¹ "Lakadakoh, Karajaan Surga gatnumpama ulah sapulu dara da minsakng pelita-pelita a' ge' anu ya' nyamut penganten are. ² Rima ka antara a' anilah baga, ge' rima da laitn a' anilah bijaksana. ³ Jangkah da baga dakoh minsakng pelita-pelita a', ayoa' kati' minsakng binyak samahu a.' ⁴ Tapi, da bijaksana minsakng binyak sadatn butol inek samahu nige' pelita-pelita ayoa.' ⁵ Mati', jangkah penganten are dakoh nunda pajutukng a', ayoa' smaan ngantuk ge' buus.

⁶ Tapi, wa' tuda' ngarum ani kampak, 'Penganten are utukng! Mungkaslah ya' nyamut a'!

⁷ Lakadakoh, smaan dara dakoh umpat ge' ngamas pelit-pelita ayoa.' ⁸ Ge', da baga nyansana wa' da bijaksana, 'Mangkatnlah wa' kai iget-iget binyakmu' karna pelita-pelita kai ampir kabis.'

⁹ Tapi, da bijaksana naham, 'Kati', ti' ao' cukup jana ya' kai ge' imu'. Labih bait, anulah wa' sok da nyual binyak ge' marilah ya' da adupmu'.'

¹⁰ Samantara ayoa' anu ya' mari, penganten are dakoh utukng, ge' ayoa' da siap, maruh samahu-mahu nige' ini' ka paruman gawe inyha', ge' pintu gatnngabut.

¹¹ Ngalaka dakoh, utukng uga' dara-dara da laitna' ge' nyansana, 'Tuan, tuan! Nukas pintu bagi kai.'

¹² Tapi, ini' naham a', 'Sasungguh a', iko' muji' kimu', iko' kati' kanalmu'.'

¹³ Uleh karna dakoh, bajaga-jagalah karna imu' ti' pane ano ato waktu a'."

Parumpamaan tentang Taru Palayan

¹⁴ "Sabab, Karajaan Surga samu' ulah sook da ao' anu ka luar nagari, da maba' panyangu-panyangu a' ge' nyarah harta a' wa' ayoa.' ¹⁵ Wa' da nyungan, ini' mangkatn 5 talenta. Wa' da laitn a', 2 talenta, ge' wa' da laitn a' agi', 1 talentaa. Masing-masing sasue kamampuan a'. Lakadakoh, ini' anu. ¹⁶ Sok da narima 5 talenta dakoh lansong anu, ge' manjalan talenta dakoh, ge' ngasel 5 talenta agi.' ¹⁷ Ladakoh uga' da narima 2 talenta, ini' ngasel 2 talenta agi.' ¹⁸ Tapi, sok da narima 1 talenta dakoh anu, ngari' rubakng ka tana, ge' nyukatn uang tuan a.'

¹⁹ Tuhi' ngalaka dakoh, tuan umpatn panyangu-panyangu dakoh utukng ge' umas paritungan nige' ayoa.' ²⁰ Sok da nga narima 5 talenta dakoh ngadap ge' minsakng 5 talenta agi', waat na', 'Tuan, akupm nyarah 5 talenta wa'iko'. Mile'lah, iko' nga ngasel 5 talenta agi'.'

²¹ Tuan a' muji' wa' ini', 'Lamus tao', panyangu da bait ge' da setia. Imu' setia nige' hal-hal da inek, iko' ao' ngangkat imu' wa' karah hal, maruhlah ka sadatn sukacita tuanmu'.'

²² Ge', sok da narima 2 talenta uga' manghadap ge' nyansana, 'Tuan, akupm nyarah 2 talenta wa'iko'. Mile', iko' nga ngasel dua talenta agi'.'

²³ Tuan a' naham, 'Lamus tao', panyangu da bait ge' setia. Imu' nga setia nige' hal-hal inek, iko' ao' ngangkat imu' wa' karah hal, maruhlah ka sadatn sukacita tuanmu'.'

²⁴ Lakadakoh, sok da narima 1 talenta uga' manghadap ge' nyansana, 'Tuan, iko' pane akupm sok da kejam, manen ka tampat da akupm ti' mura', ge' ngumpur ka tampat da akupm ti' ngamhur bane. ²⁵ Karna dakoh, iko' buut, ge' anu ge' nyukatn a' talentamu' ka sadatn tana. Mile', akupm umpu'lah jai da jadi hartamu.'

