¹ Yesu aikonda a bwato, aiyeka mobhangi, pe aikee a gbata yaande. ² Bhaimowayea ebhosono, aisama dhiko dha ndjenga. Aeneke bhondima bhabhu, Yesu aibuka na ebhosono: Dhaa na ngudhu, mwana mbi, masumu mawe malimbisami. ³ Haa bhoa, bhadhiledhi na bhitumba bhamoti bhaiyabukia tei yaabhu: Mogendja oobho akaisa a siyo ya Akongo. ⁴ Yaadjea Yesu maleeni mabhu a milema manu? ⁵ Yomande eke petee bhobia, bhobuka: Masumu mawe malimbisami, too bhobuka: Djawa pe somba? ⁶ Bhoo odjeeni bho Waana wa mogendja ake a ndebha na makoki ma limbisake masumu: Djawa, aibuka na ebhosono, tomba ndjenga wawe, pe hana pambe ya we. ⁷ Aidjawa, pe aikee pambe yaande. ⁸ Mongindi moeneke bhoa, moikamoa, pe moihekedja Akongo, oobho onyei bhagendja ngudhu ya bhokopo bhua. ⁹ Akeeke bhohadhi, Yesu aiyene mogendja omoti aidhaa a siyo wa bhofutidja pako, dhiina dhande Mateyo. Aibuka naande: Djuani. Mogendja ona aidjawa, pe aimodjua. ¹⁰ Yaadhaaka Yesu a mesa a eise, bhafutidji pako bhanene pe bhasumuki bhaidhadhoa naande a mesa siyo emoti na bhayekoli bhande. ¹¹ Bhafalisayo bhoene bhoa, bhaibuka na bhayekoli bhande: Yomande molakisi waanu akaaka siyo emoti na bhafutidji pako pe na bhasumuki? ¹² Yesu yaoka iyo, aibuka: Ye bhagendja bha mokuku mopele bhakanukane monganga, kasi bha bhipeko. ¹³ Keeni bhokaokoa yomande: Nipali iwa, ye mbeka. Bhoo niadhoati bhodhabhea bha sembo, kasi bhasumuki. ¹⁴ Bhayekoli bha Yoane bhaidhoa pambe ya Yesu, pe bhaibuka: Iso na bhafalisayo ekahee ndjaa, bhayekoli bha we tebhahee ndjaa, aye? ¹⁵ Yesu aibhahulindja: Bola dja moomi odjongi bhooso bhakoki bhodhaa iwa poko moomi owosi ake naabhu siyo emoti? Masu maadhoa bhaadhoa bhaabhadjoodje moomi owosi, nga bhaahee ndjaa. ¹⁶ Tebhatombe ekenge ya esindje enyie bhaeise dhikpate a esindje ya gala; bhoo ekenge ena yaatsala esindje, pe yaatsalea bhobiya. ¹⁷ Tebhaise maana manyie a moongo ma gala; modhaiti bhoa, moongo maaleea, maana maasosea, pe moongo maabheha; kasi bhakaise maana manyie a moongo manyie, maana pe moongo maabhaneana. ¹⁸ Yateteke iyo naabhu buka djia, Kumu omoti aidhoa, aigbueme midhi libhoso dhande, pe aibuka: Moseka wa mbi adjongi bhogwaa kasi dhamoisee mabho, pe aahela. ¹⁹ Yesu aidjawa, pe aimodjua siyo emoti na bhayekoli bhande. ²⁰ Wadhi omoti waapundjaka makiya bhiyanga zomi na bhibhale aidhusua saa mabheke, pe aipoto songe ya esindje yaande. ²¹ Bhoo aabhukiaka iyo meene: Nimapoto oko esindje yaande, niahela. ²² Yesu aiyahombea, bhomoene, aibuka: Tobhange, moseka wa mbi, bhondima bha we bhooheledji. Pe wadhi ona aihela oko na poko ena. ²³ Yaatobha Yesu pambe ya Kumu, aiyene bhagendja bhaabhoma limbili pe mongindi djoo, ²⁴ aibuka naabu: Kumbani dhingongo; bhoo moseka agwiti, ahei. Pe bhamosekeke. ²⁵ Mongindi mopundjaka, aingia, aipea ebho ya moseka, pe moseka ona aidjawa. ²⁶ Mosambo moisomba kpaka ena esusu. ²⁷ Yesu anyooko haa, bagendja bha bhaadjipi bhabhale bhaimodjua, bhaapama: Eyokea iwa, Waana wa Davidi! ²⁸ Yaatobha iyo a eise, bhagendja bha bhaadjipi bhaiyadinda pandhi naande, pe Yesu aibuka naabhu: Ondimini bhoo nikoki bhokoo bhoa? Bhaimohulidja: Iyo, Kumu. ²⁹ Aipoto miiso mabhu, abukaka: Mokomene naanu bhodjuana na bhondima bhanu. ³⁰ Miiso mabhu maiyadhupua. Yesu aisua bhiokedhi bhabhu makasi: Abhaneani bhoo mokando mubho temodjeane. ³¹ Kasi oko na epundjake, bhaisombedja mosambo mande ngando mobimba. ³² Yaakeeke ibho, seleke, bhaiwayea Yesu mogendja omoti wa bhilimo bhibhehu abhubhubhu. ³³ Abhenganaka amembo, abhubhubhu aibuka. Mongindi moakamwa mobuka: Eyenekini mokando bhokopo bhubho a Isalayele. ³⁴ Kasi bhafalisayo bhaibuka: Akabhengana bhaamembo na ndjia ya Kumu wa bhaamembo. ³⁵ Yesu aasomba gbata pe ngando susu, bhokaatee a bhasinagoga, bhokaasakole mboli epele ya bhokumu, pe bhokaaheledje bhipeko pe bhiyemee bhisusu. ³⁶ Bhoene mongindi, ailuma na iwa, bhoo moadhaaka na pola pe bhoembe, ndje pate bhati na mokengeli. ³⁷ Aidhabuka na bhayekoli bhande: Eyanga eke enene, kasi bhasali bhake bhotsedhu. ³⁸ Abhelani na meene eyanga alinde bhasali a eyanga yaande.