' ao'nyangkal-Mu!" Smaan murid da laitn uga' muji' hal da samu'.

Yesus Badoa ka Getsemani

³⁶ Lakadakoh Yesus utukng samahu ayo murid-A ka tampat da bagaatn Getsemani ge' Ini' nyansana wa' ayo murid-A, "Unyunglah ka diah, samantara Iko' ka teetn ya' badoa." ³⁷ Ge', Ini' minsakng Petrus ge' kadua anak Zebedeus samahu-A, ge' Ini' mule baduka ge' susah ate. ³⁸ Lakadakoh, Ini' nyansana wa' ayoa', "Ate-Ko' aru tao sedih, bahkan ulah ngate kabis sa' a'. Madi'lah ka diah ge' tatapta bajaga-jaga samahu-Ko."

³⁹ Ge', Ini' agak ngajauh, lalu sujud nige' muka-A sampe ka tana ge' badoa, waat-A, "Sama'-Ko', sak mungkin, teak'lah cawan diah gatnngalewat umpatn-Ko'. Tapi, iyak ulah da gatn Iko' ngate, tapi da ulah Imu' ngate." ⁴⁰ Lakadakoh, Ini' utukng wa' murid-murid-A ge' amput ayoa' agi' buus. Lalu, Ini' nyansana wa' Petrus, "Jadi, imu' kati' sanggup bajaga-jaga samahu Iko' salama 1 jam? ⁴¹ Bajaga-jaga ge' badoalah supaya imu' iya' jantu ka sadatn pancobaan. Roh memang panurut tapi dagin lamah."

⁴² Yesus anu agi' ya' kadua kalia' ge' badoa, waat-A, "Sama'-Ko', sak diah kati' kaatn gatnngalewat kacuali Iko' nyucura, kahandak-Mulah da ao' tajadi."

⁴³ Nyasidah agi', Ini' utukng ge' amput ayoa' buus karna matu' ayoa' rasa bahat. ⁴⁴ Maka, Ini' ngagatn ayoa', ge' Ini anu agi', lalu badoa ya' kataru sidah a', ngucap saratn-saratn da samu.'

⁴⁵ Lakadakoh Yesus malik wa' murid-murid ge' nyansana, "Buusmih mati' ge' istirahat ta. Mile', waktua' mangkin jiket ge' Anak Talino ao' gatn nyarah ka barekng ayo sok baduse. ⁴⁶ Umpatlah, kaeh ite' anu. Mile', sok da nyarah Iko' nga jiket."

Yesus gatn Nangkap

⁴⁷ Samantara Yesus maseh nyansana, Yudas, nyungan umpatn kadua balas murid dakoh utukng. Samahu-mahu nige' ini', kubu' ahyo sok karah nige' padang ge' pamukol, umpatn imam-imam kapala ge' ama-ama bangsa dakoh. ⁴⁸ Mati', ini' da nyarah Yesus mangkatn ayoa' tande, waat a', "Asi da ko' nyium, kohtalah Ini', nangkaplah Ini'." ⁴⁹ Yudas capat-capat ngariket Yesus ge' nyansana, "Salam, Rabi! Ge', Yudas nyium-A.

⁵⁰ Yesus nyansana wa'ini', "Kawan, umaslah maksud pajutukngmu." Lakadakoh sok karah dakoh ngariket, mana' barekng wa' Yesus, ge' nangkap-A. ⁵¹ Ge', mile', nyungan umpatn ayoa' da samahu Yesus nyulok barekng a', narik padang a', ge' nyarang hamba imam ahyo dakoh, ge' mutong rajak a.'

⁵² Lakadakoh, Yesus nyansana wa'ini', "Mangkure' padangmu' ka tampat a', karna smaan da manggune padang ao' binasa gatn padang. ⁵³ Ato, imu' ngira iko' ti' aba' mahi wa' Sama'-Ko', ge' Ini', mati' uga', ao' mangkatn rabeh dua balas pasukan malaikat ya'-Iko'? ⁵⁴ Tapi, langkina lakadakoh Kitab Suci ao' gatnganap da muji' bahwa arus tajadi ladakoh?

