¹ Yesu amadjaka bhobuka bhoa, aidjawa a Galileya, aikee a ndebha dja Yudeya, sena ya Yordani. ² Mongindi monene moimodjua, pe hoo aiheledja bhagendja bha ngoni. ³ Bhafalisayo bhaidhoa pambe yaande, bhaimohedjoo bhoo bhamoisee ekumu, "Momi akoki bhokia wadhi waande nako a mokando nde?" ⁴ Aibhanea: Olangitini bhoo a ebhandeli(litange) Mokeli aakoo momi na wadhi. ⁵ Pe aabuka: Mainanga momi aayee sango na nyango pe aasanga na waadhi waande; pe ibho bhabhale bhaatobha mogendja omoti? ⁶ Bhatike dhea bhabhale, bhatobhi mogedja omoti. Mogendja aegbaa eebhe enyangi Akongo . ⁷ Bhaibuka naande, "Ayomande yaabuka Moize bho momi apedjaa wadhi etumba ya bhoowa moki pe amokie?" ⁸ Aibuka naabhu, "Moze ainyeani ndjia ya bhokia bhadhi bhanu akpuli ya milema bhokolokolo manu;" kasi a litange, mwadhaakati bhoa. ⁹ Nikaadjedjani, oobho waakia wadhi waande, edhaiti oko akpuli ya bhondumba, pe aase wadhi odii, akoi ekobho. ¹⁰ Bhayekoli bhaibuka naande, "Emadhaa bhoa akpuli ya momi pambe ya wadhi, ebii bhopele teose." ¹¹ Aibuka naabhu, "Bhasusu bhasondjeiti buka eebhe, oko bhabho bhadisi agbonda wa bhoesondjea." ¹² Bhoo eke na bhagendja bhakokiti bhooso oko yabhabhota ibho; bhadii bhabhatobhedja bhoa; bhadii pe bhaatobhedja bhoa ibho bheene, akpuli ya bhokumu bha dhiko. Oobhi oke na bhokopo bhosondjeake, asondjee. ¹³ Bhaimowayea ngbongi dja bhodjelele bho abhaisee mabho pe abhapanboo. Kasi bhayekoli bhaibhalembea. ¹⁴ Yesu aibuka, "Yeeni ngbongi dja bhodjelele, tobhalembeeni bhadhoo pambe ya mbi! Bhoo bhokumu bha dhiko bhoke akpuli ya bhabho bhayaani naabhu." ¹⁵ Aibhaisia mabho, pe aitita ndjia ainyoo. ¹⁶ Mgendja omoti aimohedjoo, "Molakisi, bhopele nde bhokooki mbi bhoo nidise ehele ya lobiko?" ¹⁷ Aihulidja, "Okahedjooni akpuli ya bhopele aye? Omoti odhi Mopele. Omapala bhoingia a ehele, tosa mibeko. Aimohedjoo, "Mobeko nde?" ¹⁸ Yesu aihulidja, "toowe; tokoo ekobho; tohibhe; tobhukee aminawe likuta; tosa sangwa na ngwa; ¹⁹ pala aminawe ndje ekaapale we meene." ²⁰ Palanga ona aibuka naande. "Nikatose mibheko mia misusu; ye edhikai?" ²¹ Yesu aibuka naande. "Omapala bhodhaa moyengebene, kee, engedje dhooma dha we dhisusu, nyea bhadjangi naadhu, waadhisa bhogumake liko. Lingongo dhoa, djuani. ²² Aokaka bhoa, palanga ona aikee na iwa; bhoo addhaaka na dhooma dhinene. ²³ Yesu aibuka na bhayekoli bhande. "Nikaadjeedjani menemene, mogendja wa bhogumake aingia a bhokumu bha dhiko na kpokoso. ²⁴ Nikaadjeedjani nakina, wisi ekaingee a libhoodha tonga na likakala, kasi bhoo mogendja wa bhogumake aingee a bhokumu bha Akongo ebii likakala. ²⁵ Bhayekoli bhaikamwa mingi na buka ena, bhaimohedjoo: Nda waahela? ²⁶ Yesu aibhasele, pe aibuka: Akpuli ya bhagendja mokomeenete, kasi yoma ebii Akongo na ngudhu etike. ²⁷ Petelo aibuka naande: Sele, iso eyei kpaa, eiyedjua we, yaadhisa ye? ²⁸ Yesu aibuka naabhu: Nikaadjeedjani menemene, yaahombea mongali, yaadhaa Waana wa Moto a ngbende ya bhokumu bhande, ino bhadjuiini, waadhaani a kiti djomi na djibhale, pe waasambedjani matungi djomi na mabhale ma Isalayele. ²⁹ Mogendja nako nda ayei bhamaanyango, ngiana, sango, nyango, wadhi, ngbongi, bhiyanga too bhiise akpuli ya liina dha mbi, aadhisa mokama, pe aadhisa ehele ya lobiko. ³⁰ Bhagendja bha libhoso bhaatobha bha lingongo, pe bhagendja bha lingongo bhaatobha bha libhoso.