¹ Naho ambe esu baito babozangi botambisi ambe esu, bobwi mekano na botiali ta Athenes esu bangene. ² Twa tomela enu Timote mwelo motome, mosali mwa Mungu. Lita la bofi enu lwili na bofafi enu liolo la bwimeli bwaino. ³ Litambo moto ito kpaa letayi la metulungi lene lembe sikené; lita boobile mbo tombe letayi laho. ⁴ Na lekeka lembe esu tiitina yaino, tobeyela enu ofelo mbo tomba boni na metulungi mené mabwesela enu naboni lelenge looba enu. ⁵ Na lelenge laami la bwimeleli mbeo, na tomela enu maohi ta bwimeli bwaino, ta babaangi mbo mwititai, itiitita enu, lita tutongba lisala lekaka. ⁶ Owalo Timote ayaa fo owani ambe enu, afaa esu mboli ndjo ya bwimeli bwaino na loundo, aobesa aabo esu mbo bombé naesu maluhani maloo, bombé naa kamo ya boeni esu, esuabo tombé na kamo ya boeni enu. ⁷ Taa tungu, baelo batoome, letai la lohó na myundu mobwa esu, twabwa bofafemi naino ta bwimeli bwaino. ⁸ Twaluha sikene, lita mbo, bwabotamá ngbii ambe Aongo. ⁹ Iyasé yaho lifao ya leboto tokowana bofii Mungu lita laino, na lenange lene labwa esu ambe enu felo ya Mungu! ¹⁰ Etiyo na looha tombe tobondela na lwili bweni enu na bobakisi lihwa line lazanga ta bwimeli bwaino. ¹¹ Mungu yangene, isee yaiso, na Aongo yesu bobongeseli esu ndole, toye ambe enu. ¹² Hainya Aongo abakesela enu mbala na mbala, letayi laino na lelenge la loundo laambá naino ambe esu. ¹³ Lita la bwimelesi metema maino lita litomba nalipusano so na liindi felo ya Mungu Isee yaiso, na lisé la Aongo Yesu na baimeleli baindé fee.