¹ Na poko ena, Yesu aiyekedja bhiyanga bha mbuma dja mapa bhusa bha yenga(sabato). Bhayekoli bhande, na ndjaa, bhaitangea bhopoa madjembe pe bhoaka. ² Bhafaliseyo bhaeneke bhoa, bhaibuka naande: Sele, bhayekoli bhawe bhakakoo eyoma eebhe elembei ibho bhokoo bhusa bha yenga. ³ Kasi Yesu aibhaanea: Olangiti mubho mwakoo Davidi, poko yaamopeka ndjaa, iyo na bhaaminande bha mondo; ⁴ ndje yaaingia iyo a eise ya Akongo, aiyaka mapa masatisake, mabho maabhongoti iyo bhoaka, ye pe bhaaminande bha mondo, pe mabho oko bhasali mbuki bhaakaka? ⁵ Too, olangitini a mibeko bho, masu ma yenga, bhasali bhakabhuka sabato a tepelo, ye bhoatitidja a ngbanga te? ⁶ Nzokande, eke aabho na eebhe ebhii tepelo. ⁷ Odjeakeni yomande: Nipali iwa, ye mbeka, ndje otitidjitini a ngbanga bhabho bhakoiti mokando. ⁸ Bhoo Waana wa Moto ake Kumu wa sabato. ⁹ Adjawaka haa, Yesu aingia a sinagoga. ¹⁰ Mogendja omoti wa ebho ekokotake aadhaaka hoo. Bhaihedjoo Yesu: Endimisami bhohedja mogendja bhusa bha yenga? Yaadhaaka bho bhadhise ndjia ya bhomotsongele. ¹¹ Aibhaanea: Nda tei yaanu, amadhaa oko na pate omoti pe akwaa a libheya bhusa bha yenga, atakee bhokamoifa? ¹² Mogendja abiiti pate! Endimisami bhokoo bhopele masu ma yenga. ¹³ Lingongo aibuka na mogendja: Djamba ebho ya we. Aiedjamba, pe eitobha ndje eebhe edii. ¹⁴ Bafaliseyo bhaipundja, pe bhaingia londo(likita) bhonukana bhokopo bhomoowake. ¹⁵ Kasi Yesu adjeaka bhoa, aiyatinda bhohadhi na siyo ena. Mongindi monene maimodjuwa. Aiheledja bhagendja bhasusu bhapekake, ¹⁶ pe aibhakokosia makasi bho tebhamoningidje, ¹⁷ bhoo mokando moatelee mosakoli Isaya mongemene: ¹⁸ Sele mobhudhi wambi ohoi mbi, lipalano dha mbi oisei mbi molema. Niaisa Elimo yambi liko dhande, pe aasakola bhasalo a (ma)ngando. ¹⁹ Atangana, atakpoloa, bhataoka dhoi ndhande a mikenge. ²⁰ Atakese linganga dhibhuake, atadhina bhokopo bhoyoake, tee yaaenedje iyo bhosolo. ²¹ Pe ngando djiaisa elikia a liina dhande. ²² Lingongo bhaimodhoyea mogendha wa bhaamembo bhaadjipi pe abhubhubhu, pe aimoheledja, abhubhubhu aibhanda bhobuka pe bhoene. ²³ Mongindi mobimba moikamwa pe moibuka: Ye Waana wa Davidi ona? ²⁴ Bhafalisayo bhooka bhoa, bhaibuka: Mogendja oobho akabhengana bhaamembo na ndjia ya Belezebula, Kumu wa bhaamembo. ²⁵ Ndje yaadjeaka Yesu maleeni mabhu, aiduka naabhu: Bhokumu bhosusu bhokagbaane ibho bheene bhokabombe, pe gbata too litungu lisusu dhikagbaane idho meene tedhiemaa. ²⁶ Satana amabhengana Satana, aagbai iyo meene; bhokumu bhande bhwaemaa ndenge nde? ²⁷ Pe mbi, nimabhengana bhaamembo na ndjia ya Belzebula, ngbongi djanu dja bhami, bhakabhabhengane na ndjia ya nda? Mainanga bhaadhaa ibho bheene badjudji bhanu. ²⁸ Kasi, nimabhengana bhaamembo na Molimo ma Akongo, bhokumu bha Akongo bhodhai pambe yaanu. ²⁹ Too, bhokopo nde bhoingiake