¹ Yesu amadjaka bhonyea mikano mande na bhayekoli bhande zomi na bhabhale, aidjawa haa, bhokalakise pe bhokatee a gbata dja ngando ena. ² A boloko yaande, Yoane bhooka ngando djiakooko Klistu, ailinda bhayekoli bhande bhabhale bhakahedjoo: ³ We nga waadhoa, ingako eyambe odii? ⁴ Yesu aibhahulidja: Kadjeedjeni Yoane eebhe ekaoka ino pe ekaene ino: ⁵ bhagendja bha bhaadjipi bhakaene, bhibhosono bhakasomba, bhagendja bha kebhukebhu bhakapetolama, bhagendja bha bhaagbo bhakaoka, bhago bhakasusua, pe bhakatelee bhadjangi mboli epele. ⁶ Mosepi ma oobho otadhaa mbi ekumu akpuli yaande! ⁷ Yaakeeke ibho, Yesu abukaka na mongindi akpuli ya Yoane: Ye ekei ino bhokaene a ngbengee? linganga dhikaligidja mopepe? Kasi, ye ekei ino bhokaene? mogendja waatumei ngbondolo? Seleni, bhabho bhakaatumee ngbondolo bhake a bhiise bha makumu. ⁹ Okaenini ye? mosakoli? Bhoa, nikaadjeedjani, bhobia mosakoli. ¹⁰ Bhoo akpuli yaaande nga yaadhila ibho: Sele, nikalinda abukedhi wambi libhoso dha we, bho aaluwe ndjia ¹¹ Nikaadjeedjani menemene, tei ya bhabho bhabhotmi na bhadhi, mobiake Yoane Mobatisi atike. Nakobhoa, wa maabhotsedhu a bhokumu bha dhiko amobii iyo. ¹² Botangea poko ya Yoane Mobatisi tii bheendee, bhokumu bha dhiko bhodhi bhosungianake, pe bhagendja bha ngudhu bhaabhokatoa. ¹³ Bhoo bhasakoli bhasusu pe mobeko bhaatete tii a Yoane; ¹⁴ pe, omapalani bhomasosolo, iyo nga Elia waadhaaka bho adhoo. ¹⁵ Oobho oke na bhiyokedhi bhoo aoke. ¹⁶ Niangemedje ekeke eebhe na nda? Engemeni na ngbongi bhadhai a mikenge pe, bhaabuka na ngbongi djidii, ¹⁷ bhateteke: Eebhomeini kpengbe (limbili), ye bhoo obhueni; eieyembeani bhiyombo bha eduma, ye bhoo waatateni. ¹⁸ Bhoo Yoane aadhoa, aakakete pe anungakete, bhaibuka: Ake na amembo. ¹⁹ Waana wa Moto aidhoa, aakaka pe anungaka, pe bhaibuka: Mogendja wa bhoyo pe anungedhi, amina na bhafutidji pako na bhasumuki. Kasi ndata yaaenene sembo na misala mande. ²⁰ Aitangea bholaa pamea na gbata djibho djiakoo iyo makamwisi manene, bhoo djiahombedjati milema. ²¹ Iwa na we, Kolazina! iwa na we Betesaida! bhoo, makamwisi maakomeene pambe yaanu makomeeneke a Tire pe a Sidona, ndje bhaahombea gala, bhawaa saki pe bhadhaa a mihulu. ²² Mainanga ekaadjeedjani mbi: bhusa bha esambiselo, Tire na Sidona bhaadhisa etumbu bhotsedhu bhoobia ino. ²³ Pe we, Kafarnaume, bhaadjamba tee a dhombe? Kati. Bhaatitidja tee a ngando ya bhago; bhoo, makamwisi maakomeene pambe ya we makomeeneke a Sodomo, ndje adhi tee esabhu. ²⁴ Mainanga ekaadjeedjani mbi: bhusa bha esambiselo, ngando ya Sodomo yaadhisa etumbu bhotsedhu bhoobia we. ²⁵ Na poko ena, Yesu aibuka: Nikaakumisa, Yaa, Kumu wa dhombe na ndebha, ndje yaabhombea we bhagendja bha ndata na bha agbonga ngando djibho, pe aidjiningidja ngbongi. ²⁶ Bhoa, Yaa, nikaakumisa bhoo omopali bhoa. ²⁷ Ngando djibho susu Yaa waadjinyeani, pe mogendja nako omoti adjeiti Waana, edhaiti Yaa; mogendja omoti nakina adjeiti Yaa, edhaiti Waana pe oobho Waana apali bho amoningidje. ²⁸ Dhoani pambe ya mbi, ino bhasusu bhaembi pe bhaliti na miina, nianyeani siyo ehemake. ²⁹ Atingiani mondiki mambi a dholi pe ndimani mibeko ma mbi, bhoo nike bhodee pe molema moatitidjake; pe waadhisani siyo ehemake ya milimo manu. ³⁰ Bhoo mondiki mambi modhi bhodee, pe muuma mambi bhohalahala.