¹ Latsin'ene'e, tenda baoi banakoli la boleka ba soomene. ² Tend'oka ngolosombo baongo'oka bayale ndjosingia, bato b'osembo,ena lolango,ena nkang'otema. ³ Tend'oka bayaato banaata mbul'iike baonga nd'oka baate libanda lina lionga en'osato, batayalake bato banahota bakambo, batayohake l'aana; ohonde balake balako banolotsi, ⁴ latsinoka batumia bahoku buuno bonokol'iyo ndanga baome baniyo la baanan'iyo, ⁵ bayale la lokanyi lonaloonga, bayotombany'iyoamene, bayohe l'esala biola,bayale bolotsi,ndjokitsakitsa eneka baome'aniyo,latsin'oka baoi bana Ndjakomba bahats'osayama. ⁶ Laka nk'oho behenga bayale la lokanyi lona loonga, ⁷ eamene yotumioka oyali ndembi ea lilako lina bikambwa biolotsi, la ndaka balako banongi,banakoli, ⁸ etendelo enonga, enehakoli ndemolama, latsin'oka bonguna aoke nsonyi, etaatake bowe bomoko bonongotendama latsin'eniso. ⁹ Laka basali bayokitsankitsa eneka bamen'eaniyo, bayaokia enyanga la baoi bahatu, batakutolake yohi, ¹⁰ batiiyake l'olem'omoko, ohonde batum'iyo bekolo l'ekolobokotua bonolotsi, latsin'oka lilako lina Ndjakomba boiki boniso likumyame l'iyo ena'oi bahatu. ¹¹ Latsin'oka ngandji ena Ndjakomba, ematselo ena loiko lona bat'oahatu, loenyuaki nko mbenyua. ¹² K'oyotolak'oka tokile bewe koko la mposa y'owe y'okili, koko tiike enisiki'ine la lokanyi lona loonga, l'osembo koko l'ekumelio ena Ndjakomba, ¹³ l'eneyalambel'iso lokanyi l'enyanga, koko leenelyo e'okoka ena Ndjakomba'ankolo koko Boiki boniso Yesu Kilito, ¹⁴ onoyohaki ende'amene latsin'eniso, latsin'oka atiikole ena bewe behetu,koko toyiile bato'anande'amene banakende'opetolaka koko banoka bikambw'inolotsi mposa mene. ¹⁵ Tenda baoi bane, laka,koko uutela mbala la mbala, la bokondji bohotu. Timelyake'ok'ate boto akotsiole.