¹ Lingongo dha masu motobha, Yesu aitomba Petelo, Yoane na maanyango Yakobo, aikee naabhu a siyo ya bhadee liko dha mokodhi ma bhodongaa. ² Aihomba mokuku a miiso mabhu; mbanda yaande ekpandjaka ndje djiiso dha bhusa, bisindje bhande bhiitobha bhopee ndje mwene. ³ Seleke, Moize na Elia bhaibhapundjia, bhadhaaka bhaabuka na Yesu. ⁴ Petelo aibuka naande, "Kumu, bhopele ndje eke iso aabho, omapala, niinde bhikpangba bhisato aabho, emoti ya we, emoti ya Moize, pe emoti ya Elia." ⁵ Yaadhaaka iyo aabuka bhoa, dhoambe dhiikpandja ndje bhusa dhiibhadhipa. Pe seleke, dhoi dhiipundja a dhoombe dhibukaka, "Oobho ake Waana mbi. Okapale mbi. Nikaasepe naande menemene. Mookani!" ⁶ Bhayekoli bhaokaka dhoi dhia, bhaisulumidja mbanda a ndebha, bhoo bhonene bhoibhakoo. ⁷ Kasi Yesu aiyadinda padhi naabhu, aibhapoto, aibuka, "Djawani, tobhangeni!" ⁸ Bhaidjoodje miiso, bhaiyene oko Yesu iyo mbuki." 9 Yaa dhaka ibho bhatita mokodhi, Yesu aibuka naabhu, "Toteleeni mokando moeni ino, tee yaasuswa Waana wa Moto a bhago." ¹⁰ Bhayekoli bhaimohedjoo, "Aye ekabuke bhatei bha mibheko bho Elia aadhoa mee libhoso? ¹¹ Aiyanoa, "Menemene Elia aadhoa bhodhabhongedje ngando susu." ¹² Kasi nikaadjeedjani Elia aadhoa gala, yebhamondime, bhaimokoo ndje yaapala ibho, Yaaenedje ibho Waana wa Moto maboale oko bhoa. ¹³ Bhayekoli bhaisondjea bho aabukaka na Yoane Mobatisi. ¹⁴ Bhatobhaka yaadhaka mongindi, mogendja omoti aidhoa padhi na Yesu, aigbumee midhi, pe aibuka: ¹⁵ Kumu, okea mongbongi wambi wa moomi iwa, ake na ebubulaka, akaene maboale solo; akakwaa poko susu a moosa, too a dhua. ¹⁶ Niamowaa pambe ya bhayekoli bha we, ye bhahone bhomoheledja. ¹⁷ Yesu aihulidja, "Ino, litungu dha bhagendja bhati na bhondima, bhagendja bhabhehu, niadhaa naanu tee poko nde? tee poko nde yaanyanga mbi molema a ngando djanu (bhehu)? Dhoani naande aabho. ¹⁸ Yesu aipamea amembo, amembo aipundja, pe mongbongi aihela oko na poko ena. ¹⁹ Bhayekoli bhaidinda padhi na Yesu, poko yaadhikaa ibho bheene, bhaimohedjoo, "Ayomande ehoniti iso bhobhengana amembo ona?" ²⁰ Aibuka naabu, "Akpuli ya bhondima bhanu bhotsedhu. Nikaadjeedjani menemene, odhaakeni na bhondima ndje embuma ya sevene, ndje waabukani na mokodhi mubho: Djawa aabho,kee oho, ndje moakomeene; eyoma nako emoti eenyoitini na ngudhu. ²¹ Kasi okokini bhobhengana amembo wa bhokopo bhua oko na libondeli pe bhohee ndjaa. ²² Yaadhaaka bhaasomba a Galileya, Yesu aibuka naabhu, "Bhaakadha Waana wa Moto a mabo ma bhagendja. ²³ Bhaamoowa, pe asusua lingongo dha masu masato. Bhaiyoka iwa meene a molema. ²⁴ Bhatobhaka a Kafarnaum, bhafutidji pako ya Tempelo bhaidho pambe ya Petolo, bhaimohedjoo, "Molakisi waanu teafute pako ya Tempelo?" ²⁵ Aihulidja, "Akafute. Bhaingiaka a eise, Yesu aimotsamea liboso, aibuka, "Simoni, okaleene bho?" Makumu ma ndebha bhakafutidje bha nda pako? ngbongi djabu ingako bhidhoadhoa? ²⁶ Petolo aiyanoa, "Bhidhoadhoa. Yesu aimohulidja, "Ngbongi tedjifute!" ²⁷ Kasi, bhoo tobhatsakedje ekumu, kee a mobhangi monene, dhumba ndobhoni, mosu waataa libhoso, modunga; modhupoa monoko, waene efaanga ya mbuma. Etomba pe bhanyea naayu ndje pako ya mbi na we