¹ Bhokumu bha dhiko bhoyaani na meene eise oobho opundji mongbakedhi bhogbu, bho anukane bhagendja bhalome a eyanga yaande ya vino. ² Baindimiana bho aabhafuta denario emoti na dhasu, pe aibhalinda a eyanga yaande. ³ Aipundja kato na ngonga ya libwa, pe aiyene bhadii a mbongo bhadhai elemo kati. ⁴ Aibuka naabhu: Ino pe keeni a eyanga ya mbi; niafutani bhopele. ⁵ Bhaikee. aipundja koto padhi na midi pe na ngonga ya misato ya mokoo, aikoo oko bhoa. ⁶ Aipundja koto na ngonga ya mitano ya mokoo, aitana bhadii bhaemi, aibuka naabhu: A yomande ekaemaa ino aabho moi mobimba bhokoo eyoma kati? ⁷ Bhaibuka naande: Bhaetombiti a elomo. Aibuka naabhu: Keeni a eyanga ya mbi. ⁸ Mokoo motobhaka, meene eyanga aibuka na Kapita waande: Bhea bhasali, nyea omoti na omoti lifuta dhande, bhotangea na bhangongo tee bha litange. ⁹ Bhabho bha ngonga ya mitano ya mokoo bhaidhoa, bhaidhisa omoti na omoti denario emoti. ¹⁰ Bhabho bha libhoso bhadhoaka, bhaingaka bho bhaabhanyea mbakea; kasi bhaidhisaka pe oko denario emoti emoti, ¹¹ Bhadhisaka mbemba, bhaitangea bhondungubhana na meene eyanga, ¹² bhaibuka: Bhabho bhadhoi lingongo bhaloni oko saa emoti, pe oibhafuta bhokopo bhomoti naasu bhabho bhagwi bhoembe pe eheya moyi mobimba. ¹³ Aiyanea omoti waabhu: Aminambi, niikoiti bhobhehu; yaandimianati bhoo niafutani denario emoti? ¹⁴ Tomba ya we, pe kee. Nipali bhonyea oobho odhoi lingongo ndje eenyeimbi(we). ¹⁵ nikokiti bhokoo na dhooma dhambi ndje epali mbi? Too oen bhobhehu ndje ekoimbi bhopele? ¹⁶ Sele ndje yaatobha bhagendja bha libhoso lingongo, pe bha ngongo libhoso. ¹⁷ Yaadhaaka Yesu aakee a Yelusalema, aatomba oko bhayekoli djomi na bhabhale, na ndjia, aibuka naabhu, ¹⁸ "Ekakee a Yelusalema, pe bhaakabha Waana wa Moto a mabho ma makumu ma bhabhudhi bha Akongo pe ma bhatei bha mibheko. Bhaamotitidja a yogo, ¹⁹ pe bhaamokabha a mabho ma bhapagano, bho bhamotiole, bhamolaa mbomo, pe bhamogbeme sete a ekulusu; kasi aasusua dhasu dha misato. ²⁰ Naa ngbongi bha Zebedeyo aidhoa naabhu pambe ya Yesu aigbueme midi bho amoonge eyoma emoti. ²¹ Yesu aibuka naande, "Opali ye nikoo a kuli ya we?" Aiyanoa, "Sele ngbongi bha mbi bhabhale bhabho, koo bho bhadhaa a bhokumu bha we, omoti a ebho ya dhibhami, odii a ebho ya dhibhadhi. ²² Yesu aihulidja, "Odjeitini eyoma ekaonga ino. Waahononi bhonunga ekpaka yaanunga mbi?" Bhaihulidja, "Yaahono." ²³ Yesu aibuka "Eke imo bhoa. Waanungani ekpaka yaanunga mbi;" Kasi a mubho moseli bhodhaa a ebho ya mbi ya dhibhami too ya dhibhadhi, moseliti mbi, bhabho Yaa aalengele akpuli yaabhu nga bhaadhaa. ²⁴ Bhayekoli djomi bhadii bhaokaka mokando mua, bhaiyene ngbongi bhaa bhabhale bhobhehu. ²⁵ Yesu aibhabhea, aibuka, "Odjeini bho makumu ma ndebha makakondje bhagendja bhabhu na ngudhu, pe bhagendja bhanee bhaenedjeke bhokumu bhabhu." ²⁶ Motadhaa bhoa tei yaanu. Oobho opali bhodhaa mogendja monene tei yaanu, adhaa mosali waanu; ²⁷ pe oobho apali bhodhaa mogendja wa libhoso tei yaanu, adhaa mobhudhi waanu. ²⁸ Mainanga Waana wa Moto adhoiti bhoo bhamokomee, kasi bho akomee pe anyee ehele yaande ndje mbeka akpuli ya bhagendja bhatutu. ²⁹ Bhapundjaka a Yeriko, mongindi monene moidjua Yesu. ³⁰ Bhagendja bha bhaadjipi bhabhale bhaadhaaka bho Yesu akanyoo, bhaikpoloa: Kumu, Waana wa Davidi, eyokea iwa! ³¹ Mongindi moibhapamea, bhoo bhabhadakedje; kasi bhaikpoloa bhobia: Kumu, Waana wa Davidi, eyokea iwa! ³² Yesu aiyemaa, aibhabhea, aibuka: Opalini niikomeeni ye? ³³ Bhaihulidja: Kumu, miiso masu madhupuane. ³⁴ Yesu aibhaokea iwa, aipoto miiso mabhu; oko na poko ena miiso mabhu maidhupuana, pe bhaimodjua.