¹ Bhusa bhua, Yesu aipundja a eise, pe aidhoa a mogboo ma mobhangi. ² Mongindi monene mwaukiaka padhi naande, aikonda a bwato, pe aidhaa. Mongindi mosusu moadhaaka a mokulukulu. ³ Abukaka naabhu na matsaatsa liko dha ngando nene. Aibuka. ⁴ Ayonedhi omoti aapundja bhokaona. Yaaonaka iyo, mbuma djimoti djiikwaa na ndjia: mbudhu bhaidhoa, pe bhaidjiaka. ⁵ Djidii djiikwaa liko dha mabhanga, oho yaadhaakati ndebha nene: djiigbaa ebhango, akpuli bho djiatanati ndebha bhoduu; ⁶ Kasi, moi mokpandjaka, moidjiongedja pe djioma, a bho djanga bha ndjedhi. ⁷ Djidii djikwaa a ndjubhendjubhe djiipinga, djiidjiowa. ⁸ Djidii djiikwaa a ndebha pele: djiibhota, emoti kama, emoti tuku motobha, edii tuku djisato. ⁹ Oobho okena bhiyokedhi bhiokake aoke. ¹⁰ Bhayekoli bhaiyasua padhi, pe bhaibuka: Okabuka naabhu na matsaatsa aye? ¹¹ Yesu aibhaanea: Akpuli bho ino waadhisa ngolu ya bhodjea mibombamo ma bhokumu bha liko, ibho bhaaedhisati. ¹² Bhoo bhaanyea oobho oke na eyoma, pe aabhekedja, kasi otike na eyoma bhaamokatoa nako eebhe eke iyo naayu. ¹³ Mainanga ekabuka mbi naabhu na matsaatsa, bho bhamasele tebhaene, bhamalamba bhiokedhi tebhaoke pe tebhasondjee (mokando). ¹⁴ Akpuli yaabhu lisakoli dha Isaya dhingemeni: Waaokani na bhiokedhi bhanu, pe otasondjeani yoma; Waaseleni na miiso manu, pe otaeneni yoma. ¹⁵ Bhoo molema ma litungu dhibho motobhi bhokolokolo; bhaisi bhiokedhi bhabhu a ndindo, pe bhaidandea miiso mabhu na bhopoko, bho tebhaene na miiso mabhu, tebhaoke na bhiokedhi bhabhu, tebhasondjee a molema mabhu, tebhahambendje molema, pe tenibhaheledje. ¹⁶ Mosepi ma miiso, akpuli bho makaene, pe bhiokedhi bhanu, akpuli bho bhikaoka. ¹⁷ Nikaadjeedjani menemene, bhasakoli pe bhayengebene bhanene bhake na posa ya bhaene mokaene ino, pe bhamoeniti, bhooka mokaoka ino, pe bhamookiti. ¹⁸ Ino, okani ndimbola ya ayonedhi. ¹⁹ Poko ekaoka mogendja buka ya bhokumu pe atikaendjea, mokaseli adhoo pe adjoodje eebhe yaona ibho a molema mande: mogendja ake oobho aadhisa molona a ndjia. ²⁰ Oobho waadhisa molona a mabhanga, eke oobho okaoko buka na mosepi; ²¹ kasi atike na ndjedhi tei yaande meene, ake mogendja wa poko, pe, kpoko too minyoko mimadhoa akpuli ya buka, akwaa. ²² Oobho waadhisa buka tei ya ndjubhe, eke oobho okaoka buka, kasi ngando dja mongali pe nduki ya bhogumake djikakpotooko buka pe djikaedjangendja bhobhota. ²³ oobho waadhisa molona a ndebha pele, eke oobho okaoka buku pe akaesondjea; yaabhota mbuma, emoti mokama, edii tuku motobha, edii tuku djisato. ²⁴ Aibhatsayea litsaatsa dhidii, aibuka: Bhokumu bha dhiko bhoyaani na mogendja omoti waaona momboto mopele a eyanga yaande. ²⁵ Kasi, yaaheke bhagendja, monguna waande aidhoa, aiyona mondjani mobhehu tei ya mbuma dja mapa, pe aikee. ²⁶ Embuma ya mapa egbaaka pe eibota mbuma, mondjani mobhehu pe moiyaningidja. ²⁷ Bhabhudhi bha meee eise bhaidhabuka naande: Kumu, waaonati embuma epele a eyanga yawe? ²⁸ Aibhaanea: Monguna omoti okoi bhoa. Bhabhudi bhaibuka naande: Opali bho ekee bhokamotubha? ²⁹ Aibuka yebhoa, bhoo tootubheni embuma ya mapa poko yaatubha ino mondjani mobhehu. ³⁰ Djiyeeni djipinge siyo emoti tee poko ya bhopoa mbuma, na poko ena, niabuka na bhabhudhi: Tubhani mee mondjani mobhehu, monyangani mabhoke mabhoke