¹ Anuguo noomu Apaa aado maa nè, ba amongoye edjandresi Angea banè ! Aso si ma andra bandrene. Nape kanoti aama nè, kanoti siïso Angea. ² Miïba, sigaadri ma andrasi Angea banè, neyi babua nè kaï neeguondre, idri oguaïndre nè mabua pitesi ine suato maguane pitesi anè. ³ Nombi ndubu obua na k'eelikia nenè, ongobandre ne see pitesi ine sizindre è see. ⁴ Nombi ndubu esia na medede nè, angaada n'aamuri; si nodio dede a nadaadaï n'aamuriandre; ⁵ Kumbine, nutiare, Yesu ekubru niizïza odio dede, kaïneto bodio dede. ⁶ Nombi dede odria neto nè esika nodio dede, neyi esia nodio dede nè, kabru noguo nè, kabru niïti nè. ⁷ Edjandre, nombi kana nangaamba'aami mbee; nombiï esia nuukweli nè anuukweli ombi pitesi ine sizindre a nuukweli. ⁸ Neyi esia medede nè a nombiï namasumbeandre, suato namasumbe esibru namedede si atatunga; Nengwaï Angeabanè ekubru kunaada odió dedesi namasumbeane ⁹ Nombi ndubu oïandre Angeato nè esika nodio dede, suato noï Angeabanè odria neto; esika nodio dede si oïandre Angeato. ¹⁰ Nengani nè, aneï kiïtiato andrasi Angea bane bu esi namasumbe ane. Nombi pite esika nuukweli nè kaïne neyi Angea bane, a pitesi neyi oomuka miïbane nè. ¹¹ Esi kodiobru miaa bu esi nugabrune sia atatunga, aata amoomuye siayeri; ¹² Mangobumbee pitesi Kaïna, abru neyi namasumbe banè, boprubru miïbane. Oprubrune suato ? si okpamesi bandrene kabru amaáda, miïbane banè kabru mombe ¹³ Nungoriki mbee, miïbaè, idru nape etia aami, ¹⁴ Matiarè ba mafá atonzi ba atora, suato moomua miïbaè. Neyi oomukanè odria atonzi. ¹⁵ Neyi etia miïbane nè anopruombi, anuti ba nopruombi kaïnero bora gboo odria neto nè ¹⁶ Miïtibru noomu badri owobru maa norandre aamaétonè, aama siïso amawo nora bawene miïbaèto. ¹⁷ Nombi kana obunga noodu mombe napeandre nè, bogua miïba nè oomua nedu ne nè, betiato nè, noomu Angea banè atombi nè ataamuna ngania ? ¹⁸ Edjandre, nungoomumbee nookoro bu naadra, anoomu atesiame na kuukweli. ¹⁹ Idru nè matia moti ba ma ebasi nuukweliane, bametua awiïsu neto; ²⁰ Suato awiïsu kotia aama nè, Angea amekakpu biïya awiïsu; botia odio ndubu. ²¹ Miïbaè, awiïsu kakotiaamanè, marè nak'elikia nu Angea ba; ²² Obuade asua ï maninga nè, mapata inu bandre, suato mariá mari nodioï bandrene ba manumesia odiosi kombano nè. ²³ Odiosi okpato aama kasi: ba amapi atorusi Yesu-Krsistu bane, bu amoomuye siayeri pitesi owobru maa n'aamuri. ²⁴ Nombiï arià odioè nè odria Angea to ba Angea odria neto, ba miïtia ba odria aamaeto at'iïsu aowobrumaanè.