¹ Bhafalisayo pe bhatei bha Mobheko bhaidjonga a Yelusaleme bhaidhoa pambe ya Yesu, pe bhaibuka naande: ² A yomande bhayekoli bhawe tebhatose mibheko myaeyeyee bhataata? Bhoo tebhaosose mabho poko ya bhoaka. ³ Aibuka naabu: Ino, ayomande teetose ino mobheko ma Akongo, otosakani ataata wanu? ⁴ Bhoo Akongo abuki: Tosa sangwa na ngwa; pe: Oobho okabele sango too nyango agwe. ⁵ Kasi ino obukakani: Oobho okabuke na sango too na nyango: Yoma ekooki mbi niinyee niamokabhea Akongo naayu, atike na mobheko motosake sango na nyango. ⁶ Oowini bhka ya Akongo a bhotosa ataata wanu. ⁷ Bhagendja bha mbanda djibale, Isaya aasakola akpuli yaanu, yaabuka iyo: ⁸ Litungu dhibho dhikakumiseni oko na monoko, kasi molema mande modhi bhohadhi nambi. ⁹ Makumisi mabhu mati na poho, mibheko mikatee ibho midhi oko bhilinda bha bhagendja. ¹⁰ Abheaka mongindi, aibuka: Okani pe sosoloni. ¹¹ Ye eyoma ekaingee a monoko ekatobhedje mogendja mbindo; kasi eebhe ekapundje a monoko, iyo nga ekatobhedje mogendja mbindo. ¹² Bhayekoli bhaiyadinda pe bhaibuka naande: Odjei bho bhafalisayo bhaoki bhobhehu na buka djioki ibho? ¹³ Aihulidja: Mole mosusu mooniti Yaa wa liko bhaamotubha. ¹⁴ Bhayeeni: bake bhagendja bha bhaadjipi bhakasombedje bhaamina'bhu; mongendja wa bhadjipi amasombedja odii, bhaakwa ibho bhasusu bhabhale a libheya. ¹⁵ Petelo aimohedjoo: Edjeedja yomande ebuki litsaatsa dhia. ¹⁶ Yesu aihulidja: Ino pe osondjeakinikeni? ¹⁷ Odjeitini bhoo eebhe ekaingia a monoko ekanyoo a sopo, lingongo ekakee a dhinye? ¹⁸ Kasi eebhe ekapundja a monoko ekadjonga a molema, iyo nga ekatobhedja mogendja mbindo. ¹⁹ Bhoo a molema ekapundje maleeni mabhehu,yogo bhopala moomi too wadhi wa aminawe bhondumba, huubha, malowa, songisongi. ²⁰ Ngando djia djikatobhedje mogendja mbindo; kasi bhoaka ye bhoasosa mabho, bhokokiti bhotobhedja mogendja mbindo. ²¹ Yesu aidjawa haa, aikee a ngando ya Tiro na Sidoni. ²² Seleke, wadhi mokanana, aidjonga a ngando ena, aikpoloa: Kumu, Waana wa Davidi, okeani iwa! Mondili omoti akanyokolo moseka wambi mingi. ²³ Ye bhooamogbalee, bhayekoli bhande bhaiyadinda pe bhaiyatata naande: Mogbalea, bhoo akadjuana naasu na makelele mande. ²⁴ Yesu aihulidja: Bhaalindani oko a pata djiabhunga dja litungu dha Isalayele. ²⁵ Kasi wadhi ona aigbueme midhi libhoso dhande, aibuka: Kumu, sungani! ²⁶ Aihulidja: Ekokiti bhoo bhatombe dhia dha ngbongi pe bhadhumbee bhaana bha nva. ²⁷ Wadhi aikumbia: Bhoa, Kumu, kasi bhaana bha nva bhaakaake mitika mikakwaa tina ya mesa wa bhaso bhabhu. ²⁸ Yesu aibuka naande: Wadhi, oke na bhondima bhonene; mokomeene na we ndje epali we. Oko na poko ena, moseka waande aihela. ²⁹ Yesu aidjawa a siyo ena, aikumba pani na dhua enene ya Dalileya. Aikonda a mokodhi, aidhaa. ³⁰ Mongindi monene moidhoa na bhibhosono, bhagendja bha bhaadjipi, bhaabhubhubhu, bhagendja bhatseake mako, na bhagendja bhadii bha bhipeko. Baibhasambea a mako ma Yesu, aibhaheledja; ³¹ mongindi moisusuma bhoene bhaabhubhubhu bhobuka, bhatseake mako bhohela, bhibhosono bhosomba, bha bhaadjipi bhoene; pe moihekedja Akongo wa Isalayele. ³² Yesu aibhea bhayekoli bhande, aibuka naabhu: Niokei bhagendja bhabho iwa; sele masu masato make ibho padhi na mbi, eyoma eakake kati. Nipaliti bhobhandedja na ndjaa bhoo tebhaekwaa na ndjia. ³³ Bhayekoli bhaibuka naande: Aabho a ngbengee yaadhisa mapa(dhia) magoledjake bhagendja bhasusu bhabho saase? ³⁴ Yesu aibhahedjoo: Okeni na mapa ndjeka? Bhaihulidja: Sambo na bhasu bha bhodjelele. ³⁵ Ailinda bho bhadhedjaa bhagendja a ndebha, ³⁶ aitomba mapa sambo na su, ainyea Akongo matondo, aibhuka mapa pe aipedjaa bhayekoli bho bhanyee bhagendja. ³⁷ Bhagendja bhasusu bhaiyaka pe bhaigola, pe bhailumidja miata sambo ma mitika. ³⁸ Bhabho bhaaka bhaadhaa koto tuku djinei, ye bholanga bhadhi na nghongi. ³⁹ Yesu aihandedja mongindi, aitita a bwato, pe aikee a mongali ma Magadani.