akpuli ya bhomaongodja, kasi kaiseni mbuma dja mapa a edhika yambi. ³¹ Yesu aibhatsayea litsaatsa dhidii: Bhokumu bha dhiko bhoyaani na embuma ya sevene yaona mogendja omoti a eyanga yaande. ³² Momboto mubho mobii mboto susu na bhotsedhu; momapinga,mobie sandja susu na bhodho pe motobhe mole, mbhudu bha liko bhadhaaka a bhitape bha ina. ³³ Aibhatsayea litsaatsa dhidii: Bhokumu bha dhiko bhoyaani mosisa ma mapa moatomba wadhi omoti pe aimobodjo na bhikpaka bhisato bha moteke wa mapa, tee yaahutidja imo moteke. ³⁴ Yesu aibuka na mongindi ngando djia susu na matsatsa, aibuka naabhu oko na matsaatsa, ³⁵ aingemedje buka dja mosakoli: Niahukua monoko bhoo nibuke na matsaatsa, niadjeedja ngando djiabombama oko yaatangea mongali. ³⁶ Lingongo aihandedja mongindi, pe aimgia a eise. Bhayekoli bhaiyadinda padhi naande, pe bhaibuka: Etelee litsaatsa dha mondjani mobhehu a eyanga. ³⁷ Aiyanoa: Oobho ooni embuma epele eke Waana wa moto; ³⁸ eyanga mongali; embuma epele eke ngbongi dja bhokumu; mondjani mobhehu nga ngbongi dja mokosi; ³⁹ monguna waona mondjani mobhehu eke mondili; poko ya bhopoa mbuma eke suka ya mongali; bhabhudhi bhaanzelu ⁴⁰ Oko ndje ekatubhe ibho mondjani mobhehu pe bhamodhumbaka a moosa, yaadhaa imo oko bhoa suka ya mongali. ⁴¹ Waana wa moto aalinda bhaanzelu bhande bhadjoodje a bhokumu bhande bhagendja bhasusu bhakanyee toli ebhehu pe bhabho bhati na bhosembo: ⁴² bhaabhadhumba a libondja dha moosa, hoo bhaeya pe bhaaka miinyo. ⁴³ Kasi bhagendja bha sembo bhaakpandja ndje liiso dha bhusa a bhokumu bha Sangwabhu. Oobho oke na bhiokedhi aoke. ⁴⁴ Bhokumu bha dhiko bhoyaani na eyoma ya motuya ebhombi ibho a eyanga. Mogendja omoti aiyedhisa, kasi aiyebhomba koto nakina; na mosepi mande aikaengedje dhooma dhande dhisusu, pe aihenda eyanga ena. ⁴⁵ Bhokumu bha liko bhoyaani na mogendja wa mombongo okanukana mayaka mapele. ⁴⁶ Edhisi iyo mayaka ma motuyo monene, aike bhokaengedje dhooma dhisusu dhiadhaaka iyo naadhu, pe aihenda mayaka maa. ⁴⁷ Bhokumu bha liko bhoyaani na ndjali edhumbi ibho a dhua enene pe mailuma su bhokopo na bhokopo. ⁴⁸ Elumi monyama na su, bhagbuta bhaamasua a libhongo; edhai ibho, bhahoo su bhapele bhabhaise a gbugbu, bhabhehu bhabhadhumbe. ⁴⁹ Yaadhaa imo bhoa suka ya mongali. Bhaanzelu bhaadhoa bhodhagbaa bhagendja bhakandjake na bayengebene, ⁵⁰ pe bhaabhadhumba a libondja na moasa mokayoa ngambungambu, hoo bhaeya pe bhaaka miinyo. ⁵¹ Osondjeini ngando djibo susu? Bhaimonea: Bhoa. ⁵² Aibuka naabhu: Maina nga, moteyi wa mobheko amandima ngando djiseli bhokumu bha liko ayaani na meene eise oobho okahoo tei ya dhooma dhande dhibho dhinyie na dha gala. ⁵³ Yesu amadjaka bhobuka na matsaatsa, aidjawa a siyo ena. ⁵⁴ Atobhaka a ngando yaande, aitangea bhateya a sinagoga, bhabho bhaamokaka bhaikamwa menemene pe bhabukaka: Adjongi na ndata pe ngudhu ya bhokoo makamwisi saase? ⁵⁵ Ye iyo mongbongi wa akomedhi na mabhaya? Kati nyango Malia? Ye Yakobo, Yozefu, Simoni pe Yuda bhamaanyango? ⁵⁶ Ngiana djande bhasusu bhatike naasu aabho? Adjongi na ngando djia susu saase? ⁵⁷ Aadhaa akpuli yaabhu ekumu meene. Kasi aibuka naabhu: Bhakadjebhele mosakoli oko a ngando pe a litungu dhande. ⁵⁸ Ye bhoo akoo makamwisi manene hoo, bhoo bhadhaati na bhondima.