¹ Ta lone lwitile liise la aongo Yesu kilisito, na lisanga laiso nainde, baelo toalomba enu, ² butwitemo na bofafu ta mombani molo bombe naibo, buto lisa buumi lolo, ambe ta bweli bwa mwenda, ambe ta lelenge la maohi, ango mokanda mobeya bo mbo mwaoloha ambe esu, ambo liise la Aongo laabwesa. ³ Moto itwitita enu ango na bweli bomoti, lita mbo lekeka la bwititesami bokolane felo, na bweni moto ya lipusano ye moona ya bolisisi, ⁴ mwemaleli aemala liolo la hine laeta bo mbo Mungu, line libondela bo, lwabotama ta mbele ya mungu, libeela baito inde angene mbo ambe Mungu. ⁵ Boti boluhanya enu bangene mbo nebeilé enu maita mane na lekeka lembá emi letayi laino? ⁶ Owani boobile line libwele ye ambo itenena owani botambesi ye lekeka lainde. ⁷ Lita mbo bweli bwisamile lwa bwititi bwabanda lisala itialile nga mbo ono abweleye aolohe. ⁸ Mbisa ya hiyo ono mobe enena boni, Aongo Yesu esesehelesa boni ye na lifofela lainde la moono, bolimoli ye ta monyanya mwa liise la Aongo. ⁹ Bweneni bwa moto oho mobe eobana boni na masala ma lwili ya satana, na bikamwiseli, na mandimbo na bikamwa bya bwititami. ¹⁰ Na bwititi fee bwa obe ambe bane bengba lita bitenangá loundo loomongo lita la buumi. ¹¹ Owalo Mungu atomela bo lwili la bolisesi, baimele lokuta ¹² lita la bane fee bitimela omoongo, baabola lenange laibo ta maita miti na omoongo, ba boleme. ¹³ Ambe esu, baoli ba Aongo tokolanise bwineseli Mungu leboto, lita Mungu eminola esu tobole buumi to ta lebandeli, boseli esu ngiaa na mwenda mwainde na bwimeli bwa omoongo. ¹⁴ Lita laaho eeta enu ta mboli njo ya Yesu, na ndole yaiso, ambo bobole longuma la Aongo Yesu kilisito. ¹⁵ Owalo, baoli emali ta bwimeli na bobwi manaho mebola enu na ndole ya liohi laiso ambeke na ndole ya ngoto yaiso. ¹⁶ Hainya mbo Aongo Yesu kilisito yangene, na Mungu isee yaiso ono enanga esu, affelé esu botumbi na bofafemi bwa omoongo na lingani lilo. ¹⁷ Fafi metema myaino na bolakesami masala malo na maohi malo.