1 Polo, bosali bona Ndjakomba, apostolo ena Yesu Kilito latsin'ena eimelyo ena banaponamaki la Ndjakomba koko la nkoto ea sosolo eneyali buun'ona ekumelyi, 2 enehiki ena lokanyi la loiko la lotsuela, lonokiyo otolakaka m'matsa nk'inisike bya kalakala la Ndjakomba onohahotaka, 3 koko onotumyaki yohi linand'eamene en'esike enande la lilako linik'iyompaka ena bolongo bona Ndjakomba onole boiki boniso, 4 Eneka Tito, bon'onami onokemi'ootaka ena eimelyo eniso'atu: tsikoka ngandji, la mwi ekohe'e enuuli bona Ndjakomba bahango koko la Yesu Kilito Boiki boniso! 5 Nkotsikaki ena Kulete, latsin'oka olongia baoi banatsiki ndongia, koko n'ko buunonokemi okolakaka, oholya ena bola l'oola mpaka, 6 kuma eata ipopo y'ooto onohakoli'oka baolemole, onosongisi booliomoko, onaata bana banimelya, atalombelamake la pite koko l'oobulu. 7 Latsina eonga nd'oka botombanyi ayale boto onohalemoliyo, yooka bokitsi'atoma tona Ndjakomba; atayalake bot'osimo, boto'ankele, bomeli baana, yombo onoyahome bato, yombo onoyakendjama la buun'omonyi bonohakoli; 8 ohonde ayale boto onoyookela bato isei, ehili ena'ato bolotsi, boto asikiliki, bot'osembo, bot'osato, bot'onahekia mposa y'owe, 9 onakangana la yohi lia somene buun'onok'iyo olakaka, latsin'oka ekolane ndakama yook'onuno balak'iyo ena lilako lina lionga koko mbitanya banaatsa ntembe. 10 Eata, yooka, biike ena ntoto'ena banatakesama mpotsi, lombondo l'aato l'obulu, banaata nkanyi yoowe koko banakoholia, 11 eonga nd'oka bomume benyua. Bahalingolya bitsimo bihitu, kuma bayalake baoi ba nsonyi banahakoli'oka balakame. 12 Omonyi enaatenyi'aniyo, bosingioniyo'amene, aotendaki'ate: Keleto bisike bihitu nko bato banayahote, nyama yeelema, bahumu banahana lotsili. 13 Litatoli liho lil'ende soomene. Nde'aho lemol'iyo lalotsili, latsin'okate baate eimelio eolotsi, 14 koko batalonganake la bahili ban'ayuda koko l'eleka bena bato banahalange sosolo. 15 Baoi bahatu bahana mbindo latsin'ena bato banahana mbindo; ohonde ehan'olemo bohana mbindo latsin'ena bato banatoli la nseho koko banahimelya, beomu ben'iyo la nkanyi in'iyo itoli la mbindo. 16 Bakamba yooka baeya Ndjakomba,ohonde balangana l'esal'eniyo, buuno boyal'iyo bato ba nseho, bato boobulu koko bahakoli l'ipopo nkamba bomol'emo b'olotsi tuu.