¹ Bhatobhaka padhi na Yelusalema, bhaitobha a Betfadje, a mokodhi wa Ba-Oliva, Yesu ailinda bhayekoli bhabhale, ² aibuka naabhu: Keeni a ngando eke libhoso dhanu, waatanani punda wa wadhi bhainyanga mondiki na waana waande; bhatunguani, pe duani naabhu. ³ Bhamahedjooni, bukani: Kumu akabhaonga. Pe aabhalidja bhogala. ⁴ Moikomeene oko bhoa bho buka ya mosakoli engemene. ⁵ Bukani na moseka wa Siona: Sele, Kumu wa we akadhoa pambe ya we, eke molema bhodee, aikonda dhiko dha punda oke na waana. ⁶ Bhayekoli bhaikee, bhaikoo ndje yaabhalinda Yesu. ⁷ Bhaidhoa na punda pe na waana waande, bhaibhakea liko dhande mikoti mabhu, pe Yesu aimidheyee. ⁸ Bhagendja bhanene bhaiyanda mikoti mabhu a mokenge; bhadii bhaibuka bhitape bha mele, bhaibhilila a mokenge. ⁹ Bhabho bhaadhaaka libhoso na bhabho bhaadjuaka Yesu lingongo bhakpoloaka: Ozana, Waana wa Davidi! Heku ya oobho waadhoa na dhiina dha Kumu! Ozana liko bhohadhi bhobia! ¹⁰ Aingiaka a Yelusalema, ngando mobimba eidjengetana, bhahedjooko: Nda oobho? ¹¹ Mongindi moiyanoa: Mosakoli Yesu, wa Nazarete a Galileya ¹² Yesu aingia a tepelo ya Akongo. aibhengana bhagendja bhasusu bhaaengedjeke pe bhaasombaka a tepelo; aigbangboa mesa ma bhagendja bhaahombedjaka mbemba pe kiti dja bhabho bhaaengedjeke bhidhua. ¹³ Aibuka naabhu: Modhilo mobuki: Bhaabheya eise yambi eise yaabhelake. Kasi aiyebhedjani eise ya bhagendja bha huubha. ¹⁴ Bagendja bha bhaadjipi na bhibhosono bhaidoa padhi naande a tepelo, si bhaheledja. ¹⁵ Kasi makumu ma bhabhudi bha Akongo na bhatei bha mibheko bhaiyoka bhobhehu yaaene ibho ngando neenee djiakoo Yesu, pe ngbongi bhaakpoloaka a tepelo: Ozana, Waana wa Davidi! ¹⁶ Bhaibuka naande: Okaoka ndje ekabuka ibho? Yesu aihulidja: Nikaoka. Olangakini buka djibho bhusa nako bhomoti: Oifa makumisi a minoko ma ngbongi pe ma bhabho bhakanunga mabhee? ¹⁷ Lingongo aibhayee, aipundja a gbata bho akee a Betania, aihee hoo. ¹⁸ Ahulaka a gbata na mongbakedhi, ndjaa eimokoo. ¹⁹ Na ndjia aiyene male figi, aiyadinda padhi na ina; aeneke bho moke oko na kasi edjegi, naabhu: Otabhota ibhi dhea mbuma! Oko na poko ena mole moiyoma(moikokota). ²⁰ Bhayekoli bhaeneke bhoa, bhaikamwa, pe bhaibuka: Mola ma figi mubho moikokota mbala emoti bho ndenge nde? ²¹ Yesu aibhahulidja: Nikaadjeedjani menemene, omadhaani na bhondima pe oisitini tembe, okooteni oko ndje ekoimbi na mole ma figi, kasi omabukani na mokodhi mubho: Djawa aabho, kaadhumbe a mobhangi monene, moakomeene bhoa. ²² Eyoma esusu yaonga ino waabhelani na bhondima, waedhisani. ²³ Yesu aingia a tepelo, yaadhaaka iyo aateya, makumu ma bhabhudhi bha Akongo na bhasusu bha ngando bhaidhabuka naande: Nda oonyei makoki makooke bhoa, nda oonyei makoki maa? ²⁴ Yesu aibhahulidja: Mbi pe niahedjooni motuna momoti; omaaneani, niadjeedjani siyo ekadjonga makoki makakoombi ngando djia. ²⁵ Libatisa dha Yoane dhiadjonga pambe ya nda? Pambe ya Akongo ingako pambe ya bhagendja? Kasi ibho bhaleeneke a milema; emabuka: Pambe ya Akongo, aabuka naasu: Waaamondimatini a ye? ²⁶ Emabuka: Pambe ya bhagendja, ekabhanga mongindi, bhoo ibho bhasusu bhakaene Yoane ndje mosakoli. ²⁷ Mainanga bhaibuka na Yesu: Edjeiti. Aibuka naadhu: Mbi pe, nitaadjedjani siyo ekadjonga makoki makakoo mbi ngando djia. ²⁸ Oleenini bho? mogendja omoti aadhaaka na bhapalanga bhabhale; aibuka na oobho mosuku: Waana mbi, Kalome bhendee a eyanga ya vino. ²⁹ Aihulidja: Nipaliti. Lingongo, aikee. ³⁰ Aibuka na manyie oko bhoa. Aihulidja: Nioki, yaa. Yeakee. ³¹ Nda tei yaabhu bhabhale otosi yaa? Bhaihulidja: Oobho mosusu. Yesu aibuka naabhu: Nikaadjeedjani menemene, bhafutidji pako na bhadhi ndumba bhaingia libhoso dhanu a bhokumu bha Akongo. ³² Bhoo Yoane aadhoa pambe yaanu bhoaningidje bhosembo, yeomondimeni. Kasi bhafutisi pako na bhandumba bhaimondima; pe ino bhabho bhaeneni ngando djia, yebhoo ohombedjeni milema bhoo omoyambeni. ³³ Okani dhitsaatsa dhidii. Mogendja omoti aadhaka meene ndebha, pe aiyona mole ma vino. Aihika eyanga, ailongo siyo enyuake vino, pe ainda eise ya sindjili; aiyeyee bhafuteli eyanga pe aikee edii ngando. ³⁴ Poko ya bhopoa mbuma etobhaka, ailinda bhasali bhande pambe ya bhasali bha eyanga bho bhatombe mbuma dja eyanga. ³⁵ Bhafuteli bhaidunga bhasali bhande, omoti bhaimodopo mombomo, bhaiyowa odii, wa bhasato bhaimolaa mabhikili. ³⁶ Ailinda koto bhasali bhadii bhatutu, bhobia bha libhoso; bhaikoo naabhu oko bhokopo bhomoti. ³⁷ A dhisukidja aibhalindia mongbongi waande, aiyabukia: Bhaatosa mongbongi wambi. ³⁸ Bhafuteli bhaeneke mongbongi, bhaiyabukia: Sele oobho waadhikaa na eyanga; Dhoani, emoowe, edhikaa na eyanga. ³⁹ Bhaimohulua, bhaipundja naande tiambo ya eyanga, pe bhaimoowa. ⁴⁰ Yaahula meene eyanga, aakoo ye na bhasali bhabho? ⁴¹ Bhaimohulidja: aowa na bhodjanga iwa bhasali bhabhehu bhabho aayeyee bhafuteli bhadii eyanga, bhamonyeake mbuma na poko yana. ⁴² Yesu aibuka naabhu: Olangakini a Makomi: Libhanga dhiadhumba bhaindi bha eise dhiitobha libhanga dha moomi; elomo ekoi Kumu ena, eeyeni na miiso, lidjoko meene? ⁴³ Mainanga ekaadjeedjani mbi, bhaakatwani bhokumu, bhabhonyea na litungu dhiabhotaka mbuma akpuli yaabhu. ⁴⁴ Oobho waakwaa liko dha libhanga dhia aabhukia, oobho waakweyee idho aamunyuana. ⁴⁵ Makumu ma Akongo na bhafalisayo bhaokoka matsaatsa maa, bhaisondjea bho Yesu aabukaka naabhu, ⁴⁶ bhainukana bho bhamodunge, kasi bhaadhaaka na bhoo bha mongindi, akpuli bho bhaamoeneke ndje mosakoli.