¹ Ebwani bosa kumuja... Iyena editi bopele te. Naduabi ena na njia e boane pe na njia ebi moniseli bi Kumu. ² Najebi moto omoti atei e Klisto, olaka, enoi bianga domi na binei, andoamaka kino adiko ei sato( to edaja atei e mokuku monde najebiti, to edaka sokolu e mokuku monde najebiti, Njambe ajebi). ³ Pe najebi bo moto yona ( ekadabo edaka a mokuku monde to janga e mokuku monde najebiti, Njambe ajebi) ⁴ andoamaka a Paladizo, pe akaka meko mijanga masapo imama madimamiti ma moto ibo atonde. ⁵ Na sakwabi na tina e moto yona, kasi mbi mene na sakwabiti te, te ngasa na tina ebondoke bombi. ⁶ Ekada bo na palaki bosakwa, nadabiti moto ojangi mayele te, te ngasa na balabi soti; kasi nadi bosa siya, natina bo moto ata liya na tina e mbi posa eliko naiye ediyo bone aimbi to iye ekaka yo na tina embi. Pe na tina ebo nata luma na lolendo te, na tina e emoniseli epele ⁷ Poji bo nata luma na molumba te, a tina e bimoni binene biya, njube ji bakama na mbi ta mokuku, anjelu o moti o Satana tina e bolombi pe bosiya mbi bo nata lia njombo. ⁸ Mbala di sato nahonga Kumu a molome bohali nambi, ⁹ pe abali na mbi: Ngolu e bwani na we, te ngasa pipo e mbi eka kokejame atei bwembi. Nasa kumijabi bopele mene na posa e bwembu bo mbi, natina bo pipo e Klisto edae liko ji mbi. ¹⁰ Na tina emina nadi bosepa etei e bwemgu bo mbi, atei e botuwama, atei e mobulu, atei e minyoko, atei bojanga, poji Klisto; te ngasa, nakada na bwembu, natina e mina nadi mopipo. ¹¹ Nadaki mojangi mayele: inu osengejani mbi. Edi na njia enu na bwanaki bolomama, jambi naidaka nai jangaka eka atina di batoma ba ngambo te, atako naidaka ningo ndani te. ¹² Bidimejami mi botoma bombi bingenge a ndanda enu na njia e molema moyayi na bomekama bosusu, na njia e bilembo, misala pe makamwisi. ¹³ Na eka ndani ekobo nu na bobe bono masambo makina, emiti la bo nailaka na mokumba monu? Limbisani mbi naibunga liya. ¹⁴ Injani, poi mbala edi sato nadi mbuti e boluwa adi nu, pe nadabiti na mokumba monu; te ngasa editi na tina ebolia leka bonu, inu bene. Iditi te, na buwa, na bana basangeje leka poji baboti babu, kasi baboti basangeje na tina e bana babu. ¹⁵ Poji mbi, napabi na posa mene, pe na bungezabi mbi mene bula pozi milimo minu, nabwani bopala nu na bodolwa, napalami goti ainu. ¹⁶ To! naidaka a mokumba mo nu; elenge e moto o mayele mabe, na liya nu na mayele mabe! ¹⁷ Naliya mbano na nu na njia e bato ba balomeya mbi nu? ¹⁸ Naliya Tito na mosala akeye ali nu, pe na njia emoti na nde na lomi ngene: mbala ekina Tito ahojo nu eka emoti? Loli lala koko na njia mwembo momoti, na njia e popo ji moti? ¹⁹ Ino odio kanijani ehole eyayi idi so bomi bulisi pamba enu. Edi ta boso bo Njambe, na njia e Klisto, bodi bo tondo; pe esusu yena, bapalami, boli botondo poji bobongo bosusu bo binu. ²⁰ Te ngasa na dio banga nata tanea nu, ehole eimiale mbi, elenge epalaka mbi, pe bodae mbi mene botanea nu a elenge ekiaka nu. Natiaka bbo na ta dia daka, juwa, gbeke, miwelano, malongi, bosatekene, njombo, na mobulu. ²¹ Nadi bobanga bo a boimiya bo mbi Njambe ombi ata titija mbi naekina na tina enu, pe na ta liya boiya diko di mundi iba bako lisumu boso pe badi wombeja milema mibu ta mbindo te, ta ekobo pe bokabwana ibu bosa kaba bu.