¹ Nadioke adinu mbala edi sato. Makambo masusu ma bongejamele na njia e litatoli li bato ba baye to basato. ² Ehole edakambi ena poji mbala e ibaye, najoko, pe bisabu naditi ena nadi bojo naikina boso naiba bako masumu boso pe naiba bakina basusu bo, nakasombo ianu, nakotele ningo ngulu emoti te, ³ te ngasa odiodukani edimili bo Klisto edio tondo na mbi, yo iyo oditi mwembu ta tina enu. ⁴ Te ngasa abakama ta ekulusu na tina e bwembu bonde, kasi adi na bomoi na nguya e Njambe; iso pe, bodi bwembu atei ende, kasi bobikale na nde na njia e nguya e Njambe poji boko idiso. ⁵ Samekani inu bene, boji bojeba okadani atei e edimeli; sa mekani inu bene. Ino oditi bojebani ibo Yesu Klisto adi atei enu? Edaye mbala ekina bo omekami tini te. ⁶ Kasi nadi bojebani bo iso, iso lomekamiti. ⁷ Edi na tina yena bodi boinja Kumu ibo otakoni eka ebe te, pepe na tina bo lonene bo isobene lomekami, kasi na tina bo lokoye iye edi epele pe ibo isu, bodaye ninga iba bamekami. ⁸ Te ngasa boditi na nguya botemela bosolo; bodi na yo ko poji bosolo. ⁹ Bodi na sepi eloko ediso na bwembu, te kasa odini na ngulu; pe iye edi so bonga ta mabondeli masu, edi bobonga bosusu bonu. ¹⁰ Editi na tina yena nadi bokoma makambo ima ngonga iye na diti te, na tina bo, nakada, natada na mobeko, bokokana na bokonji bopani kumu poji bobonga bosusu pe pepe poji bobeja. ¹¹ Iye edikae, ngene bami, dani na sepi, sa bongejani, bondisanani, dani na bileli bi moti, dani na bowi; pe Njambe bopala pe na bowi adi boda nanu. ¹² Sapani epaeli e lipwepwe esenoke atei enu. ¹³ Basantu basusu bapino epaeli. ¹⁴ Ye ngolu e Kumu Yesu Klistu, bopala bo Njambe, pe na bookana bo mwembo mosenoke, bodae nano basusu!