¹ Ambekee bwa taolama na kilisito, lingi mbeo ya liolo lesiya lebotamile Kilisito ta booho bwa botoome bwa Mungu. ² Bonangesane na mbeo ya liolo soo na hine imbe ta nyele. ³ Litambo bwangba, nde buumi bwaino bwisamile ta kilisito ambe Mungu. ⁴ Litambo Kilisito ambe buumi bwaino, aenena, enu abo bwenena boni nainde ta louma lwainde ⁵ Boli bilango bwa nyele, na boseseya na bwengengam na liindi na mbeo mbe, na kamo mbe, na kanyaka, imbe lifambani la toyandja. ⁶ Ta maita memo nde meyesa kanda ya Mungu ambe bana ba yenge, ⁷ bwendelela lo, lekeka lembe enu baito ba mapusano. ⁸ Owani hainyi mbeo fee ya bwango, na mafambani ma toyandja, na botomboki, na bokpendjeli, ta maohi mifeele moto longuma, meomoha ta menoo myaino. ⁹ Butwitita basiya, na bwaolisama na moto ya hala na masala mahala, ¹⁰ bwabata moto mofai ta bweli bokolani na ono etonga esu. ¹¹ Toti hane mo Grec na mo Yuda, namotenami limbute, na ono iya tenema limbute, na baito ba bobeyabeya, na moya, na ono ati moya; owalo kilisito ambe fee letayi la fee ¹² Ani, ambo baito ba Mungu, ba ngiaa na mioli, bati masala malomia buha, na boloo, na bomititisi, na lehai na motema mwa bwiteli. ¹³ Toolesani ta metema, ambeke omoti naa lobeo na motaku nainde mesehelile letayi laino na lelenge la mesehela kilisito, enu abo meseheli. ¹⁴ Liyolo la maita mane fee, mbi na lenange, hine imbe lebwesanelo lwa bokwaneli. ¹⁵ Hainyi lehai la kilisito, leo nde laetemo enu lita la bombi biindi bimoti, ibotame ta metema myaino. Mbi na boobi bolo bwa baito. ¹⁶ Hainya yohi la kilisito libotame obooya letayi laino, feesani malaho, na bweli na nzembo na maohi, na mehele mya menda, botweleli Mungu ta metema myaino lose ya molimo mwa botumbi. ¹⁷ Hine fee itonga boni enu, na maohi ango na masala, tongi yo na liina la Aongo Yesu, na bwineseli ye mafao ma botumbi bwa Mungu isee. ¹⁸ Batali, mbi na boelesi ambe balome baino, na lelenge lekowanile ambe Aongo. ¹⁹ Batoome nangi baali baino buto lengesa bo. ²⁰ Bana mbi na boelesi ambe baisé baino, lita imbe oloo ambe Aongo. ²¹ Ba Isé botohowesa bana buha lita bitomba na bohenaa henu. ²² Basali mbi na boolesi ambe Mekonzi lelenge la biindo, soo nga ta maiso maibo, lita bwenene ambe baito, nde na botitisi metema, na bobangi Aongo. ²³ Botonga mbeo, tongi na motema molo na lelenge la Aongo soo na lelenge la baito. ²⁴ Obi mbo bobwa boni ambe Aongo lisomba ambo lifuti. Saleli kilisito Aongo. ²⁵ Lita ono etonga na koliana ebola foo koliana, imbele aboni boponami bwa moto.