¹ Na poko ena, Erode aokoka mosambo ma Yesu, aibuka na bhasali bhande: Yoane Mobatisi oobho! ² Asusoi tei ya bhago, maina nga mokakoo iyo makamwisi. ³ Erode aadungidja Yoane, bhaimonyanga panga pe bhaimodhumba a boloko, akpuli ya Erodiada, wadhi wa maanyango Filipo, ⁴ bhoo Yoane aabuka naande: Okokiti bhomotomba adhaa wadhi wawe. ⁵ Erode aapalaka bhoowa Yoane, kasi aadhaaka na bhoo bha mongindi, akpuli bho bhaamoeneke ndje mosakoli. ⁶ Etobhaka bhusa bha Erode bhoasepa bhusa bhoi mbotama yaande, moseka wa Erodiata aibhua a miiso ma bhagendja pe moibhongee Erode menemene, ⁷ ailapa bhomonyea susu djiaonga iyo. ⁸ Bhodjuana na buka ya nyango, aibuka: Nyeani molo ma Yoane Mobatisi a saani. ⁹ Kumu aiyoka iwa; kasi akpuli ya bholapa bhande pe ya bhagendja bhadhoi a lipati, aibuka bho bhamodhoyee naamu, ¹⁰ pe ailinda bho bhakese Yoane malo a boloko. ¹¹ Bhaidhoa na molo mande a saani, bhainyea moseka, aikapedjaa nyango naamu. ¹² bhayekoli bha Yoane bhaidhatomba ebembe pe bhaiewusia. Lingongo bhaikee bhokanyea Yesu mosambo. ¹³ Bhooka mosambo mua, Yesu aitita a bwato bho akee a siyo ya kimia adhaa iyo mbuki; mongindi modjeaka bhoa, bhaiyee gbata pe bhamodjua na mako. ¹⁴ Apundjka a bwato, aiyene mongindi monene, aibhaokea iwa, pe aiheledja bhabho bhaadhaaka na bhipeko. ¹⁵ Na mokoo, bhayekoli bhaiyadinda padhi naande, pe bhaibuka: Aabho eke ngbengee, pe bhusa bhosulumani; hanedja mongindi mokahenda dhia a ngando. ¹⁶ Yesu aibhanea: Bhakokiti bhokee; bhanyeani dhia ino bheene. ¹⁷ Bhaibuka naande: Eke aabho oko na mapa(gudhe) matano na su bhabhale. ¹⁸ Pe aibuka: Dhoyeaini naabhu. ¹⁹ Ailinda mongindi modhaa a ndjani, aitomba mapa matano na su bhabhale, aidjamba miiso liko, ainyea matondo. Lingongo, aibhuka mapa pe ainyea bhayekoli, bhakanyea mongindi. ²⁰ Bhagendja bhasusu bhaiyaka pe bhaigola, bhaiyandoa mitika miiluma miata djomi na mibhale. ²¹ Bhabho bhaaka bhaadha nako bhaami koto djitano, ye bholanga bhadhi na ngbongi. ²² Oko na poko ena, aibuka na bhayekoli bhatite a bwato pe bhaeke libhoso dhande sena edii, iyo adhikaa aahandedja mongindi. ²³ Amadjaka bhohandedja mongindi, aikonda mokodhi bho akaabhela iyo mbuki; yaadhoa mokoo, adhaaka hoo oko iyo mbuki. ²⁴ Bwato bhodhi tei ya mobhangi, esokpongbo eibholigidja; bhoo mopepe mwakumbidjaka bwato lingongo. ²⁵ Na koko wa yambo, Yesu aikee saa pamba yaadhaaka ibho, asombaka liko dha dhua. ²⁶ Bhayekoli bhomoeneke aasomba liko gha dhua, bhaibudjoana agbonda, pe bhaibuka: Eke esisi! Pe bhaitangea bhokpaloa na bhoo. ²⁷ Yesu aibuka naabhu: Gbutidjani milema, eke mbi; todhaani na bhoo! ²⁸ Petelo aibuka naande: Kumu, emadhaa we, buka bho nisombe liko dha dhua nidhoo pambe ya we. ²⁹ Yesu aibuka naande: Dhoa! Petelo aipundja a bwato, aitangea bhosomba liko dha dhua bhoakee pambe ya Yesu ya Yesu. ³⁰ Kasi bhoene bho mopepe moadhaka makasi, aitobha na bhoo pe aibhanda bhodhinda, aikpoloa: Kumu, heledjani! ³¹ Yesu aidjamba ebho, aimodunga, pe aibuka: Mogendja wa bhondima bha bhotsedhu, oisi tembe aye? ³² Bhakondaka a bwato, mopepe moisiya. ³³ Bhabho bhaadhaaka a bwato bhaigbueme midhi liboso dha Yesu, pe bhaibuka: Menemene, oke Waana wa Akongo. ³⁴ Bhaekaka sena, bhaitobha a Genezarete. ³⁵ Bhagendja bha siyo ena bhaeneke bho eke Yesu, bhaisombedja mosambo pamba susu, pe bhaimowayea bhagendja bhasusu bha bhipeko. ³⁶ Bhaiyatata naande bho bhapote nako molo ma esindje yaande. Bhasusu bhabho bhaakoo bhoa bhahela.