¹ Na poko ena, bhayekoli bhaidhoa pambe ya Yesu, pe bhaimohedjoo, "Nda obii monene a bhokumu bha dhiko?" ² Yesu aibhea mongbongi wa bhotsedhu, aimoemedja tei yaabhu. ³ Pe aibuka, "Nikaadjeedjani menemene: Ohombedjitini milema pe otobhitini ndje ngbongi bha bhodjelele, otaingiani a bhokumu bha dhiko." ⁴ Mainanga, oobho waatitidja ndje mongbongi wa bhotsedhu, oobho, iyo abii monene a bhokumu bha dhiko. ⁵ Oobho, wayamba monghongi wa bhotsedhu ndje oobho na liina dhambi, ayambi mbi meene. ⁶ Kasi, mogendja omoti amaisia ngbongi bha bhodjelele bhabho bhakayambani bhikumu, bhopele bhamonyange libhanga linene dhikahombedje punda akpuli ya bhainda moteke a dholi, pe bhamodhumbe a bhodu bha mobhangi monene. ⁷ Iwa a mongali akpuli ya bhagendja bhakaise bhikumu! Bhoo bhikumu bhidjangete; kasi iwa na mogendja okaise bhikumu. ⁸ Ingako ebho too eko ya we ekaalinda okwaa, ekese pe edhumba bhohadhi; ebii bhopele aingee a ehele na eko too na ebho emoti, a siyo bho bhaadhumbe a moosa temodhimee namako too na mabhomabhale. ⁹ Liiso bha we dhimaalinda a ndjia ebhehu, djidhongoo pe dhidhumba bhohadi na we; ebii bhopele oingee a ehele na liiso dhimoti, a siyo bho bhaadhumbe a lifelo na miiso mabhale. ¹⁰ "Abhaneani bho toodjebheleni omoti wa ngbongi bhabho; bhoo nikaadjeedjani bho bhanzelu bhabhu bhakaene poko susu mbanda ya Yaa adhi dhiko. ¹¹ Bhoo Waana wa Moto adhoi bhodhaledja eebhe yaabheha. ¹² Okaleeneni bho? Mogendja omoti amadhaa na pata kama, omoti amabhunga tayee pata tuku libwa na libwa a mikodhi, bho akee bhokaanukane oobho obhungi? ¹³ Nikaadjeedjani menemene, amamodhisa, adhaa namosepi bhobia pata tuku libwa na libwa bhabho bhabhungiti. ¹⁴ Oko bhoa, Sangwanu wa dhiko apaliti bho omoti wa ngbongi dja bhodjelele bhabho abhehe. ¹⁵ "Maangwaa amakoo bhobhehu, kamatane pe mopamea poko eke ino bhabhale." Amayoka, omotombe nakina ndje maangwaa. ¹⁶ Ayokiti, tomba mogendja omoti too bhabhale, bhoo mokando mosie a miiso ma bhatemwe bhabhale to bhasato. ¹⁷ Apaliti bhobhaoka, kadjeedje mokando mua a Ekalo; apaliti nakina bhooka Ekalo mosele(moene) ndje mopagano too mofutidji pako. ¹⁸ Nikaadjeedjani menemene: Esusu yaanyanga ino a ndebha yaanyangana liko, esusu yaaloa ino a ndebha yaaloana liko. ¹⁹ Nikaadjeedjani edii mbala, bhagendja bhabhale aabho a ndebha bhamaokana bho bhaonge nako eyoma nde, Yaa aabhanyea naayu. ²⁰ Bhoo siyo esangani bhagendja bhabhale too bhasato na liina dhambi, nike tei yaabhu. ²¹ Petelo aiyadinda padhi na Yesu, aimohedjoo, "Kumu, wanima amakooni bhobhehu, nimolimbise mbala ndjeka? Tee mbala sambo?" ²² Yesu aibuka naande, "Nikaadjeedja ye mbala sambo, kasi mbala tuku sambo mbala sambo." ²³ Mainanga, bhokumu bha dhiko bhoyaani na Kumu okanukana bholongea nyongo djande na bhasali bhande. ²⁴ Yaadhaka iyo aalanga mikanda ma nyongo, bhaimowayea mogendja omoti waadhaka na nyongo ya taleta zome. ²⁵ Aadhakati na molua mofutake nyongo, Kumu ailinda bho bhamoengedje, iyo wadhi waande, ngbongi djande,na dhoma dhande dhisusu bhoo amadje nyongo. ²⁶ Mosali aiyalimia(aiyakese likobho) a ndebha, aibueme midhi libhoso dhande, aibuka: Kumu, nyeani bhaa masu, niafuta nyongo esusu. ²⁷ Kumu aiyokea mosali oobho iwa, aimonyee, pe aimolimbisa nyongo. ²⁸ Okona epudjake, mosali oobho aitaana na aminaande wa elomo wadhaka na nyongo yaande denario kama emoti. aimohulua a dholi pe aimogogomedje, aibuka naande, 'Futa nyongo yambi!' ²⁹ Aminaande aiyalimia a ndebha, aiyatata naande, aibuka, 'Nyeani bhaa masu, pe niafuta nyongo ya we.' ³⁰ Kasi iyo aingana, pe aikee bhokamodhumba a boloko tee yaamadja iyo bhofuta nyongo yande. ³¹ Bhaminaande bhaeneke bhoa, bhaiyoka iwa meene, pe bhaikee bhokatelee Kumu wabhu mokando maina. ³² Kumu aibhea mosali ona pe aibuka naande, 'Mosali mobhehu , niilimbisi nyongo esusu edhaaki we naayu bhoo waatatana mbi.' ³³ We pe yaabhongokati bho okee aminawe iwa, ndje yaayokea mbi iwa? ³⁴ Na kele esusu, Kumu aimonyea a mabho ma bhagendja bha likakala, tee yamadja iyo bhofuta nyongo esusu. ³⁵ Yaa wa dhiko aakooibhi naanu oko bhoa, odjeitini bholimbisana na molema bhohoyee.