⁵⁵ Waktu dakoh ta, Yesus nyansana wa' sok karah dakoh, "Anita ulah malawan parampok imu' mungkas nige' padang ge' pamukol ya' nangkap Iko'? Bilakng kano, Iko' unyung ngajar ka Bait Jabata ge' imu' kati' nangkap Iko.' ⁵⁶ Tapi ao' a, smaan diah tajadi supaya kitab-kitab ayo nabi gatngenap." Lakadakoh, smaan murid ngagatn-A ge' boho.

Ayo Pamimpin Yahudi Manghakimi Yesus

⁵⁷ Ayoa' da nangkap Yesus minsakng-A wa' Kayafas, sang Imam Ahyo, tampat ayo ahli-ahli Taurat ge' ayo ama-ama bakumpur samahu. ⁵⁸ Lalu, Petrus nganang Yesus umpatn jauh sampe ka kalangan ramin imam ahyo. Ge', Petrus maruh, unyung samahu ayo pangawal ya' mile' pangkabas a.'

⁵⁹ Mati', ayo imam kapala ge' smaan Sanhedrin najo kesaksian palsu tarhadap Yesus supaya kaatn ngukum kabis Ini.' ⁶⁰ Tapi, ayoa' kati' kaatn amput a' biarpun karah saksi laceh da utukng. Lakadakoh, ani dua sok da muncol, ⁶¹ ge' nyansana, "Sok diah nyansana,'Iko' aba' ngaruboh Bait Jabata ge' mantagutn a' agi' sadatn taru ano."

⁶² Lakadakoh, Imam Ahyo agutn ge' nyansana wa' Yesus, "Kati a' Akupm ani jawaban? Jai da ayo sok diah nyaksi tarhadap-Mu'?" ⁶³ Tapi, Yesus tatap tunguh. Ge', Imam Ahyo dakoh nyansana wa' Yesus, "Iko' nyumpah-Mu dmi Jabata da idup biar Akupm muji' ka kai, anita Akupm anilah Mesias, Anak Jabata?"

⁶⁴ Yesus nyansana wa'ini', "Imu' sadi' nga muji' a'. Tapi, Iko' muji' wa'imu' bahwa mule umpatn mati' imu'ao' mile' Anak Talino unyung ka sabalah sentao' Da Mahakuasa, ge' utukng ka tumukng rahu'-rahu' ka rangit."

⁶⁵ Lakadakoh, Imam Ahyo ngarantak pangiak a' ge' nyansana, "Ini' nga manghujat! Jailah agi' palalu saksi? Mile', mati' imu' nga dangah hujatan-hujatan-A. ⁶⁶ Langkina pamimpin Yahudi dakoh naham, "Ini' pantas gatnhukum kabis."

⁶⁷ Lakadakoh, ayoa' ngaruja' muka-A ge' ninggu-A. Ge', da laitn nampar-A. ⁶⁸ Ayoa' nyansana, "Banubuatmih tarhadap kai, he Mesias; asilah da mukol Akupm?"

Petrus Kati' Ngako Yesus

⁶⁹ Mati', Petrus unyung ka sato kalangan ge' nyungan palayan mahu utukng wa'ini' ge' nyansana, "Imu' uga samahu nige' Yesus, sok Galilea dakoh." ⁷⁰ Tapi, Petrus nyangkal a' ka tura' ayoa' smaan, waat a', "Iko' kati' pane jai da imu' nyarita."

⁷¹ Jangkah Petrus mungkas ka pintu gerbang, palayan mahu da laitn a' mile' ini' ge' nyansana wa' ayo sok da ani ka teetn, "Sok diah samahu-mahu nige' Yesus umpatn Nazaret dakoh."

⁷² Ge', nyasidah agi' Petrus nyangkal a' nige' sumpah, 'Iko' ti' kanal Sok dakoh." ⁷³ Kati' tuhi' lakadakoh, ayo sok da agutn ka dakoh ngariket Petrus ge' nyansana, "Pasti imu' uga' anilah salah satu umpatn ayoa' karna logatmu' jelas nandemu.'

⁷⁴ Lakadakoh, Petrus mule ngutuk ge' basumpah, waat a', "Iko' kati' kanal Sok dakoh." Ge', tiba-tiba, siap abakng ngangkua.' ⁷⁵ Ge' Petrus teringat ka saratn Yesus, "Katinga siap abakng ngangkua', imu' ao' nyangkal Iko' taru sidah." Lakadakoh, Petrus mungkas ge' munse' nige' aru sedih.