mogendja omoti a eise ya mogendja wa ngudhu pe asangoo bhogumake bhande, anyangakiti mee na panga mogendja ona w ngudhu? Lingongo dhainanga aasangoa eise yaande. ³⁰ oobho etike na mbi ake monguna wa mbi, pe oobho otikaukia nambi siyo emoti akagbangboa. ³¹ Mainanga ekaadjeedjani mbi: Lisumu lisusu pe bhotuka Akongo bhoalimbisama, kasi bhotuka Molimo bhoyalimbisama. ³² Mogendja mosusu waabuka bhobhehu na waana wa moto, bhaamolimbisa; kasi oobho waabuka bhobhehu na Molimo Mosatu, bhatamolimbisa masu mabho nako masu makadhoa. ³³ Bukani bho mole moke mopele pe embuma yaande eke epele, too bukani bho mole moke mobhehu pe embuma yaande eke ebhehu; bhoo bhakadjee mole a embuma yaande. ³⁴ Matungu ma mabhate, bhokopo nde bhobukake ino ngando pele, mogendja bhakandjake ndje ino? Bhoo monoko mokaife eebhe elumi a molema. ³⁵ Mogendja mopele akaife ngando pele a ebombelo yaande epele, pe mogendja mobhehu akaife ngando bhehu a ebombelo yaande ebhehu. ³⁶ Nikaadjeedjani: bhusa bha esambiselo, bhagendja bhaafutaibhi buka susu bhehu djiaifa ibho. ³⁷ Bhoo buka djawe djiaheledjaibhi, pe buka djawe djiaatitidjaibi a ngbanga ³⁸ Bhamoti na bhakasele mobheko pe bhafalisayo bhaibuka: Molakisi, ekapala eyene likamwisi pambe ya we. ³⁹ Aibhaanea: Ekeke ya kandja pe ya ekobho ekaonga likamwisi; bhataenyea likamwisi dhidii edhaiti oko dha mosakoli Yonasi. ⁴⁰ Bhoo, oko ndje yaakoo Yonasi masu masato pe mabhulu masato a sopo dja mosu monene, okobhoa Wana wa Moto aakoo masu masato pe mabhulu masato a sopo dja ndebha. ⁴¹ Bhusa bha esambiselo, bhagendja bha Ninive bhaaemaibhi na ekeke eebhe pe bhaekwedjeibhi a ngbanga, bhoo bhaahombedja milema na malakisi ma Ymasi; pe seleni, eke aabho obii Yonasi. ⁴² Bhusa bha esambiselo, Wadhi Kumu wa midi aaemaibhi na ekeke eebhe pe aekwedjeibhi a ngbanga, bhoo aadjonga a suka ya mongali bhodhaoka ndata ya Salomo, pe seleni, eke aabho obii Salomo. ⁴³ Molimo ma mbindo momapundja a mogendja omoti, aakee a siyo dja bhokolokolo, bhokaanukane siyo ehemake, pe ataedhisa. ⁴⁴ Aabuka: Niakumba a eise yambi oho epundji mbi; pe, amatobha, aetana bhohoyee, eyombooke pe bhaiyebhongedje. ⁴⁵ Aakee, aatomba milimo midii sambo mikandjake bhomobia iyo; bhaingia a eise, bhaadhaa, pe bhokopo bha mogendja ona bhoatobha bhobhehu bhobia bha libhoso. Yaadhaa imo bhoa na ekeke eebhe ekandjake ⁴⁶ Yaadhaka Yesu aatete na mongindi, nyango pe bhamaanyango, bhabho bhadhaaka tiambo, bhanukanaka bho bhabuke naande. ⁴⁷ Mogendja omoti aibuka naande: Ngwaa pe bhamaangwaa bhake tiambo, pe bhakanukana bhabuke na we. ⁴⁸ Kasi Yesu aiyanea oobho oobho waabukaka naande: Nda ima, pe bhanima bhanda? ⁴⁹ Lingongo, aidjamba ebho liko dha bhayekoli bhande, aibuka: Seleni ima pe bhanima. ⁵⁰ Bhoo, oobho akakoo posa ya Yaa wa liko, ona ake waanima, ngianambi, ima.