¹ Yesu aibhea bhayekoli bhande zomi na bhabhale, pe aibhanyea ngudhu ya bhobhengana bhilimo bhibhehu , pe bhoheledja bhipeko pe bhiyeme bhisusu. ² Enekeni miina ma bhapostolu zomi na bhabhale. Wa libhoso, Simoni okabhee Petelo, pe Andele, maanyango; Yakobo, waana wa Zebedeo, pe Yoane, maanyango; ³ Filipo, pe Batelemi; Toma, pe Mateyo, mofutidji pako; Yakobo, waana wa Alfeo, pe Tadeo; ⁴ Simoni wa Kanana, pe Yuda Iskaliota, oobho waamokabha Yesu. ⁵ Ena eke bha zomi na bhabhale bhailinda Yesu, lingongo dhande bhobhanyea mibheko miibho: Tokeeni pambe ya bhapagano, pe toingeeni a gbata dja bhasamalia; ⁶ keeni pambe ya pate djiabhunga dja litungu dha Isalayele. ⁷ Keeni bhokatee pe bukani: Bhokumu bha dhiko bhoke padhi. ⁸ Heledjani bhagendja bha ngoni, susudjani bhagendja bhago, petolani bhagendja dja maba, bhenganani bhaamembo. Odhisini edjegi, nyeani edjegi. ⁹ Totombeni wolo, palata, faanga a bhoongo bhanu; ¹⁰ ye mogbolo akpuli ya mondo, ye mikoti mibhale, ye bhikoto, ye engbongbo; bhoo mosali abhongi na lifuti. ¹¹ Omaingiani a gbata too a maa ngando omoti, hedjooni inga mogendja mooyambakeni akoki bhodhisana; pe dhaani pambe yaande tee yaanyoo ino. ¹² Yaaingiani ino a eise, nyeani agbaya; ¹³ pe, eise ena emalongobhana, kimya yaanu edhaa haa; kasi elongobhaniti, kimya yaanu eehuleeni. ¹⁴ Bhamokiani bhooyamba pe bhamangana bhooka buka djanu, pundjani a eise ena too a gbata ena pe pupani motubhetubhe ma bhikoto bhanu. ¹⁵ Nikaadjeedjani menemene: bhusa bha esambiselo, ngando ya Sodomo na Gomola yaadhisa etumbu bhotsedhu bhobia gbata ena. ¹⁶ Seleni, nikaalindani ndje pate tei ya sowa. Dhaani na bhokengi ndje ndjoo, pe bhohalahala ndje bhidhua. ¹⁷ Abheani na bhagendja; bhoo bhaadhumbani a siyo dhikakese ibho ngbanga, pe bhaakutani fimbo a bhasinagoga djabhu. ¹⁸ Akpuli ya mbi, bhaakeeni naanu libhoso dha makumu ma bhingumba pe makumu ma ataata, bho otatoleni a miiso mabhu pe ma bhapagano. ¹⁹ Kasi, poko yaadungidjaibhi ibho, toatungiseni a bhokopo nde bhoatete ino pe yomande yaabuka ino: waadhisani mokando mobukake ino oko poko ena; ²⁰ bhoo ye ino bhabuka, Molimo ma Sangwanu moabuka tei yaanu. ²¹ Wana moomi aodjedja maanyango, saa moto wana waande; ngbongi djiamea bhaboti bhabhu, pe bhaabhao wedja. ²² Bhagendja bhasusu bhaalonani akpuli yambi; kasi oobho waanyanga molema tee suka aahela. ²³ Bhamaanyokoloni a gbata emoti, tiani agbata edii. Nikadjeedjani menemene, yaadhaa mee okomadjakini bhodhekadheka na gbata dja Isalayele dhaako Wana wa moto aidhoa. ²⁴ Moyekoli ati liko dha molakisi, ye pe mobhudhi liko dha Kumu waande. ²⁵ Mobhongi bho moyekoli adhaa ndje molakisi waande, pe mobhudhi ndje Kumu waande. Bhamabhea meene eise Belzebula, mbala ndjeka yaabhea ibho bhagendja bha eise yaande! ²⁶ Tobhabhangni; bhoo mokando ma libhombi nakomomoti motakia bhopundja a bhohoyee, too ma kuku mokie bhodjeana. ²⁷ Mubho mokaadjeedjani mbi a modhidhi, mobukani na bhusa bhohoyee; mubho moodjeedjini ibho a bhiyokedhi, motangusani liko dha miandja. ²⁸ Tobhangeni bhabho bhakawoo mokuku kasi molimo kati; bhangani oobho ake na makoki ma bhobhehedja molimo na mokuku a lifelo. ²⁹ Tebhaengedje bhidhua bhabhale likuta limoti? Nako bhoa, nako omoti teakwa a ndebha ingako Sangwanu apaliti. ³⁰ Nako see djanu djidjeani molango ma ina. ³¹ Tobhangeni: obiini bhidhua bhatutu na motiyo. ³² Mainanga, mogendja mosusu waatangusani a bhohoyee, mbi pe niamotangusa libhoso dha Yaa oobho ake liko; ³³ kasi mogendja mosusu waanganani a bhohoyee, mbi pe niamongana libhoso dha Yaa oobho ake liko. ³⁴ Toingeni bho nidhoi bhodhaisa kimia a mongali; nidhoiti bhodhaisa kimia, kasi likongo(ngwa). ³⁵ Bhoo nidhoi bhodhaisa bhogbaana tei ya waana moomi na sanga, tei ya waana wadhi na nyango, tei ya wadhi wa ngoi na naa moom'ande; ³⁶ pe litungu dha we dhiatobha bhanguna bha we. ³⁷ Oobho okapale sango too nyango bhobia mbi, angemeniti na mbi, pe oobho okapale waan'ande wa moomi too wa wadhi bhobia mbi angemeniti na mbi; ³⁸ oobho toowaa ekuluse yaande, pe toodjueni, angemeniti na mbi. ³⁹ Oobho waabhanea ehele yaande aebhungidja, pe oobho waabhungidja ehele yaande akpuli ya mbi aedhisa. ⁴⁰ Oobho waayambani, ayambini, oobho waayambani, ayambi oobho waalindani. ⁴¹ Oobho waayamba mosakoli ndje mosakoli aadhisa lifuti dha mosakoli, pe oobho waayamba moyengebene ndje moyengebene aadhisa lifuti dha moyengebene. ⁴² Pe mogendja mosusu waanyea nako ekpaka emoti ya dhua ya bhode na omoti wa bhabho bhabhodjelele bho ake moyekoli wa mbi, nikaadjedjani menemene, atadjanga lifuti dha nde