¹ A gumie na ndagba oni ani ge na da aba yugu ku? Ni kungba ki ani ambe yuyugu mbiti, Zegi o ba de ngbango ka li oni ni ndendelikpa. ² Ani nzu ani na kana nyoli na ule nzu ni mu dumu iwi go yongo mudumu ko lengbe, olengbe ba banda tiko ni ngbangba ti yongo nzu. ³ Wa mumu ano bongu molo na ngba ndogi tipoyi o gini ani. Wa muyo ani lengbe bano ndugu na ko ni ngbangba. ⁴ Ti gini kili tipoyi kukulu, ate ti na du mi yagba yugu. Mbe tutu la se ono tula se pati mo voola sako mu na bati mu du mu oyi. ⁵ Pati yo so yo a ngbo demu ni da se na kana sungu ti kpoto nzu tisu yagba yongo ti kpoto oni nzu. Oni bingo wili nda nven na lengba ba zoka yagba bili! ⁶ Ngba ni tini boli kusa kona kpoto ko ana bise wani tisu na kusa yongo nzu ti gigi me, ti na gbitikoyo ti na kulugba ti na banda wa akuoyo. ⁷ Ani mu na ndata akana ko na ye a gini ako onya bili, o zeli, awo, atiya. ⁸ NI kili gi kana a ngbako gini ko du, si ni kele nye ni gbegbeleke se ti ge na mbilika du. ⁹ Ani kana se ni sungu Tipoyi ba hu malo ti Zegi, ngenge ba ani, ani ga sengu ke ani mu Zegi kana ako na ndange sako. ¹⁰ Pati ni ngba ani na hi molo mu gbenge kpati se oni gita senge te angamye so su ni ngbangba ku. ¹¹ Mbimbili ndigi na hihi ndigi ti na kula nzeke gini kili? ¹² Agumiye ngula sa figi tiza vungu lindi sa Olive? We vinu tiza vugu we figi? tisu ndigi we mbimbili ti ge na kula gini kili ku na ndigi ti ame du. ¹³ Na ndagba ani da na ambe ndata? Da su ini yongo? Oya yo ni tu kozaga ko, olengbe sungu sako nzo na ndata. ¹⁴ Da ani ni kele yongo na kele ma ma du, no ga haha ka liga bo ali ka, oni ti kangu bita yongo. ¹⁵ Ndata mu du mu yo ti ga ti Zegi du, wamuyo ti pati ni yongo ambe Zegi medeme, ti kulu na gbegbeleke ambasina. ¹⁶ Ni kungba ku mo na nome du tina kasa kele yongo kate. ¹⁷ Ni mumu na ndata gomu ti Zegi, koso mbe fisi duko o hima gumi na ani du, o sungu ni ngbaya ni du ko ni ngbangba yongo, ona bi ndila sa ani ona kana bita yongo na ngbaya yongo, wa muyo ondenginga ani ata bati kili ku. ¹⁸ Ani mumu na kana ngbangba yongo ako ya oni mu dumu na lu dege tina vunga nako ni ngbangba.