¹ Bhafilisayo na bhasadukeyo bhaidhoa pambe ya Yesu pe, bha bhamoise a mokando, bhaimoonga bho abhaningidje elembo edjongi liko. ² Yesu aibhahulidja, " Na mokoo, okabukeni, ' Kombi bhusa bhoadhaa bhopele, bhoo dhombe dhikpeti bhozu ; pe na mongbakedhi.' ³ Koma aayoo bheendee, bhoo dhombe dhihindi. Odjeini bhososolo bhilembo bha dhombe, kasi otikeni na bhokopo bha bhososolo bhilembo bha masu mabho, ⁴ Litungu dhikandjake pe te dhitose mibheko ma Akongo dhikaonga elembo; bhaanyeani oko elembo ya Yona. Aibhayee haa, pe ainyoo. ⁵ Bhaekaka sena edii, bhayekoli bhabhoana bhowaa mapa. ⁶ Yesu aibuka naabhu, "Susu abhaneani na mosisa mokaise bhafalisayo na bhasadukeyo a mapa." ⁷ Bhayekoli bhaihedjoono: Eke akpuli bho ewaiti mapa. ⁸ Yesu bhooka bhoa aibuka: Bhagendja bha bhondima bha bhotsedhu, okaingani bho nibuki bhoa bhoo owaitini mapa? ⁹ Osondjeakeni, otokatimani dhea ndje yaakedja mbi bhagendja koto djitano na mapa matano pe miata ndjeka mialokoo ino, ¹⁰ too bagendja koto djinei bhaakedja mbi na mapa sambo pe miata ndjeka mialokoo ino? ¹¹ Bhotuunde etikasondjea ino bho nibukiti akpuli ya mapa? Nibuki bho abhaneani na mosisa mokaise bhafalisayo na bhasadukeyo a mapa. ¹² Bhaidhosondjea nga bho aabukati bhoa akpuli ya mosisa ma mapa, kasi akpuli ya mateya ma bhafalisayo na bhasadukeyo. ¹³ Yesu atobhaka a Sezareya ya Filipo, aihedjoo bhayekoli bhande, "Bhagendja bhakabuke bho mbi, Wana wa Moto nidhi nda?" ¹⁴ Bhaimoanea, "Bhadii bhakabuke bho odhi Yoane Mobatisi; bhadii Elia; bhadii koto Yelemia too omoti wa bhasakoli. ¹⁵ Yesu aibhahedjoo, "Ino obukini bho mbi nda?" ¹⁶ Simoni Petelo aiyanoa, "Oke Klistu, Waana wa Akongo wa ehele." ¹⁷ Yesu aimohulidja, "Mosepi ma we, Simoni, mongbongi wa Yona; ye mogendja wa mulu na makia oodjeedji bhoa, kasi Yaa wambi oobho ake dhiko." ¹⁸ Mbi nibuki na we bho liina dha we Petelo, eningidji libhanga,pe liko dha libhanga dhia niainda Ekalo yambi, nako ngudhu ya yogo etaehono. ¹⁹ Nianyea mafungula ma bhokumu bha dhiko, "eebhe yaanyanga we a ndebha, yaanyangana dhiko, pe eebhe yaadhupoa we a ndebha yaadhupoa dhiko." ²⁰ Lingongo aikokosia bhayekoli bhande tebhanyoo na moteli bho iyo ake Klistu. ²¹ Oko na poko ena Yesu aibhanda bhodjeedja bhayekoli bhande bho ebhongi naande akee a Yelusaleme, hoo bhasuku, makumu ma bhasali na bhatei bha mibeko bhamoenedje maboale, bhaamoowa, kasi aasusua lingongo dha mau masato. ²² Petelo aimosua pamba bhoo amohombedje maleeni, aibuka, "Akongo aabhanee, Kumu! Mokando motaatobhea." ²³ Kasi Yesu aiyahombedja, aibuka na Petelo, "Nyoo haa, Satana! Okaisiani bhikumu; bhoo, maleeni mawe matike ma Akongo, kasi ma bhagendja." ²⁴ Lingongo Yesu aibuka na bhayekoli bhande, "Okapale bhodjuani, aakie iyo meene, awaa ekuluse yaande, pe adjueni. ²⁵ Bhoo oobho okanukane bhoheledja ehele yaande, aebhungidja, kasi oobho waabhungidja ehele yaande akpuli ya mbi aedhisa nakina. ²⁶ Mogendja amadhisa mongali mobimba, abhungidje molimo mande, molua nde?, too, mogendja amabhungidja molimo mande, aamohenda na ye? ²⁷ Bhoo esengeli bho Wana wa Moto adhoo a heku ya Sango, siyo emoti na bhaanzelu bhande; pe anyea omoti na omoti bhodjuana na misala mande. ²⁸ Nikaadjeedjani menemene, bhadii tei yaanu bhatagwaa, oko bhaenekini Wana wa Moto adhoo na heku ya bhokumu bhande.