²⁶ Tapi, tuan a' naham ge' nyansana wa'ini', 'Imu' panyangu da jahe' ge' lansi! Imu' pane bahwa iko' manen ka tampat da iko' kati' mura' ge' ngubu' ka tampat da iko' kati' ngamhur bane.' ²⁷ Karna dakoh, saharua a' imu' mana' uangko' ka bank ge' jangkah iko' ure', iko' ao' narima hartako' agi' nige' bunga a.'

²⁸ Naaplah 1 talenta dakoh umpatn ini' ge' mangkatnlah wa' ini', da umpu' 10 talenta dakoh. ²⁹ Sabab, satiap sok da ani umpu' ao' gatnmangkatn agi', ge' ini' ao' bakalimpahan. Tapi, umpatn sok da kati' ani umpu', bahkan jai da ini' umpu' ao' gatnnaap. ³⁰ Nyangkahatnlah panyangu dakoh ka sadatn kagalapan da paling galap. Ka tampat dakoh ao' ani unse' ge' garet japu'."

Panghakiman kat nak Talino

³¹ "Jangkah Anak Talino utukng sadatn kamuliaan-A, ge' ayo malaikat samahu-A, lalu Ini' ao' unyung ka takhta kamuliaan-A. ³² Smaan bangsa ao' gatnngubu' ka hadapan-A, ge' Ini' ao' misah ayoa' nyungan umpatn laitn a', ulah gembala da misah domba umpatn kambing-kambing, ³³ Ge', Ini' ao' mana' domba-domba ka sabalah sentao'-A, ge' kambing-kambing ka sabalah kiri.

³⁴ Lakadakoh Raja ao' muji' wa' ayoa' da ka sabalah sentao'-A,' Kaeh, imu' da gatn Sama-Ko' memberkat, warisilah Karajaan da gatnnyiap ya' dimu' umpatn pamule dunia. ³⁵ Karna jangkah Iko' saburuk, imu' mangkatn Iko' uman. Iko' aus ge' imu' mangkatn Iko' nyucur. Iko' jadi sok asing, ge' imu' ngadu Iko' maruh. ³⁶ Iko' ugakng ge' imu' nakat Iko' pangiak. Iko' anapm ge' imu' mile' Iko'. Iko' ka panjara ge' imu' utukng wa'Iko'.'

³⁷ Lalu, ayo sok taman dakoh naham -A, 'Tuan, ngina kai mile' Akupm saburuk ge' mangkatn-Mu' uman, ato aus ge' mangkat-Mu' nyucur? ³⁸ Ngina kai mile' Akupm sook asing gen ngadu Akupm maruh, ato ugakng ge' nakat pangiak wa' Akupm? ³⁹ Ngina kai mile' Akupm anapm ato ka panjara ge' kai utukng wa'- Akupm?'

⁴⁰ Raja dakoh naham, 'Iko' muji' da sabatol a' wa'imu', samu ulah da imu' umas wa' nyungan umpatn age-age-Ko' da paling inek diah, imu' umas a' ya'-Diko'.'

⁴¹ Lakadakoh, Ini' ao' muji' uga' wa' ayoa' da ka sengkiri-A, 'Boholah umpat hadapan-Ko', imu' da tarkutuk, ka sadatn api kekal da nga gatnnyiap ya' Balis ge' malaikat-malaikat a.' ⁴² Sabab, Iko saburuk ge' imu' kati' mangkatn-Ko' uman. Iko' aus ge' imu' ti' mangkatn-Ko' nyucur. ⁴³ Iko' sok asing ge' imu' ti' ngundang-Ko' maruh; ugakng ge' imu' ti' nakat Iko' pangiak; anapm ge' ka panjara, ge' imu' ti' mile' Iko'.'

⁴⁴ Lakadakoh, ayoa' naham, 'Tuan, ngina kai mile' Akupm saburuk ato aus, ato sok asing, ato anapm, ato ugakng, ato ka panjara, ge' kati' malayan-Mu'?'

⁴⁵ Lakadakoh, Ini' ao' naham ayoa', "Iko' muji' wa'imu'. Ulah kina imu' ti' umas tarhadap nyungan umpatn ayoa' da paling inek diah, imu' kati' umas a' wa'-Iko'.'

⁴⁶ Ge', ayoa' diah ao' anu ka sadatn panghukuman kekal, tatapi ayo sok da taman ka sadatn kahidupan kekal."